རི་བོ་དགེ་ལུགས་པས་སྐྱབས་རྗེ་དགའ་ལྡན་ཁྲི་ཟུར་མཆོག་ལ་བཀྲིན་ཏང་རགས་དང་སྐྱབས་རྗེ་དགའ་ལྡན་ཁྲི་པ་གསར་པར་རྟེན་འབྲེལ་ཞུ་ཆེད་ཁྲི་གདན་ཟུར་རྣམ་གཉིས་ལ་བརྟན་བཞུགས་བསྟར་འབུལ་ཞུས་གནང་སོང་།

ཟླ་བ་འདིའི་ཕྱི་ཚེས་ ༢༧ ཉིན་རི་བོ་དགེ་ལུགས་པ་སྤྱིའི་ཐོག་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དགའ་ལྡན་ཁྲི་ཐོག་ཁང་དུ་འཇམ་མགོན་རྒྱལ་བའི་རྒྱལ་ཚབ་སྐྱབས་རྗེ་དགའ་ལྡན་ཁྲི་པ་ ༡༠༤ རྗེ་བཙུན་བློ་བཟང་བསྟན་འཛིན་མཆོག་དགའ་ལྡན་ཁྲི་པའི་མཛད་ཁྱུར་ཟིན་བར་བཀྲིན་ཏང་རགས་དང་འདི་ཚེས་ ༢༦ གསར་དུ་ཁྲི་འདོན་མངའ་གསོལ་གནང་བའི་སྐྱབས་རྗེ་དགའ་ལྡན་ཁྲི་པ་ ༡༠༥ རྗེ་བཙུན་བློ་བཟང་རྡོ་རྗེ་མཆོག་ལ་རྟེན་འབྲེལ་ཞུ་ཆེད་དགའ་ལྡན་ཁྲི་གདན་ཟུར་རྣམ་གཉིས་ལ་བརྟན་བཞུགས་བསྟར་འབུལ་ཞུས་གནང་སོང་ལ། ཐེངས་འདིའི་བརྟན་བཞུགས་ཀྱི་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་དགའ་ལྡན་ཕོ་བྲང་གི་སྐུ་ཚབ་ཀྱི་དབུས་པས་གདན་ས་གྲྭ་ཚང་ཁག་གི་མཁན་ལས་ཟུར་དང་བླ་སྤྲུལ་དགེ་བཤེས་དང་དགེ་འདུན་པ་དང་དེ་བཞིན་ས་གནས་ཀྱི་གནད་ཡོད་མི་སྣ་དང་ཕྱི་ནང་དད་ལྡན་པ་ཁག་གཅིག་བཅར་འདུག་ལ་སྐབས་དེར་དགའ་ལྡན་ཕོ་བྲང་གི་སྐུ་ཚབ་ཡང་སྟེང་རིན་པོ་ཆེ་མཆོག་གིས། ཐེངས་འདིར་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་གི་ཁྲི་འདོན་མཛད་སྒོར་དགའ་ལྡན་ཕོ་བྲང་གིས་བཀའ་གནང་བ་བཞིན་ཕོ་བྲང་གི་སྐུ་ཚབ་ཞུས་ཏེ་མཛད་སྒོ་ལ་བཅར་ཡོད་པས། མཛད་སྒོ་དང་བརྟན་བཞུགས་ནི་བཀྲིས་ཕུན་སུམ་ཚོགས་པ་ཧ་ལས་པ་བྱུང་སོང་བསམས་ཀྱི་འདུག་ཅེས་འདི་ག་རླུང་འཕྲིན་ཁང་ལ་གསུངས་བྱུང་།

སྐྱབས་རྗེ་དགའ་ལྡན་ཁྲི་གདན་ཟུར་རྣམ་གཉིས་ལ་བརྟན་བཞུགས་བསྟར་འབུལ་ཞུས་པའི་ཆོ་ག་དེ་ནི་མདོ་ལུགས་གནས་བརྟན་ཕྱག་མཆོད་དང་འབྲེལ་བའི་སྒོ་ནས་བརྟན་བཞུགས་བསྟར་འབུལ་ཞུས་གནང་ཞིང་བརྟན་བཞུགས་ཀྱི་རྡོ་རྗེ་སློབ་དཔོན་དགའ་ལྡན་ཤར་རྩེ་གྲྭ་ཚང་གི་མཁན་རིན་པོ་ཆེ་བྱང་ཆུབ་སངས་རྒྱལ་ལགས་ཀྱིས་མཎྜལ་ལྗགས་བཤད་དང་སྦྲགས་བརྟན་བཞུགས་བསྟར་འབུལ་ཞུས་གནང་སོང་ལ་སྐབས་དེར་བརྟན་བཞུགས་ཀྱི་ཐོག་བཅར་བའི་འབྲས་སྤུངས་བློ་གསལ་གླིང་གྲྭ་ཚང་གི་དབུ་མཛད་དགེ་བཤེས་ཨ་དགའ་ལགས་ཀྱི་བརྟན་བཞུགས་ཀྱི་གལ་གནད་རང་བཞིན་སྐོར་གསུང་དོན་ལ། ཁྲི་རིན་པོ་ཆེ་ནི་ང་ཚོ་རི་བོ་དགེ་ལུགས་པ་ཡོངས་ཀྱི་འཇམ་མགོན་རྒྱལ་བའི་རྒྱལ་ཚབ་རྗེ་རིན་པོ་ཆེ་མཆོག་གི་སྐུ་ཚབ་འདྲ་པོ་ཆགས་བསྡད་ཡོད་པས། ཁོང་ཉིད་སྐུ་ཚེ་ཡུན་དུ་བརྟན་ཆེད་དུ་བརྟན་བཞུགས་ཕུལ་ཡོད་ཅིང་། སྐྱེས་ཆེན་དམ་པ་རྣམས་སྐུ་ཚེ་ཡུན་དུ་བརྟན་པའི་ཐུགས་སྨོན་དང་འདུལ་བྱ་རྣམས་ནས་དེ་ལྟར་ཡོང་ཆེད་དུ་ཆོ་ག་དང་སྨོན་ལམ་གྱི་སྒོ་ནས་བརྟན་བཞུགས་ཕུལ་བ་ཡིན་ན་སྐུ་ཚེ་ཡུན་དུ་བརྟན་རྒྱུ་ནི། སྔོན་སངས་རྒྱས་ཞལ་བཞུགས་པའི་སྐབས་སུ་དེ་ལྟར་གནང་བ་དེ་དམིགས་བསལ་ཁྱད་པར་ཅན་ཞིག་ལ་བརྟེན་མུ་མཐུད་གནང་བཞིན་ཡོད་པ་གསུང་གནང་བྱུང་།

རི་བོ་དགེ་ལུགས་པའི་བསྟན་པའི་སྲོལ་འབྱེད་འཇམ་མགོན་བླ་མ་རྩོང་ཁ་པ་ཆེན་པོའི་མཆོག་གི་རྒྱལ་ཚབ་སྐྱབས་རྗེ་དགའ་ལྡན་ཁྲི་པ་ ༡༠༤ པ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་འདི་ལོ་ཕྱི་ལུགས་ལྟར་དགུང་གྲངས་ ༨༩ ལ་ཕེབས་ཡོད་པ་དང་སྐྱབས་རྗེ་དགའ་ལྡན་ཁྲི་པ་ ༡༠༥ རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་འདི་ལོར་ཕྱི་ལུགས་ལྟར་དགུང་གྲངས་ ༨༨ ལ་ཕེབས་ཡོད་པ་རེད་འདུག

གསར་འགོད་པ། པདྨ་དངོས་གྲུབ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།