དོན་གྲུབ་དབང་ཆེན་ལགས་ལ་༢༠༡༩་ལོའི་སྙིང་སྟོབས་གཟེངས་རྟགས་ཕུལ་འདུག

སྐབས་བཅུ་གཅིག་པའི་ཇི་ནི་ཝའི་འགྲོ་བ་མིའི་ཐོབ་ཐང་དང་དམངས་གཙོའི་ལྷན་ཚོགས་སྟེང་ཆབ་སྲིད་བཙོན་ཟུར་དོན་འགྲུབ་དབང་ཆེན་ལགས་ལ་༢༠༡༩་ལོའི་སྙིང་སྟོབས་གཟེངས་རྟགས་ཟེར་བ་དེ་ཕུལ་ཡོད་པ་རེད།
དེ་ཡང་ཟླ་༣་པའི་ཚེས་༢༦་ཉིན། སུད་སིའི་ཇེ་ནི་ཝ་གྲོང་ཁྱེར་དུ། སྐབས་༡༡་པའི་ཇི་ནི་ཝའི་འགྲོ་བ་མིའི་ཐོབ་ཐང་དང་དམངས་གཙོའི་ལྷན་ཚོགས་ཀྱིས་གཟེངས་རྟགས་འབུལ་བའི་མཛད་སྒོ་ཞིག་འཚོགས་ཡོད་པ་དང་། མཛད་སྒོའི་སྟེང་༢༠༠༨་ལོར་འཇིགས་བྲལ་ཞེས་པའི་བོད་མིའི་འདོད་བློ་ངོ་མ་མཚོན་པའི་དངོས་བྱུང་གློག་བརྙན་ཕབ་སྐྲུན་མཁན་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱིས། དཔའ་ངར་ཆེན་པོས་འཛམ་གླིང་གི་རང་དབང་དང་དམངས་གཙོ། ཀུབ་ཁྱབ་འགྲོ་བ་མིའི་ཐོབ་ཐང་བཅས་སྲུང་སྐྱོབ་གནང་བར་ཆེ་བསྟོད་ཀྱི་ཚུལ་དུ་༢༠༡༩་ལོའི་སྙིང་སྟོབས་གཟེངས་རྟགས་ཁོང་ལ་ཕུལ་ཡོད་པ་རེད།
གཟེངས་རྟགས་འབུལ་བའི་མཛད་སྒོའི་ཐོག་དོན་གྲུབ་དབང་ཆེན་ལགས་ཀྱིས། དེ་རིང་ང་ལ་འདི་ལྟ་བུའི་ཆེ་མཐོང་གི་གཟེངས་རྟགས་ཤིག་གནང་བར་ང་དང་ངའི་ལས་རོགས་ཀྱི་ཚབ་བྱས་ཏེ་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན། དེ་རིང་གི་ཉིན་མོ་འདི་ནི་འཛམ་གླིང་གི་འགྲོ་བ་མིའི་རང་དབང་དང་ཐོབ་ཐང་ལ་ཐུགས་ཁུར་དང་རྒྱབ་སྐྱོར་གནང་མཁན་ཚོ་ལ་བརྟེན་ནས་བྱུང་བ་ཞིག་ཡིན་ལ། རང་དབང་གི་སྡིངས་ཆ་འདི་བརྒྱུད་ནས་རང་གི་ཆེས་ཡ་ང་བའི་མྱངས་ཚུལ་ངོ་སྤྲོད་ཞུ་རྒྱུའི་སྐལ་བ་ལྡན་པར་བཤད་མི་ཤེས་དགའ་སྤོབས་སྐྱེས་སོང་ཞེས་སོགས་གཏམ་བཤད་གནང་འདུག
ཇི་ནི་ཝའི་འགྲོ་བ་མིའི་ཐོབ་ཐང་དང་དམངས་གཙོ་ལྷན་ཚོགས་ནི། ཚོགས་སྡེ་ ༢༥་ཐུན་མོང་གིས་ ༢༠༠༩ ལོར་གསར་དུ་བཙུགས་པའི་གཞུང་འབྲེལ་མ་ཡིན་པའི་འགྲོ་བ་མིའི་ཐོབ་ཐང་གི་ལྷན་ཚོགས་ཤིག་ཡིན་པ་རེད།