ཁེ་ཎ་ཌའི་སྲིད་བློན་གྱིས༧གོང་ས་མཆོག་ལ་མཇལ་འཕྲད་ཞུས།

༄༅༎ཁེ་ཎ་ཌའི་སྲིད་བློན་སིཀྲི་ཕེན་ཧའར་པཱར་མཆོག་གིས་རྒྱལ་ས་ཨོ་ཊ་ལྦ་ནང་ཚེས་༢༧་ཉིན་༧གོང་ས་སྐྱབས་མགོན་ཆེན་པོ་མཆོག་དང་ལྷན་དུ་མཇལ་འཕྲད་ཞུས་འདུག་ལ་ དེ་ནི་ཁེ་ཎ་ཌའི་གཞུང་གིས་ད་དུང་བོད་དོན་ཐད་མུ་མཐུད་རྒྱབ་སྐྱོར་གནང་གི་ཡོད་པའི་རྣམ་པ་གསལ་པོ་མཚོན་ཐུབ་ལུགས་Public Diplomacy ཞེས་པའི་གསར་ལས་ཁང་གིས་གནས་ཚུལ་སྤེལ་བཞག། འོན་ཀྱང་དེ་སྔ་ཁེ་ཎ་ཌའི་སྲིད་བློན་མཆོག་གིས་གཞུང་འབྲེལ་གྱི་ཐོག་ནས་༧གོང་ས་སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་ཡོད་ཀྱང་  ད་ལན་སྐུ་སྒེར་གྱི་ངོ་བོའི་ཐོག་ནས་མ་གཏོགས་མཇལ་འཕྲད་ཞུས་མེད་པ་རེད།
དེ་ཡང་ལོ་ལྔ་ཙམ་སྔོན་དུ་སྲིད་བློན་ཧའར་པཱར་མཆོག་གིས་གཞུང་འབྲེལ་གྱི་ཐོག་ནས་༧གོང་ས་སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་པ་མ་ཟད་ ༧གོང་ས་མཆོག་ལ་ཁེ་ཎ་ཌའི་མེ་སེར་གྱི་ཆེས་ཐོངས་ཀྱང་ཕུལ་ཡོད་པ་རེད།
ད་ལན་སྲིད་བློན་ཧའར་པཱར་མཆོག་གི་མཇལ་འཕྲད་ཞུ་ཕྱོགས་ལ་འགྱུར་བ་ཕྱིན་པ་དེ་ནི་ ཕྱི་ལོ་༢༠༠༨ལོར་དཔལ་འབྱོར་ཉམ་རྒུད་ཕྱིན་པ་དང་ དེ་བཞིན་ཨ་མི་རི་ཀ་དང་ཚོང་འབྲེལ་ཡག་པོ་མ་བྱུང་བ་དང་ཐད་ཀར་འབྲེལ་བ་ཡོད་པ་ཞིག་ཡིན་པ་རེད། སྲིད་འཛིན་ཧའར་པཱར་མཆོག་གིས་ འགྲོ་བ་མིའི་གནད་དོན་ཁོ་ནའི་ཐོག་ནས་རྒྱ་ནག་ལ་ཁ་ཡ་མི་་བྱེད་པར་འཇོག་མི་རུང་ཞེས་མཇུག་བསྡོམས་གནང་ཡོད་པ་རེད། སྲིད་བློན་ཧའར་པཱར་མཆོག་གིས་རྒྱ་ནག་གི་ཚོར་སྣང་ལ་དགོངས་བཞེས་དེ་ཙམ་གནང་སྟེ་ སྐུ་སྒེར་གྱི་ངོ་བོའི་ཐོག་ནས་༧གོང་ས་སྐྱབས་མགོན་ཆེན་པོ་མཆོག་དང་ལྷན་དུ་མཇལ་འཕྲད་ཞུས་པ་དེ་ལའང་ རྒྱ་ནག་མི་དགའ་བ་ཆགས་ཡོད་པ་ནི་བརྗོད་མི་དགོས་པ་ཞིག་རེད་ཅེས་གསར་ལས་ཁང་དེས་མུ་མཐུད་གནས་ཚུལ་སྤེལ་བཞག།