རྒྱ་གར་གྱི་རྒྱལ་ས་ལྡི་ལིར་ཚོགས་པའི་བོད་ཀྱི་དུས་སྟོན་སྟེང་ཨ་རིའི་གཞུང་ཚབ་པ་ཕེབས་ནས་བོད་དོན་རྒྱབ་སྐྱོར་གྱི་གཏམ་བཤད་གནང་འདུག

དེ་ཡང་རྒྱ་གར་གྱི་རྒྱལ་ས་ལྡི་ལིར་ཚོགས་པའི་བོད་ཀྱི་དུས་སྟོན་སྟེང་རྒྱ་གར་ནང་བཅའ་སྡོད་ཨ་མི་རི་ཀའི་གཞུང་ཚབ་ཆེན་མོ་(Eric Garcetti)་ལགས་སྐུ་མགྲོན་གཙོ་བོར་ཕེབས་ནས་ཨ་རིའི་གཞུང་གིས་བོད་ཀྱི་རིག་གཞུང་ཙམ་མ་ཡིན་པར། བོད་ཀྱི་རིག་གཞུང་གིས་མཚོན་པའི་ཞི་བདེ་དང་། སྙིང་རྗེ་སོགས་ཀྱི་རིན་ཐང་རྣམས་ལ་ངོས་འཛིན་དང་དེ་དག་སྲུང་སྐྱོབ་སླད་རྒྱབ་སྐྱོར་གནང་གི་ཡོད་པ་གསལ་སྟོན་དང་སྦྲགས། རྒྱ་ནག་གཞུང་གིས་བོད་ཀྱི་ཆོས་དང་། རིག་གཞུང་། སྐད་ཡིག་མི་རིགས་ཀྱི་ངོ་བོ་དང་བཅས་བ་རྩ་མེད་དུ་གཏོང་ཐབས་བྱེད་བཞིན་པའི་སྲིད་ཇུས་ལ་སྐྱོན་བརྗོད་གནང་བ་དང་། ཨ་མི་རི་ཀས་བོད་ཀྱི་རིག་གཞུང་སྲུང་སྐྱོབ་རྒྱུན་འཛིན་ལ་སྔར་ལྷག་རྒྱབ་སྐྱོར་གནང་རྒྱུ་ཡིན་པ་ནན་བརྗོད་གནང་ཡོད་འདུག ད་དུང་ཁོང་གིས་སྤྱི་ནོར་༧གོང་ས་ཏཱ་ལའི་བླ་མ་མཆོག་གི་དབུ་ཁྲིད་ལམ་སྟོན་ལ་བསྔགས་བརྗོད་དང་། དེ་ནི་འཛམ་གླིང་ཡོངས་ལ་བློ་སྤོབས་དང་སྙིང་སྟོབས་ཀྱི་འབྱུང་ཁུངས་ཤིག་ཡིན་པ་སོགས་གསུངས་ཡོད་འདུག

སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ཀྱིས། ཨ་རིའི་རོགས་ཚོགས་དང་། བོད་ཀྱི་ཐེབས་རྩ། འཚེ་མེད་ཞི་བའི་ཐེབས་རྩ་ཁང་བཅས་མཉམ་འབྲེལ་ཐོག་ད་རེས་བོད་ཀྱི་དུས་སྟོན་གོ་སྒྲིག་ཞུ་ཐུབ་པར་དགའ་ཚོར་ཆེན་པོ་བྱུང་ཚུལ་དང་། བཙན་བྱོལ་བོད་མི་རྣམས་རྒྱ་གར་གྱི་མངའ་སྡེ་བཅུ་དང་དབུས་གཞུང་གི་ཐད་འཛིན་ས་ཁུལ་གཉིས་ཚུད་པའི་ས་གནས་ཁག་༣༧ནང་ཁྱབ་ཡོད་པ་གསལ་བཤད་གནང་། ད་དུང་ཁོང་གིས་རྒྱ་ནག་གཞུང་གིས་བོད་ཀྱི་རིག་གཞུང་དང་། སྐད་ཡིག ཆོས་ལུགས། ཁོར་ཡུག་བཅས་བ་མུ་མཐུད་དུ་གཏོར་བཤིག་གཏོང་བཞིན་ཡོད་ནའང་། བཙན་བྱོལ་ནང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་ཀྱི་ཆོས་དང་རིག་གཞུང་སླར་གསོ་རྒྱུན་འཛིན་གནང་ཐུབ་པ་བྱུང་ཡོད་པ་སོགས་གསུངས་འདུག
དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷན་ཁང་གིས་གོ་སྒྲིག་གནང་ནས་ཕྱི་ཟླ་དགུ་པའི་ཚེས་༣་ནས་འགོ་བཙུགས་ཀྱིས་ཉིན་གྲངས་གསུམ་རིང་། བོད་ཀྱི་ཁྱད་ནོར་། བྱམས་སྙིང་རྗེ་དང་རིག་གཞུང་དུས་སྟོན་ཞེས་སྲུང་བརྩི་ཞུས་ཡོད་པ་ལྟར། དུས་སྟོན་སྐབས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་དང་། རྒྱ་གར་གྱི་གཞུང་ཚབ་ཆེན་མོ་བ་ཟུར་པ་སྐུ་ཞབས་(Dilip Sinha)་བོད་གནས་མཁས་པ་སྐུ་ཞབས་(Cladue Arpi)་རྒྱ་གར་གྱི་དམག་སྤྱི་ཟུར་པ་(Vinod Bhatia)་བཅས་ཀྱིས་(Relevance of Tibet to India)་བོད་འདི་བཞིན་རྒྱ་གར་ལ་སྐབས་བབ་ཀྱི་འབྲེལ་བ་ཞེས་པའི་བརྗོད་གཞིའི་ཐོག་གླེང་མོལ་གནང་ཡོད་འདུག་ལ། སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། རྒྱ་ནག་གིས་བོད་ཐོག་ལ་འགྲེལ་བཤད་ལོག་པ་རྒྱག་བཞིན་པའི་གནད་དོན་ཐོག་ང་ཚོས་ཨ་རི་དང་མཉམ་གདོང་ལེན་བྱེད་བཞིན་ཡོད་ཅེས་གསུངས་པ་དང་། རྒྱལ་ཁབ་གཞན་ཚོས་ཀྱང་ཨ་རི་ལྟར་བོད་དོན་ཁྲིམས་ཡིག་གཏན་འབེབས་གནང་དགོས་བའི་འབོད་སྐུལ་གནང་ཡོད་པ་རེད།
རྒྱ་གར་གྱི་གཞུང་ཚབ་ཆེན་མོ་བ་ཟུར་པ་སྐུ་ཞབས་དི་ལིཔ་སི་ན་ཡིས། དེ་སྔ་ཡིན་ན་འཕགས་བོད་ས་མཚམས་ནི་སྲུང་སྐྱོབ་བདེ་འཇགས་ཡག་ཤོས་ཞིག་ལ་ངོས་འཛིན་བྱེད་ཀྱི་ཡོད་པ་རེད། འོན་ཀྱང་ད་ཆ་རྒྱ་ནག་གིས་བོད་ས་བཟུང་སྟབས་ས་མཚམས་ཀྱི་སྲུང་སྐྱོབ་ལ་ཉེན་ཁ་ཆེ་ཤོས་ཞིག་ཏུ་གྱུར་ཡོད་ཅེས་གསུངས་འདུག ཁོང་གིས་ཉེ་བའི་ཆར་བོད་དང་འབྲེལ་བའི་དཔེ་དེབ་ཞིག་ཀྱང་བརྩམས་ཡོད་འདུག

དེ་དང་ཕྱོགས་མཚུངས་རྒྱ་གར་གྱི་དམག་སྤྱི་ཟུར་པ་(Vinod Bhatia)་ཡིས། ད་ལྟའི་མི་རབས་གསར་པ་ཚོས་དེ་སྔ་ཕྱི་ལོ་༡༩༦༢ལོའི་དམག་འཁྲུག་སྐོར་བརྗེད་ཟིན་ཡོད་ཀྱི་རེད། འོན་ཀྱང་ལོ་ཤས་ནས་ལ་དྭགས་ཀྱི་གྷལ་ཝན་མངའ་ཁུལ་དུ་རྒྱ་ནག་གི་དམག་མིའི་སིམ་འཛུལ་གྱིས་གདོང་ཐུག་བྱུང་བའི་གནས་ཚུལ་ད་ལྟའང་གསལ་པོ་ཡོད་རེད་ཅེས་གསུངས་པ་དང་སྦྲགས། རྒྱ་ནག་གིས་མ་འོངས་བའི་ལོ་བཅུ་ཕྲག་གཅིག་གཉིས་ཙམ་ནང་དམག་འཁྲུག་ཁག་དྲུག་ཙམ་རྒྱག་རྒྱུའི་སྲིད་བྱུས་ད་ལྟ་ནས་འཛིན་གྱི་ཡོད་ལུགས་དཔྱད་ཞིབ་གནང་བའི་ནང་། ཐེ་ཝན་དང་། ལྷོ་རྒྱ་ནག་རྒྱ་མཚོ། ཕྱི་སོག་སོགས་གང་ལྟར་རྒྱ་ནག་གི་སྲིད་བྱུས་ནི་ཐོག་མར་ས་ཆའི་བདག་དབང་ཡོད་ཚུལ་བཤད་ནས་རིམ་པས་བཙན་བཟུང་བྱེད་རྒྱུའི་སྲིད་ཇུས་འཛིན་གྱི་ཡོད་པ་སོགས་གསུངས་འདུག

སྤྱི་ཚེས་༤ཉིན་བོད་ཀྱི་དུས་སྟོན་གྱི་ཉིན་གཉིས་པར་བཀའ་བློན་ཁྲི་ཟུར་ཟམ་གདོང་རིན་པོ་ཆེ་ཡིས་བདེ་སྐྱིད་ཀྱི་སྐོར་ལ་བཀའ་སློབ་སྩལ་སྐབས། བདེ་སྐྱིད་ངོ་མ་ནི་སྡུག་བསྔལ་གྱི་རྒྱུ་རུ་མི་འགྲོ་བ་དང་། བདེ་སྐྱིད་ངོ་མ་ནི་སེམས་ཀྱི་འཁྱེར་སོ་དང་བསམ་བློའི་འཁྱེར་སོ་ལ་བརྟེན་ནས་བྱུང་པ། བདེ་སྐྱིད་འཚོལ་བ་ལ། ཐོག་མར་སྡུག་བསྔལ་གྱི་རྒྱུ་འཚོལ་ཞིབ་བྱས་ཏེ། སྡུག་བསྔལ་གྱི་རྩ་བའི་རྒྱུ་དེ་སྤོང་དགོས་པ་སོགས་གསུངས་པ་དང་མཉམ། མི་ཐམས་ཅད་བདེ་བ་འདོད་པ་དང་། སྡུག་བསྔལ་མི་འདོད་པ་གཅིག་མཚུངས་ཡིན་པ་མ་ཟད། ང་ཚོས་བདེ་བའི་ཆེད་དུ་རང་ཉིད་ཀྱི་བྱ་སྤྱོད་ལ་དཔྱད་པ་གཏོང་དགོས་པ་རེད་ཅེས་བཀའ་སློབ་སྩལ་གནང་ཡོད་པ་རེད།

ད་དུང་བོད་ཀྱི་དུས་སྟོན་ཐོག་༧གོང་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་གིས་འཛམ་གླིང་ཞི་བདེའི་ཆེད་དུ་ཞབས་འདེགས་བསྐྱངས་གནང་མཛད་ཡོད་པའི་བརྗོད་གཞི་ཐོག་མཁས་དབང་ཁག་གིས་གཏམ་བཤད་སྤེལ་གནང་ཡོད་པ་རེད།
གོང་ཞུས་དུས་སྟོན་དེའི་ནང་བོད་ཀྱི་ཐུན་མོང་མ་ཡིན་པའི་རིག་གཞུང་དང་འབྲེལ་བའི་ཅ་དངོས་དང་། ཟས་རིག རྩོམ་དེབ་སོགས་འགྲེམས་སྤེལ་གནང་ཏེ་མང་ཚོགས་ནས་དོ་སྣང་ཆེན་པོ་བྱུང་ཡོད་འདུག

གསར་འགོད་པ། རིག་འཛིན་ཆོས་སྒྲོན། བསྟན་འཛིན་ཐར་འདོད། ཀླུ་འབུམ།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།