༄༅༎ཕྱི་ཟླ་༧ཚེས་༡༣ཉིན་འབྲུག་ཡུལ་དུ་རྒྱལ་ཡོངས་འོས་བསྡུ་ཐེངས་གཉིས་པ་གྲུབ་རྗེས་ཕྱོགས་འགལ་མི་སེར་དམངས་གཙོ་ཚོགས་པར་འཐུས་མིའི་གྲངས་༤༧ནས་༣༢ཐོབ་སྟེ་རྒྱལ་ཁ་ཐོབ་ཡོད་པར་བརྟེན།ཚེས་༡༥ཉིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གི་མི་སེར་དམངས་གཙོ་ཚོགས་པའི་ཚོགས་གཙོ་ཚེ་རིང་སྟོབས་རྒྱས་ལགས་སུ་བཀའ་ཤག་གི་ཚབ་ཞུས་ཏེ་འཚམས་འདྲི་བཀྲ་ཤིས་བདེ་ལེགས་ཡོད་ཅེས་གསུངས་འདུག ཡང་སྲིད་སྐྱོང་མཆོག་གིས་འབྲུག་ཕུན་གསུམ་ཚོགས་པའི་འཐུས་མི་ཡོངས་ལ་འདས་པའི་ལོ་ལྔའི་རིང་དམངས་གཙོའི་ལམ་ལུགས་ཞི་འཇམ་ཐོག་ནས་གཞུང་འཛིན་གནང་ཐུབ་པ་དེར་འཚམས་འདྲི་གནང་བ་འབྲེལ།འབྲུག་ནང་འོས་བསྡུ་དང་དམངས་གཙོའི་ལམ་ལུགས་དེ་བཞིན་ཞི་འཇམ་ཐོག་ནས་དབང་ཚད་འཕོ་འགྱུར་འགྲོ་ཐུབ་པ་དེས།འབྲུག་རྒྱལ་པོའི་དབུ་ཁྲིད་དང་དགོངས་བཞེད་དེ་བཞིན་དམངས་གཙོའི་ལམ་ལུགས་ལ་མི་སེར་གྱི་ངོས་ནས་ཡིད་ཆེས་ཡོད་པ་མཚོན་ཐུབ་པ་རེད་ཅེས་གསུངས་འདུག།
