ཨ་རིའི་གྲོས་ཚོགས་འོག་མའི་རྒྱ་ནག་ལས་དོན་ཐད་ཀྱི་ཆེད་འཛུགས་ཚོགས་ཆུང་གི་ཚོགས་གཙོ་འཕོ་འགྱུར་བྱུང་འདུག

ཨ་མི་རི་ཀའི་གྲོས་ཚོགས་འོག་མའི་འཐུས་མི་སྐུ་ཞབས་(John Moolenaar)་ལགས་དང་གྲོས་ཚོགས་འཐུས་མི་སྐུ་ཞབས་(Mike Gallager)་ལགས་གཉིས།

རྒྱ་ནག་དམར་ཤོག་གཞུང་དང་ཨ་རི་བར་གྱི་འགྲན་རྩོད་དང་འཐབ་ཇུས་ཐད་ཆེད་འཛུགས་གནང་བའི་ཨ་རིའི་གྲོས་ཚོགས་འོག་མའི་རྒྱ་ནག་ལས་དོན་ཐད་ཀྱི་ཆེད་འཛུགས་ཚོགས་ཆུང་གི་ཚོགས་གཙོ་སྐུ་ཞབས་(Mike Gallagher)་ལགས་ཀྱིས་དགོངས་ཞུ་གནང་རྒྱུ་བསྒྲགས་པའི་རྗེས། ཟླ་གསུམ་པའི་ཚེས་༢༦ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་མཆོག་གིས། ཨ་རིའི་གྲོས་ཚོགས་འོག་མའི་རྒྱ་ནག་ལས་དོན་ཐད་ཀྱི་ཆེད་འཛུགས་ཚོགས་ཆུང་གི་ཚོགས་གཙོར་སྐུ་ཞབས་(John Moolenaar)་ལགས་བསྐོ་བཞག་གནང་འདུག་པ་དང་།

I am grateful for the opportunity to be the next chair of the @committeeonccp. I look forward to working with @congressmanRaja and our committee colleagues in the weeks and months ahead. Together, we will help prepare America to win the competition against the CCP. https://t.co/jbK2Fj7V6u

— Rep. John Moolenaar (@RepMoolenaar) March 25, 2024

བསྐོ་བཞག་བྱུང་བའི་རྗེས་སུ་གྲོས་ཚོགས་ཀྱི་འཐུས་མི་སྐུ་ཞབས་མུ་ནེ་ནར་ལགས་ཀྱིས་སྤྱི་བསྒྲགས་ཞིག་སྤེལ་གནང་ཡོད་པ་དེའི་ནང་། གྲོས་ཚོགས་འོག་མའི་ཚོགས་གཙོ་མཆོག་དང་རྒྱ་ནག་ལས་དོན་ཐད་ཀྱི་ཆེད་འཛུགས་ཚོགས་ཆུང་གི་ཚོགས་མི་རྣམས་ཀྱིས་ཁོང་ལ་ཐུགས་རེ་ཆེན་པོས་ལས་གནས་འདིར་བསྐོ་བཞག་གནང་བར་ཐུགས་རྗེ་ཆེ་ཞུ་རྒྱུ་ཡིན། ཁྱེད་རྣམས་ཀྱིས་ཐུགས་རེ་གནང་བ་བཞིན་ངོས་རང་ནས་རྣམ་པ་ཚོ་དང་མཉམ་རྒྱ་ནག་དམར་ཤོག་ཚོགས་པར་གདོང་ལེན་བྱེད་རྒྱུའི་ཆོད་སེམས་བརྟན་པོ་ཡོད་ཅེས་དང་། ཚོགས་ཆུང་འདིའི་ཚོགས་གཙོ་ཟུར་པ་སྐུ་ཞབས་(Mike Gallager)་ལགས་ཀྱིས་ཀྱང་ད་བར་རྒྱལ་ཁབ་ཀྱི་དམག་དོན་ལས་དོན་དང་། གཞན་ཡང་ཚོགས་ཆུང་འདིའི་ལས་དོན་འགྲུབ་ཐབས་སུ་སྐུ་ངལ་ཆེན་པོ་སྐྱོན་པའི་མཛད་རྗེས་ལ་རྗེས་སུ་ཡི་རངས་དང་སྦྲགས་ཐུགས་རྗེ་ཆེ་ཞུ་གི་ཡིན་ཞེས་གསུངས་འདུག

Chairman @RepGallagher statement on appointment of @RepMoolenaar to lead the Select Committee: pic.twitter.com/dLsuWV3dSR

— Select Committee on the Chinese Communist Party (@committeeonccp) March 25, 2024

གོང་བརྗོད་དམིགས་བསལ་ཚོགས་ཆུང་དེའི་ཚོགས་གཙོ་ཟུར་པ་(Mike Gallagher)་ལགས་ནི་བོད་དོན་ལ་རྒྱབ་སྐྱོར་གནང་མཁན་གྱི་གྲོས་ཚོགས་འཐུས་མི་ཞིག་ཆགས་ཀྱི་ཡོད་པ་དང་། ཁོང་རིང་མིན་སྤྱི་ཟླ་༤བའི་ཚེས་༡༩ཉིན་གྲོས་ཚོགས་ཀྱི་འཐུས་མི་ནས་རྩ་དགོངས་ཞུ་རྒྱུ་ཡིན་པ་བསྒྲགས་ཡོད་པ་རེད།
དེ་བཞིན་དུ་གྲོས་ཚོགས་ཀྱི་ཚོགས་གཙོ་(Mike Johnson)་ལགས་ཀྱིས་ཀྱང་དམིགས་བསལ་ཚོགས་ཆུང་འདིའི་ཚོགས་གཙོ་(Moolenaar)་ལགས་ཀྱིས་གནང་བ་ཡིན་ན་དམིགས་བསལ་ཞིག་ཆགས་ཀྱི་ཡོད་པ་ནི། ཁོང་ལ་གཞུང་སྒེར་གཉིས་ཀྱི་ལས་གནས་ཀྱི་ཉམས་མྱོང་དང་ཤེས་ཡོན་གྱི་རྒྱབ་ལྗོངས། རྩ་དོན་བཅས་ལ་ཆབ་སྲིད་ཚོགས་པ་གཉིས་ཀའི་གྲོས་ཚོགས་འཐུས་མིའི་གུས་བརྩི་ཐོབ་ཡོད་ཅེས་གདེང་འཇོག་གནང་འདུག
གསར་དུ་བསྐོ་བཞག་བྱུང་བའི་གྲོས་ཚོགས་འཐུས་མི་སྐུ་ཞབས་ཇོན་མུ་ལེ་ནར་ལགས་ཟླ་སྔོན་མའི་ནང་ཨ་རིའི་ཆབ་སྲིད་ཚོགས་པ་གཉིས་ཀའི་གྲོས་ཚོགས་འོག་མའི་འཐུས་མིའི་སྐུ་ཚབ་ཐེ་ཝན་ནང་འཚམས་གཟིགས་ཕེབས་མཁན་གྲས་སུའང་ཡོད་པ་དང་། འགན་དབང་ཆེ་བའི་གྲོས་ཚོགས་ཀྱི་དམིགས་བསལ་ཚོགས་ཆུང་འདི་བཞིན་དེ་སྔ་ཕྱི་ལོ་༢༠༢༣ཕྱི་ཟླ་དང་པོའི་ནང་གསར་བཙུགས་གནང་བ་ཞིག་ཡིན་པ་དང་། ཚོགས་ཆུང་འདི་བརྒྱུད་ནས་རྒྱ་ནག་གིས་ཨ་རི་དང་རྒྱལ་སྤྱིའི་ནང་རྣོ་ངར་ཆེན་པོའི་ཐོག་ནས་གནོན་ཤུགས་སྤྲད་དང་སྤྲོད་བཞིན་པའི་ལས་འགུལ་ལ་གདོང་ལེན་ཤུགས་ཆེ་ཙམ་ཡོང་ཐབས་སུ་དམིགས་པ་ཞིག་ཡིན་འདུག

གསར་འགོད་པ། རིག་འཛིན་ཆོས་སྒྲོན། བོད་རྒྱལ།
རྩོམ་སྒྲིག་པ། ཚེ་བརྟན་རྣམ་རྒྱལ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།