འབྲུག་སྒྲ་དང་དགེ་འཕེལ་གཉིས་ཏིག་ཡཱང་བཙོན་ཁང་དུ་བསྐྱལ་འདུག

ཉེ་ཆར་ཁྲིམས་ཐག་བཅད་པའི་གྲྭ་འབྲུག་སྒྲ་དང་དགེ་འཕེལ་གཉིས་ཟི་ཁྲོན་ཏིག་ཡཱང་བཙོན་ཁང་དུ་བསྐྱལ་ཡོད་པ་དང་། ནང་མིར་ཐུག་འཕྲད་ཐེངས་གཅིག་ཀྱང་བྱེད་བཅུག་མེད་པ་མ་ཟད། ཐེངས་ཁ་ཤས་ཁྱིམ་མི་ཚོས་སྒོར་མོ་སྤྲད་པ་དེ་ཚོ་ཁོང་གི་ལག་ཏུ་འཕྲོད་མི་འདུག
དེ་ཡང་འདི་ག་རླུང་འཕྲིན་ཁང་གི་གསར་འགོད་པ་ཀུན་བཟང་བསྟན་འཛིན་གྱིས་གནས་ཚུལ་བཏང་བ་ལྟར་ན། ཉེ་ཆར་རྒྱ་ནག་གིས་རྔ་བ་ཕྱོགས་ཀྱི་བོད་མི་བཅུ་ཙམ་ལ་ཁྲིམས་ཐག་བཅད་པའི་ཁོངས་ནས་རྔ་བ་ཀི་རྟི་དགོན་པའི་དགེ་འདུན་པ་འབྲུག་སྒྲ་ལགས་ཟི་ཁྲོན་ཏིག་ཡཱང་བཙོན་ཁང་དུ་བསྐྱལ་ཡོད་པ་དང་ཁོང་གི་ནད་གཞི་ཇེ་སྡུག་དུ་སོང་ཡོད་འདུག
དེ་བཞིན་རྔ་པ་ཀིརྟི་དགོན་པའི་གྲྭ་དགེ་འཕེལ་ལགས་ཀྱང་ཟི་ཁྲོན་ཏིག་ཡཱང་བཙོན་ཁང་དུ་བསྐྱལ་ཡོད་པ་དང་། ཁོང་གི་ཁྱིམ་མི་རྣམས་ཀྱིས་སྔ་ཕྱིར་ཐེངས་ཁ་ཤས་ཁོང་ལ་ལག་དངུལ་བསྐུར་ཡོད་ཀྱང་། གྲྭ་དགེ་འཕེལ་ལགས་ཀྱི་ལག་ཏུ་དངུལ་སྐར་མ་གཅིག་ཀྱང་འཕྲོད་མེད་པ་མ་ཟད། ད་དུང་རྒྱ་སྐད་རྒྱབ་མཁན་མི་སུ་ཡིན་གསལ་ཁ་མེད་མཁན་ཞིག་གིས་ཁྱིམ་ནང་དུ་ཡང་བསྐྱར་ཁ་པར་འབྱོར་ཏེ་དངུལ་བསྐུར་སའི་ཨང་གྲངས་སོགས་བཤད་ནས་གྲྭ་དགེ་འཕེལ་ལགས་ཀྱི་དངུལ་རྫོགས་འདུག་པས་དངུལ་སྐྱེལ་དགོས་ལུགས་བརྗོད་འདུག
རྒྱ་གཞུང་གི་འབྲེལ་ཡོད་ལས་བྱེད་ཀྱིས་ཁྱིམ་ཐོ་ནང་ཡོད་པའི་མི་རྣམས་དགེ་འཕེལ་ལགས་ཐུག་འཕྲད་ཆེད་དུ་ཡོང་ན་འགྲིག་རྒྱུ་ཡིན་ཁུལ་བརྗོད་ཡོད་ནའང་ད་བར་དུ་མི་སུ་གཅིག་ཁོང་དང་ཐེངས་གཅིག་ཀྱང་དངོས་སུ་ཐུག་འཕྲད་བྱེད་བཅུག་མི་འདུག
གྲྭ་དགེ་འཕེལ་ལགས་ནི་ཉེ་ཆར་༢༠༡༦་ལོའི་ཟླ་༡༢་ཚེས་༦་ཉིན་རྔ་བ་རང་སྐྱོང་ཁུལ་གྱི་ལྟེ་གནས་འབར་ཁམས་འབྲིང་རིམ་མི་མང་ཁྲིམས་ཁང་གིས་རྔ་བ་ཕྱོགས་ཀྱི་བོད་མི་ཁག་ཅིག་དང་མཉམ་དུ་བོད་དོན་ཆབ་སྲིད་ཀྱི་གནད་དོན་ཡོད་པའི་ཉེས་མིང་འོག་དུས་བཀག་འདྲ་མིན་གྱི་བཙོན་འཇུག་གི་ཁྲིམས་ཐག་བཅད་པའི་ཁྲོད་ཁོང་ལ་མི་ལོ་༡༢་རིང་གི་ཁྲིམས་ཐག་བཅད་ཡོད་པ་རེད།
རྔ་བ་ཀིརྟི་དགོན་པའི་གྲྭ་འབྲུག་སྒྲ། རང་ལོ་༥༠ ཡིན་པ་ཁོང་ལ་ལོ་༡༤་བཙོན་འཇུག་ཁྲིམས་ཐག་བཅད་ཡོད་འདུག དེ་མིན་ཕྱི་ལོ་༢༠༠༨ ལོར་ཁོང་འཛིན་བཟུང་གིས་ལོ་༡ དང་ཟླ་བ་༤ ལ་བཙོན་འཇུག་ཁྲིམས་ཐག་བཅད་པའི་ཆབ་སྲིད་བཙོན་ཟུར་ཞིག་ཡིན་པ་དང། ཁོང་གི་ཕ་ཡུལ་རྔ་བ་རྫོང་སོ་རུ་མ་ནས་ཡིན།
དོན་དངོས་སུ་བོད་མི་དེ་ཚོས་༢༠༡༥ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་ལོ་བརྒྱད་བཅུ་ཐམ་པར་ཕེབས་པའི་སྐལ་བཟང་དུས་སྐབས་སུ་བོད་མི་ཚང་མས་རྣམ་པའི་འདྲ་མིན་གྱི་སྒོ་ནས་སྲུང་བརྩི་ཞུས་པའི་སྐབས་ཁོང་ཚོས་ཀྱང་གྱ་སྟོན་གྱི་རྟེན་འབྲེལ་མཚོན་ཆེད་སྤྲོ་སྐྱིད་བཏང་བའི་རྐྱེན་གྱིས་འཛིན་བཟུང་བྱས་བ་ཞིག་རེད་འདུག།   

གསར་འགོད་པ་གུ་རུ་ཆོས་སྐྱིད་དང་། རིག་ལྡན་སྒྲོལ་མ།