བོད་ཡིག་གལ་ཆེན་པོ་རེད་ཅེས་བཀའ་གནང་སོང་།

༄༅། །བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ཁེ་ལི་ཕོར་ནི་ཡ་མངའ་སྡེའི་ནང་བསྐྱངས་པའི་ཉིན་གྲངས་བཞིའི་རིང་གི་མཛད་འཕྲིན་ཁག་ལེགས་པར་གྲུབ་རྗེས་དེ་རིང་ཕྱི་ཚེས་༢༡ཉིན་ཨ་རིའི་མེ་ཎི་སོ་ཊ་མངའ་སྡེའི་ནང་ཞབས་སོར་བདེ་བར་འཁོད་སོང་། སྐབས་དེར་གནམ་གཤིས་ཚ་ངར་ཆེ་ཙམ་ཡོད་ཀྱང་། ༸མགོན་པོ་གང་ཉིད་ནས་ཐུགས་བརྩེ་བ་ཆེན་པོས་མི་མང་གསེར་བང་སྒྲིག་སའི་ས་ཚིགས་ཡོངས་ལ་ཕེབས་ནས་ཞལ་མཇལ་དང་ཕྱག་དབང་གནང་ཡོད་པ་རེད། སྐབས་དེར་༸གོང་ས་མཆོག་ནས་སློབ་ཕྲུག་རྣམས་ལ་ང་ཚོ་བོད་པ་ཡིན་དུས་བོད་ཡིག་གལ་ཆེན་པོ་རེད་ཅེས་བཀའ་གནང་ཡོད་པ་རེད། ༸གོང་ས་མཆོག་ཁུལ་དེར་ཆིབས་བསྒྱུར་གནང་སྐབས་ས་གནས་བོད་མི་༤༠༠ཙམ་ནས་ལག་ཏུ་དཀར་གཙང་མཇལ་དར་དང་མེ་ཏོག་སོགས་འཁྱེར་ནས་ཕེབས་བསུ་ཞུས་ཡོད་པས་མ་ཚད། གཟའ་མཇུག་སློབ་གྲྭའི་སློབ་ཕྲུག་རྣམས་ནས་བཀྲ་ཤིས་ཞོལ་པ་དང་། ས་གནས་བོད་རིགས་རྒན་གཞོན་ཁག་ཅིག་ནས་རྒྱལ་གཞས་འཁྲབ་སྟོན་གྱི་ལམ་ནས་༸མགོན་པོ་གང་ཉིད་མངའ་སྡེའི་འདིའི་ནང་ཆིབས་བསྒྱུར་གནང་བར་དགའ་དད་སྤྲོ་གསུམ་གྱི་རྣམ་པ་གསལ་འདོན་གནང་ཡོད་པ་རེད།