༧སྐྱབས་རྗེ་ཁྲིག་སེ་རིན་པོ་ཆེར་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་པདྨ་ཤྲི་འབུལ་རྒྱུའི་ནང་མཚན་འདོན་ཞུས་འདུག

2023.01.25
Share on WhatsApp
Share on WhatsApp
༧སྐྱབས་རྗེ་ཁྲིག་སེ་རིན་པོ་ཆེར་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་པདྨ་ཤྲི་འབུལ་རྒྱུའི་ནང་མཚན་འདོན་ཞུས་འདུག ༧སྐྱབས་རྗེ་ཁྲིག་སེ་རིན་པོ་ཆེ།
@Thiksey Rinpochey

ལ་དྭགས་ཀྱི་བླ་ཆེན་སྐྱབས་རྗེ་ཁྲིག་སེ་རིན་པོ་ཆེ་མཆོག་ཕྱི་ལོ་༢༠༢༣ལོའི་(Padma Shri)་ཞེས་རྒྱ་གར་གཞུང་གི་སྤྱི་དམངས་ཀྱི་གཟེངས་རྟགས་མཐོ་ཤོས་བཞེས་མཁན་གྱི་གྲས་སུ་མཚན་འདོན་ཞུས་འདུག
ལོ་ལྟར་རྒྱ་གར་གཞུང་གིས་ཕྱི་ཟླ་༡ཕྱི་ཚེས་༢༦སྟེ། རྒྱ་གར་སྤྱི་མཐུན་རྒྱལ་ཁབ་དབུ་བརྙེས་པའི་ཉིན་མོ་དང་བསྟུན། རྒྱ་གར་ནང་ལ་སྤྱི་ཚོགས་ཞབས་ཞུ་དང་སྲི་ཞུ་ལས་དོན། དེ་བཞིན་ཆོས་ལུགས་མཐུན་སྒྲིལ་དང་། སྤྱི་ཚོགས་དང་མང་ཚོགས་ཀྱི་བདེ་དོན་ཐོག་གཟེངས་སུ་ཐོན་པའི་ཕྱག་ལས་གནང་མཁན་ཁག་ཅིག་ལ་རྒྱ་གར་གྱི་སྤྱི་དམངས་ཀྱི་གཟེགས་རྟགས་(Padma Vibhushan)་དང་། (Padma Bhushan) དེ་བཞིན་(Padma Shri)་བཅས་ཀྱི་གཟེངས་རྟགས་འབུལ་སྲོལ་ཡོད་པ་དེའི་ཆ་ཤས་ཤིག་ཡིན་པ་རེད།
རིན་པོ་ཆེ་མཆོག་གིས་ད་བར་ལ་དགས་ཡུལ་མི་ཚོར་ཆོས་ལུགས་མཐུན་སྒྲིལ་གཙོས་སྤྱི་ཚོགས་ཕན་བདེའི་ཕྱག་ལས་མང་དག་ཞིག་གནང་ཡོད་ལ། རྒྱ་གར་གྱི་ཆབ་སྲིད་སྡིངས་ཆ་མི་འདྲ་མང་པོའི་ནང་འགན་འཁུར་གྱི་ཕྱག་ལས་གནང་ཡོད་པར་མ་ཟད། ལ་དྭགས་མང་ཚོགས་ལ་འཕྲད་བཞིན་པའི་བཀའ་སྡུག་གང་མང་སེལ་རྒྱུར་ཞབས་འདེགས་ཞུས་གནང་ཡོད་འདུག ལྷག་པར་དུ་རིན་པོ་ཆེ་མཆོག་གིས་ཕྱི་ལོ་༡༩༩༩ནས་༢༠༠༢བར་རྒྱ་གར་གི་གྲོས་ཚོགས་གོང་མའི་ནང་གྲོས་ཚོགས་འཐུས་མི་ཡང་གནང་མྱོང་ཡོད་པ་རེད།


གསར་འགོད་པ། བསྟན་འཛིན་བདེ་སྐྱིད། སྐལ་ལྡན་བློ་གྲོས།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།

མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎