ཉག་ཆུ་རྫོང་གི་རི་ངོས་སུ་སླར་ཡང་མེ་སྐྱོན་ཤུགས་ཆེན་ཤོར་བཞིན་འདུག

ཕྱི་ལོ་ ༢༠༢༤ ཟླ་ ༡༢ ཚེས་ ༩ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༣་ཙམ་ལ། བོད་ནང་གི་ཉག་ཆུ་རྫོང་ཆུ་ཁ་གྲོང་རྡལ་གྱི་རི་ངོས་སུ། འདི་ལོའི་དགུན་ཁ་དང་བསྟུན་བསྐྱར་དུ་མེ་སྐྱོན་ཤོར་དེ་ཕྱི་ཚེས་ ༡༠ མེ་སྐྱོན་ད་དུང་གསོད་མ་ཐུབ་པར་ལྷག་ཡོད་པ་དང་། རླུང་ཤུགས་ཆེན་པོ་ཡིན་པ་དང་མེ་སྐྱོན་རི་ངོས་ཀྱི་གྲོང་ཚོ་ཁག་གི་ཉེ་འགྲམ་དུ་བསླེབ་ཉེར་ཡོད་སྟབས། རྒྱ་ནག་གཞུང་གིས་ཉེ་འཁོར་གྲོང་ཚོའི་མི་གྲངས་ ༡༠༠ ལྷག་ཉག་ཆུ་རྫོང་ཐོག་དུ་གནས་སྤོ་བྱས་ཡོད་པ་དང་། ད་ལྟའི་ཆར་མི་སྣར་ཤི་རྨས་དང་རྒྱུ་ནོར་ལ་གནོད་སྐྱོན་ཐེབས་པའི་གནས་ཚུལ་མེད་སྐོར། ས་གནས་ཀྱི་འབྲེལ་ཡོད་བོད་མི་ཞིག་ནས་འདི་ག་ཨེ་ཤི་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།

གོང་ཞུས་འབྲེལ་ཡོད་ནས་མུ་མཐུད་འགྲེལ་བརྗོད་གནང་དོན་ལ། མེ་སྐྱོན་ཤོར་རྗེས་རྒྱ་ནག་གཞུང་གི་འབྲེལ་ཡོད་མི་སྣ་ཆེད་གཏོང་བྱས་ཡོད་ན་ཡང་། ཕྱི་ཚེས་ ༡༠ ཉིན་གྱི་སྔ་དྲོ་མེ་སྐྱོན་ད་དུང་གསོད་ཐུབ་མེད་པར། མེ་སྐྱོན་མུ་མཐུད་ཤུགས་ཆེར་འབར་བཞིན་ཡོད་པ་དང་། མེ་སྐྱོན་ག་འདྲ་ཤོར་མིན་སོགས་ཤེས་རྟོགས་ཐུབ་ཀྱི་མེད་ན་ཡང་མེ་ཤོར་ས་དེ་སྔར་ལོ་ཤོར་སའི་ས་ཁུལ་དང་གཅིག་མཚུངས་ལྟ་བུ་ཡིན་སྐོར་འགྲེལ་བརྗོད་གནང་བྱུང་ལ། ཉག་ཆུ་རྫོང་གི་རི་ངོས་སུ་ད་ཐེངས་ཙམ་མ་ཡིན་པར། འདི་ལོའི་ཕྱི་ཟླ་ ༣ ནང་ས་གནས་དེ་དང་ཁད་ཉེ་བའི་མགར་ར་གྲོང་ཚོའི་རི་ངོས་སུ་མེ་སྐྱོན་ཤོར་དེ། གྲོང་ཚོའི་དུད་ཁྱིམ་ཁག་ཅིག་མེས་འཚིག་ཏེ་ཡུལ་མིའི་རྒྱུ་ནོར་ལ་གྱོང་གུད་དང་། བདུན་ཕྲག་གཉིས་ཙམ་རིང་མེ་གསོད་མ་ཐུབ་པར་ལྷག་པའི་གནས་ཚུལ་བྱུང་ཡོད་པ་རེད།

ཉག་ཆུ་རྫོང་ནི་རི་མཐོ་གཡང་གཟར་དང་ཤིང་ནགས་སྟུག་པོ་ཡོད་པའི་གནས་ཤིག་ཡིན་སྟབས། ལོ་ལྟར་མེ་སྐྱོན་གྱི་གནས་ཚུལ་ཐོན་གྱི་ཡོད་པ་དང་། ཕྱི་ལོ་༢༠༢༣ ལོར་ཡུལ་དེའི་ནག་ཆུ་མར་རུ་མཚོ་གྲོང་སྡེའི་ཐང་འཇོར་ནགས་ཚལ་ལ་མེ་སྐྱོན་ཤོར་ནས་ཉིན་གསུམ་ལྷག་ཙམ་རིང་མེ་གསོད་ཐུབ་མེད་པའི་གནས་ཚུལ་བྱུང་ཡོད་པ་རེད་ལ། ཐེངས་འདིར་རྒྱ་ནག་གཞུང་འབྲེལ་ཅེ་མོ(极目)གསར་ཁང་ཟེར་བ་ཞིག་གིས། རི་ངོས་ཀྱི་མེ་སྐྱོན་གསོད་མཁན་ལ་གཞུང་ངོས་ནས་མི་གྲངས་ ༣༠༠ ལྷག་ཡོད་པའི་མེ་གསོད་རུ་ཁག་གྲ་སྒྲིག་གིས་ཆེད་གཏོང་དང་། ས་གནས་ཀྱི་གཞུང་ལམ་སོགས་མུ་མཐུད་ཤར་གཏོང་གིས་བཀག་བསྡོམས་རིགས་བྱས་མེད་པ་བཀོད་འདུག་ལ། ཉག་ཆུ་རྫོང་གནམ་གཤིས་བརྟག་དཔྱད་ཁང་གིས་ཕྱི་ཟླ་ ༡༢ པའི་ཚེས་ ༨ ནས་ ༡༡ བར་ཡུལ་དེར་རླུང་ཤུགས་ཆེན་པོ་ལྡང་རྒྱུ་ཡིན་པའི་ཉེན་བརྡ་བཏང་བ་སོགས་བྱུང་འདུག

གསར་འགོད་པ། ལོ་ཡག་བཀྲ་ཤིས།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།