བོད་མི་རྣམས་ནས་གོ་སྐབས་ནམ་བྱུང་ལ་བོད་དོན་དྲིལ་བསྒྲགས་གནང་གལ་ཆེ་བ་ཡིན་ཞེས། སྲིད་སྐྱོང་མཆོག་གིས་མོན་གྷོ་འདོད་རྒུ་གླིང་གི་མི་མང་་ལ་གསུངས་པ།

ཟླ་བ་འདིའི་ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ལགས་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་འཚམས་འདྲི་གཟིགས་དང་འབྲེལ། འདོད་རྒུ་གླིང་གཞིས་སྤྱིའི་ཚོགས་ཁང་དུ་གཞིས་ཁུངས་དེའི་དབུ་ལས་མི་མང་རྣམས་ལ་གསུང་བཤད་གནང་སྐབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིགས་རྒྱང་རིང་པོའི་དགོངས་གཞི་འོག་འདས་པའི་མི་ལོ་ ༦༥ རིང་སྐུ་ལས་བསྐྱོན་གནང་མཛད་པའི་བོད་མིའི་སྒྲིག་འཛུགས་དེ་ཐོར་ཞིག་ཏུ་མ་འགྲོ་བར་རྒྱུན་གནས་ཐུབ་རྒྱུར་འབད་བརྩོན་དགོས་པའི་གཞེན་སྐུལ་གནང་སོང་བ་དང་། བོད་མིའི་སྒྲིག་འཛུགས་ཀྱི་བཀའ་ཤག་ངོས་ནས་ཕྱི་ལོ་ ༢༠༢༡ ཟླ་ ༥ ཚེས་ ༢༧ ཉིན་ནས་བཟུང་ཕྱག་ལས་གང་གནང་བ་རྣམས་འཛིན་སྐྱོང་གི་ས་མཚམས་དང་བོད་མི་མང་སྤྱི་འཐུས་ལྷན་ཚོགས་ཀྱི་གཏན་ལ་ཕབ་པའི་སྒྲིག་གཞི་གཞིར་བཟུང་གིས་ལག་བསྟར་གནང་ཡོད་པ་མ་གཏོགས། སྤྱི་འཐུས་ལྷན་ཚོགས་ཀྱི་ཆབ་སྲིད་ནང་དགོས་མེད་ཀྱིས་མི་བཞུགས་རྒྱུའི་ཐག་གཅོད་གནང་ཡོད་པ་གསུང་གནང་སོང་།

སྲིད་སྐྱོང་མཆོག་གིས་མུ་མཐུད། ༸གོང་ས་༸སྐྱབས་མགོན་ཆེན་པོ་མཆོག་གིས་དགུང་གྲངས་ ༡༦ ཐོག་ཆོས་སྲིད་ཀྱི་ཐུགས་འགན་བཞེས་ཏེ་ལོ་རྗེས་མའི་ཟླ་ ༡༡ པའི་ནང་ལོ་ ༧༥ ཧྲིལ་པོ་འཁོར་བའི་དུས་ཚིགས་ཁྱད་པར་ཅན་ཞིག་ཆགས་ཀྱི་ཡོད་པས། ༸གོང་ས་མཆོག་གི་བཀའ་གསུང་ཅི་སྒྲུབ་ཐོག་དབུ་འོག་དཔུང་འདེགས་ཞུ་རྒྱུ་ནི་༸རྒྱལ་དབང་དགྱེས་པའི་མཆོད་སྤྲིན་དུ་འགྱུར་རྒྱུ་ཡིན་པས་དེ་ལྟར་གནང་རྒྱུའི་ཆོད་སེམས་བརྟན་པོ་ཡོད་པ་འགྲེལ་བརྗོད་གནང་བྱུང་ལ། ད་ལྟའི་རྒྱ་ནག་གཞུང་གི་ཆབ་སྲིད་དང་དཔལ་འབྱོར་གྱི་གནས་བབ་དང་འབྲེལ་དེང་འཁྲུག་ཆ་དོད་པའི་རྒྱལ་སྤྱིའི་ཆབ་སྲིད་ཀྱི་འཕོ་འགྱུར་དང་བསྟུན། བོད་མི་རྣམས་ནས་གོ་སྐབས་ཇི་བྱུང་ལ་བོད་དོན་གོ་རྟོགས་གང་མང་སྤེལ་རྒྱུ་གལ་ཆེ་ཡིན་ཞེས་གསུངས་སོང་།

གཞན་ཡང་སྲིད་སྐྱོང་མཆོག་གིས། བོད་མིའི་སྒྲིག་འཛུགས་སྲ་བརྟན་རྒྱུན་གནས་ཐུབ་རྒྱུར་རུབ་སྡོད་བོད་མིའི་གཞིས་ཆགས་ཀྱི་གལ་གནད་དང་། བོད་རྒྱའི་དཀའ་རྙོགས་སེལ་ཐབས་སུ་༸གོང་ས་༸སྐྱབས་མགོན་ཆེན་མཆོག་གི་དགོངས་གཞི་དབུ་མའི་ལམ་གྱི་ངོ་བོ་དང་གལ་གནད་སྐོར་གསུང་བཤད་གནང་གྲུབ་རྗེས། མང་ཚོགས་ཀྱི་དོགས་འདྲི་ཁག་ལ་ལན་འདེབས་དང་། མོན་གྷོ་འདོད་རྒུ་གླིང་གཞིས་ཁུངས་ཚོགས་སྡེ་ ༢༦ ཡོད་པ་ཐུན་མོང་ནས་ཁོང་ལ་སྤྱན་རས་གཟིགས་ཀྱི་སྐུ་ཐང་ཞིག་ཕྱག་རྟགས་སུ་ཕུལ་གནང་ཡོད་པ་རེད།

འདི་ཚེས་ ༢༩ ཉིན་གྱི་ཕྱི་དྲོར་སྲིད་སྐྱོང་སྤེན་པ་ཚེ་རིང་ལགས་ནས་མོན་གྷོ་ཕེབསའདོད་རྒུ་གླིང་བོད་མིའི་གཞིས་ཆགས་ནས་ཕེབས་ཐོན་གྱིས། ཧོབ་ལི་རྒྱ་གར་ SDM སྨན་མཐོ་སློབ་ཀྱི་སློབ་ཕྲུག་རྣམས་ལ་གསུང་བཤད་གནང་རྗེས་བཞུགས་སྒར་དུ་ཕྱིར་ལོག་གནང་གི་ཡོད་པ་རེད་འདུག

གསར་འགོད་པ། པདྨ་དངོས་གྲུབ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།