༧གོང་ས་མཆོག་དང་བྷི་ཧར་མངའ་སྡེའི་སྤྱི་ཁྱབ་བློན་ཆེན་མཆོག་རྡོ་རྗེ་གདན་དུ་མཇལ་མོལ།

2020-01-08
གློག་འཕྲིན།
མཆན།
Share
པར་བཀོད།
༧གོང་ས་མཆོག་དང་བྷི་ཧར་མངའ་སྡེའི་སྤྱི་ཁྱབ་བློན་ཆེན་མཆོག་རྡོ་རྗེ་གདན་དུ་མཇལ་མོལ་སྐབས། ༢༠༢༠།༡།༨
༧གོང་ས་མཆོག་དང་བྷི་ཧར་མངའ་སྡེའི་སྤྱི་ཁྱབ་བློན་ཆེན་མཆོག་རྡོ་རྗེ་གདན་དུ་མཇལ་མོལ་སྐབས། ༢༠༢༠།༡།༨
OHHDL

རྒྱ་གར་བྷི་ཧར་མངའ་སྡེའི་སྤྱི་ཁྱབ་བློན་ཆེན་ནེ་ཊེ་ཤི་ཀུ་མར་མཆོག་དང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་རྣམ་གཉིས་རྡོ་རྗེ་གདན་དུ་མཇལ་མོལ་གནང་འདུག
ཕྱི་ལོ་༢༠༢༠་ལོའི་ཟླ་༡་ཚེས་ ༨ ་རེས་གཟའ་ལྷག་པའི་ཉིན། རྒྱ་གར་བྷི་ཧར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནེ་ཊེ་ཤི་ཀུ་མར་(Nitish Kumar)་མཆོག རྡོ་རྗེ་གདན་གྱི་དགའ་ལྡན་འཕེལ་རྒྱས་གླིང་གི་བཞུགས་གནས་ཕོ་བྲང་དུ་ཆེད་བཅར་གྱིས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དང་མཇལ་བཅར་ཞུས་ནས་དུས་ཡུན་ཆུ་ཚོད་ཕྱེད་ཀ་ཙམ་གྱི་རིང་མཇལ་མོལ་གནང་ཡོད་པ་དང་། སྐབས་དེར་༧གོང་ས་མཆོག་གིས། ཐུགས་བསྐྱེད་དམ་བཅའ་བཞིའི་སྐོར་ལ་གསུངས་ཞོར་དུས་རབས་བརྒྱ་ཕྲག་འགའ་ཤས་རིང་རྒྱ་གར་གྱི་དཔལ་ནཱ་ལེནྡྲ་རིག་གཞུང་ལྟེ་གནས་དེ་སློབ་གཉེར་ཁང་རྙིང་གྲས་དང་རྩེ་ཕུད་ཀྱི་གྲས་སུ་བསྡད་ཡོད། དེ་ནས་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ཧ་ཅང་མང་པོ་བྱུང་ཡོད་ལ་ཁོང་རྣམས་ནི་ཆོས་ཙམ་མིན་པར་སྤྱིར་སྟངས་ཤེས་ཡོན་གྱི་ཆ་ནས་ཀྱང་ཧ་ཅང་མཁས་པ་ཆེན་པོ་རེད། དེ་བས་རྒྱ་གར་གྱི་དཔལ་ནཱ་ལེནྡྲའི་རིག་གཞུང་ད་ལྟའི་དུས་རབས་འདིར་འབྲེལ་བ་ཆེན་པོ་ཡོད་པས་སླར་གསོ་གནང་རྒྱུ་དེ་ང་ཚོའི་ལས་འགན་ཡིན་པ་བཀའ་སྩལ་བ་དང་། དེ་ནས་ཐེངས་འདིའི་གནས་མཆོག་རྡོ་རྗེ་གདན་གྱི་ཆོས་འབྲེལ་རིང་མངའ་སྡེའི་གཞུང་དམངས་གཉིས་ཀྱིས་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུས་འདུག
ཐེངས་འདིར་དབུ་ཁྲིད་རྣམ་གཉིས་མཇལ་འཕྲད་སྐབས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་ཀྱང་ལྷན་བཅར་ཞུས་འདུག
ཡང་ད་རེས་དགའ་ལྡན་ཕོ་བྲང་ཁྱབ་ཁོངས་ཏཱ་ལའི་བླ་མ་དགེ་རྩ་ཚོགས་པ་ནས་རྡོ་རྗེ་གདན་ཁུལ་གྱི་ཉམ་ཐག་སྤྲང་པོ་ལྔ་སྟོང་ལྷག་ལ་ཟས་དང་དངུལ་གྱི་སྦྱིན་པ་རྒྱ་ཆེ་གཏོང་ཡོད་པ་ཏཱ་ལའི་བླ་མའི་དགེ་རྩ་ཚོགས་པའི་དྲུང་ཆེ་འཇམ་དཔལ་ལྷུན་གྲུབ་ལགས་ནས་ངོ་སྤྲོད་གནང་བྱུང་།

མཆན། (0)
Share
དྲ་གནས་ཆ་ཚང༌།