ཐའེ་ལྦན་སྲིད་གཞོན་ཟུར་པས་༸གོང་ས་མཆོག་དང་མཇལ་འཕྲད།

༄༅༎ཐའེ་ལྦན་གྱི་སྲིད་འཛིན་གཞོན་པ་ཟུར་པ་ལྕམ་ལུའུ་ཤུའུ་ལན་གྱིས་ཁ་ས་གཟའ་པ་སངས་ཉིན་རྒྱ་གར་རྒྱལ་ས་ལྡི་ལིར་༧གོང་ས་སྐྱབས་མགོན་ཏ་ལའི་བླ་མ་མཆོག་དང་མཇལ་འཛོམས་ཞུས་འདུག ཐའེ་ལྦན་གྱི་དབུས་གསར་ལས་ཁང་གིས་གནས་ཚུལ་སྤེལ་བར་གཞིགས་ན།  ཐའེ་ལྦན་གྱི་སྲིད་འཛིན་གཞོན་པ་ཟུར་པ་ལྕམ་ལུའུ་ཤུད་ལན་གྱིས་དུས་ཡུན་སྐར་མ་དགུ་བཅུའི་རིང་༧གོང་ས་སྐྱབས་མགོན་ཆེན་པོ་མཆོག་དང་མཇལ་འཛོམས་བཀའ་མོལ་ཞུས་པའི་ནང་། ཉེ་དུས་ཐའེ་ལྦན་གྱི་སྲིད་འཛིན་འོས་འདེམས་ནང་དམངས་གཙོ་ཡར་ཐོན་ཚོགས་པར་འོས་གྲངས་འབུམ་བརྒྱད་ཀྱི་ཧེ་བག་ཐོག་ནས་འགྲན་རྩོད་ཕམ་ཉེས་བྱུང་ཡོད་ནའང་། ཕྱི་ལོ་༢༠༠༨་ལོའི་སྐབས་དང་བསྡུར་བ་ཡིན་ན་དམངས་གཙོ་ཡར་ཐོན་ཚོགས་པར་འོས་གྲངས་འབུམ་ཉི་ཤུ་་ཙམ་འཕར་སྣོན་བྱུང་བ་དེས་བར་ཁྱད་ཆུང་རུ་ཕྱིན་ཡོད་པ་དེའི་ཐོག་ནས་སྲིད་སྟེགས་སྟོབས་ཤུགས་ཁག་གཉིས་དོ་མཉམ་རུ་འགྲོ་བ་དེ་མངོན་ཐུབ་ཀྱི་ཡོད་ཅེས་༧གོང་ས་མཆོག་ལ་གླེང་མོལ་ཞུས་ཡོད་པ་དང་། ༧གོང་ས་མཆོག་གིས་ན་ནིང་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པའི་འོས་མི་མི་གསུམ་ནང་ནས་དམངས་ཀྱིས་ཐད་ཀར་བཀའ་བློན་ཁྲི་པ་ཞིག་བདམས་ཐོན་བྱུང་བར་བོད་མིས་དམངས་གཙོའི་ལག་བསྟར་བྱུང་བ་དེས་གང་ཉིད་བགྲེས་ཡོལ་གྱིས་ཐུགས་བློ་བདེ་པོ་འདུག་ཅེས་བཀའ་བསྩལ་འདུག གསར་ལས་ཁང་གིས་མུ་མཐུད་བཀོད་གསལ་ལ། ན་ནིང་༧གོང་ས་ཏ་ལའི་བླ་མ་མཆོག་གིས་གཞུང་འཛིན་དབང་ཆ་འོས་འདེམས་བྱུང་བའི་བཀའ་བློན་ཁྲི་པ་བློ་བཟང་སེང་གེ་མཆོག་དང་བོད་མིའི་སྒྲིག་འཛུགས་ལ་རྩིས་སྤྲོད་གནང་ཡོད་པ་ཡིན་ནའང་༧གོང་ས་ཏ་ལའི་བླ་མ་མཆོག་ནི་སྔར་བཞིན་བོད་མིའི་མཐུན་སྒྲིལ་གྱི་མཚོན་རྟགས་དེ་ཡིན་པ་རེད་ གཞན་ཡང་ལྕམ་ལུའུ་ཤུད་ལན་གྱིས་ལྗང་གུའི་༢༡་ཐའེ་ལྦན་མནའ་འབྲེལ་ཞེས་པ་གྲ་སྒྲིག་འཛུགས་འཆར་ལ་དུས་སྐབས་སྨིན་མཚམས་༧གོང་ས་ཏ་ལའི་བླ་མ་མཆོག་སླར་ཡང་ཐའེ་ལྦན་ལ་གདན་ཞུ་འབུལ་རྒྱུ་ཡིན་ལུགས་ཀྱང་བཀའ་མོལ་ཞུས་འདུག།