ཕ་རན་སུ་གཞུང་གིས་རྒྱ་ནག་ལ་བོད་དོན་འབོད་སྐུལ།

དེ་ཡང་ཟླ་བ་འདིའི་ཚེས་བཅུ་དགུ་ཉིན་ཕ་རན་སིའི་ཕྱི་སྲིད་ལས་ཁུངས་ནས་གསར་འགོད་གསལ་བསྒྲགས་ཤིག་གནང་ཡོད་པ་དེའི་ནང་། ཕ་རན་སིའི་རྒྱལ་ཁབ་འདི་བཞིན་འགྲོ་བ་མིའི་ཐོབ་ཐང་དང་། ཆོས་དད་རང་དབང་ལ་བརྩི་བཀུར་ཞུ་མཁན་ཞིག་ཡིན་སྟབས། རྒྱ་ནག་གཞུང་ནས་བོད་མིའི་ཆོས་དང་རིག་གཞུང་ལ་སྲུང་སྐྱོབ་དང་བརྩི་བཀུར་ཞུ་དགོས་པ་མ་ཟད་བོད་ནང་གི་དཀའ་ངལ་སེལ་ཐབས་སུ་༧གོང་ས་ཏཱ་ལའི་བླ་མ་མཆོག་དང་ལྷན་དུ་གྲོས་མོལ་གནང་དགོས་པའི་འབོད་སྐུལ་ཞུ་རྒྱུ་ཡིན་ཞེས་བཀོད་ཡོད་པ་རེད། ཡང་གོང་ཞུས་གསར་འགོད་བསྒྲགས་གཏམ་དེའི་ནང་མུ་མཐུད་ནས་བཀོད་པར་ལྟར་ན། མ་འོངས་པར་ཕ་རན་སི་དང་རྒྱ་ནག་གཞུང་དབར་ཆབ་སྲིད་ཀྱི་འབྲེལ་ལམ་བརྒྱུད་བོད་དོན་གླེང་སློང་གནང་རྒྱུ་ཡིན་པ་མ་ཟད། ཡུ་རོབ་སྤྱི་མཐུན་ཚོགས་པ་དང་རྒྱ་ནག་དབར་འབྲེལ་བ་གནང་སྐབས་སུའང་བོད་ཀྱི་གནད་དོན་མུ་མཐུད་ནས་གླེང་སློང་དང་དོ་སྣང་བྱེད་འཆར་ཡོད་ལུགས་ཀྱང་གསུངས་ཡོད་པ་རེད། རྩ་བའི་རྒྱ་ནག་གཞུང་ནས་ཕ་རན་སིའི་ཕྱི་སྲིད་ལས་ཁུངས་ཀྱི་བསྒྲགས་གཏམ་དེའི་ཐོག་ད་བར་འདི་བྱས་ལན་འདེབས་གང་ཡང་བྱས་མེད་ཀྱང་། ཉེ་ཆར་དབྱིན་ཇིའི་གཞུང་ནས་བོད་ནང་ཛ་དྲག་གནས་སྟངས་ཐོག་ཐུགས་འཚབ་ཆེན་པོ་ཡོད་ལུགས་གསུངས་པ་དེའི་ཐོག་རྒྱ་ནག་གཞུང་གི་ཕྱི་སྲིད་ལས་ཁུངས་ཀྱི་མགྲིན་ཚབ་མས་དབྱིན་ཇིའི་གཞུང་ནས་རྒྱ་ནག་གི་ནང་གི་སྲིད་བྱུས་ལ་ཐེ་བྱུས་བྱས་པ་ཞིག་རེད་ལ་སྐྱོན་བརྗོད་དེར་ངོས་ལེན་རྩ་བ་ནས་བྱེད་ཐབས་མེད་ཅེས་མི་འདོད་པའི་རྣམ་འགྱུར་བསྟན་ཡོད་པ་རེད།