ཨ་རིའི་མི་ནེ་སོ་ཊ་མངའ་སྡེའི་ནང་བོད་པའི་གྲོང་ཚོ་གསར་རྒྱག་གི་ལས་འཆར་དངོས་སུ་འགོ་བཙུགས་འདུག

འདས་པའི་ལོ་གཉིས་ཙམ་གྱི་རིང་ཨ་མི་རི་ཀའི་མི་ནེ་སོ་ཊ་ (Minnesota) མངའ་སྡེའི་ནང་གནས་སྡོད་བོད་མི་ཁག་ཅིག་གིས་ཞིབ་འཇུག་དང་ཁྲིམས་ཀྱི་སློབ་སྟོན་སོགས་འབད་བརྩོན་གང་ཡོད་ཞུས་རྗེས། ༢༠༢༤ལོའི་ཟླ་ ༩ ཚེས་ ༣ ཉིན་མི་ནེ་སོ་ཊ་བོད་མིའི་སྤྱི་མཐུན་ཚོགས་པའི་འགན་འཁུར་འོག་(TTP LLC)་མི་ནེ་སོ་ཊ་མངའ་སྡེའི་བྷེ་ལེན་ས་ཁུལ་དུ་བོད་པའི་གྲོང་ཚོ་འཛུགས་སྐྲུན་གྱི་ལས་འཆར་དངོས་སུ་འགོ་འཛུགས་བྱེད་རྒྱུའི་གསལ་བསྒྲགས་སྤེལ་འདུག་ལ། མི་ནེ་སོ་ཊ་མངའ་སྡེའི་བྷེ་ལེན་ས་ཁུལ་དུ་ས་ཁང་ཉོ་སྒྲུབ་ཀྱིས་བོད་མིའི་གྲོང་ཚོ་གསར་རྒྱག་འཛུགས་སྐྲུན་གྱི་ལས་འཆར་འགྲོ་བཞིན་པ་དང་། ས་ཁུལ་དེར་སྡོད་ཁང་རྒྱག་འདོད་ཡོད་པའི་བོད་མིའི་མིང་ཐོ་བསྡུ་རུབ་ཀྱིས་ལས་གཞི་དེའི་ཁོངས་སུ་ཞུགས་མཁན་བོད་མི་སོ་སོའི་འདོད་མོས་ལྟར་ཁེར་ཁྱིམ་སྡོད་ཁང་དང་།

གྲོང་སྡེའི་ཁང་པ། ཐོག་བརྩེགས་སྡེ་ཁུལ་ཁང་པ་སོགས་རྒྱག་འཆར་ཡོད་པ་དང་། དེའི་དམིགས་ཡུལ་དང་ད་ལྟའི་གནས་སྟངས་ཐད་མི་ནེ་སོ་ཊ་བོད་མིའི་སྤྱི་མཐུན་ཚོགས་པའི་རྒྱུན་ལས་དང་བོད་གྲོང་འཛུགས་སྐྲུན་ལས་འཆར་གྱི་ས་ཁང་འགན་འཛིན་ཟླ་བ་བཀྲ་ཤིས་ལགས་ཀྱིས་ཨ་ཤེ་ཡ་རང་དབང་རླུང་འཕྲིན་ཁང་ལ་གསུངས་དོན་དུ། ང་ཚོས་བྱང་ཨ་རིའི་ནང་ཡོད་པའི་བོད་མི་གངས་ཅན་པ་རྣམས་ལ་རང་མི་རིགས་ཀྱི་གཅེས་ནོར་རིག་གཞུང་བདག་གཅེས་དང་སྲུང་སྐྱོབ། དེ་བཞིན་མ་འོངས་པའི་མི་རབས་རྣམས་ཀྱི་ཆེད་དུ་སྐད་ཡིག་སྲུང་སྐྱོབ་བཅས་ཀྱི་ཆེད་དུ་བོད་མི་ཚོ་མཉམ་དུ་གནས་སྡོད་ཐུབ་སའི་བོད་གྲོང་འཛུགས་བསྐྲུན་བྱེད་བཞིན་པ་དང་། བོད་གྲོང་གཞིས་ཆགས་དེར་དང་པོ་སྡོད་ཁང་ནས་འགོ་བཙུགས་ཏེ་རིམ་པས་དགོན་པ་དང་བུ་བཅོལ་ཁང་། རྒན་གསོ་ཁང་། ཟ་ཁང་། ཚོང་ཁང་སོགས་རྒྱག་པའི་འཆར་གཞི་ཡོད་ཅེས་གསུངས་བྱུང་།
ད་དུང་ཁོང་གིས་མུ་མཐུད་དུ་གསུངས་ན། ཨ་རིའི་མེ་ནི་སོ་ཊའི་བོད་གྲོང་འཛུགས་སྐྲུན་ས་ཁུལ་དུ་སྲིད་སྐྱོང་སྤེན་པ་ཚེ་རིང་མཆོག་གིས་གཟིགས་ཞིབ་ཐེངས་གཉིས་གནང་ཡོད་པ་དང་། ལས་གཞི་དེར་རྒྱབ་སྐྱོར་དང་ལས་དོན་མངོན་འགྱུར་ཡོང་ཆེད་བོད་མིའི་སྒྲིག་འཛུགས་ཀྱི་ངོས་ནས་གྲོས་ཚོགས་ཀྱི་བཀའ་འཁྲོལ་ཐོབ་པ་ཡིན་ན་ཨ་སྒོར་ས་ཡ་བཞི་ཡི་སྐྱེད་མེད་དངུལ་བུན་མ་དངུལ་ཆེད་སྔ་གཏོང་གནང་རྒྱུ་གསུངས་ཡོད་པས། མ་དངུལ་དེས་དང་པོ་ས་ཆ་ཉོས་ཏེ་བོད་མི་སོ་སོའི་འདོད་མོས་ལྟར་དཔལ་འབྱོར་གནས་བབས་བཞིན་ཁེར་ཁྱིམ་སྡོད་ཁང་དང་གྲོང་སྡེའི་སྡོད་ཁང་། ཁང་བརྩེགས་སྡོད་ཁང་བཅས་རྒྱག་འཆར་ཡོད་འདུག་ལ། རྒྱ་གར་ནང་བོད་ཀྱི་ཆོས་དང་རིག་གཞུང་གོམས་གཤིས་ལེགས་པོ་འཛིན་སྐྱོང་ཐུབ་པ་དེ་བྱེས་ཀྱི་དགོན་སྡེ་དང་གཞིས་ཆགས་ཁག་གི་བཀའ་དྲིན་ཡིན་ཕྱིན་མེ་ནི་སོ་ཊར་དཔེ་བལྟོས་ནས་ཨ་རིའི་ས་ཁུལ་གཞན་པ་དག་ནས་ཀྱང་བོད་གྲོང་འཛུགས་སྐྲུན་བྱེད་རྒྱུ་གལ་ཆེན་ཡིན་པའི་བསམ་ཚུལ་སྟོན་བཞིན་འདུག
ད་ལྟའི་ཆར་མེ་ནི་སོ་ཊའི་བོད་གྲོང་འཛུགས་སྐྲུན་ལས་གཞི་དེ་ག་དུས་ལེགས་འགྲུབ་ཡོང་མིན་བཤད་ཁག་པོ་ཡིན་ཡང་ཕྱི་ལོ་ ༢༠༢༥ ནས་དངོས་སུ་སྡོད་ཁང་གསར་རྒྱག་སོགས་རིམ་པས་ལོ་ལྔ་ནས་དྲུག་ནང་ལས་གཞི་འགྲུབ་ཐུབ་པར་རེ་བ་བྱེད་བཞིན་འདུག་ལ། བོད་གྲོང་འདི་ལེགས་འགྲུབ་བྱུང་ཚེ་འདི་ནི་བྱང་ཨ་རིའི་ནང་གི་བོད་གྲོང་ཐོག་མ་དེ་ཆགས་རྒྱུ་ཡིན་པ་རེད།།

གསར་འགོད་པ། ལྕགས་མོ་འཚོ།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།