༄༅། །ཕྱི་ཚེས་༡༣་ཉིན་བོད་རང་བཙན་བསྐྱར་ནན་གནང་སྟེ་ལོ་ངོ་༡༠༠ འཁོར་བའི་དྲན་གསོའི་ཉིན་མོར་ཨ་རིའི་གྲོང་ཁྱེར་ནེའུ་ཡོག་ཏུ་ཡོད་པའི་བོད་ཀྱི་ཁང་པའི་ནང་བོད་རྒྱལ་ཡོངས་རང་བཙན་ལྷན་ཚོགས་དངོས་སུ་དབུ་འཛུགས་གནང་ཡོད་པ་རེད། ཚོགས་པ་གསར་འཛུགས་ཀྱི་མཛད་སྒོ་དེའི་ཐོག ༧རྒྱལ་མཆོག་སྐུ་ཕྲེང་༡༣ ཆེན་པོ་མཆོག་གིས་བོད་རང་བཙན་བསྐྱར་ནན་གསལ་བསྒྲགས་གནང་བ་ནས་བཟུང་ད་ལྟའི་བཙན་བྱོིལ་ནང་གི་མང་གཙོའི་འཕེལ་རིམ་གྱི་ལོ་རྒྱུས་ཀྱི་བརྙན་འཕྲིན་བཏོན་པ་དང༌། ༧རྒྱལ་མཆོག་སྐུ་ཕྲེང་༡༣ ཆེན་པོ་མཆོག་གིས་རང་བཙན་བསྐྱར་ནན་གནང་བའི་ཡིག་ཆ་བོད་ཡིག་དང་དབྱིན་ཡིག་ཐོག་ནས་སྒྲོག་སྦྱང་གནང་ཡོད་པ་རེད། སྐབས་དེར་ད་དུང་། བོད་རྒྱལ་ཡོངས་རང་བཙན་ལྷན་ཚོགས་ཀྱི་མཚོན་དོན་གྱི་དར་ཆ་འགྲེང་འཛུགས་བྱས་པའི་རྗེས། བོད་རྒྱལ་ཡོངས་རང་བཙན་ལྷན་ཚོགས་བཙུགས་དགོས་པའི་དམིགས་ཡུལ་ངོ་སྤྲོད་གནང་ཡོད་པ་རེད། ལྷན་ཚོགས་དེའི་ཐོག་བོད་མི་དང་ཕྱི་རྒྱལ་རྒྱབ་སྐྱོར་བ་སོགས་ཁྱོན་མི་གྲངས་ཉིས་བརྒྱ་ལྷག་མཉམ་ཞུགས་བྱས་ཤིང༌། མང་པོ་ཞིག་ནི། བོད་རང་བཙན་སློབ་ཕྲུག་ཚོགས་པ་དང༌། ས་གནས་བོད་ཀྱི་གཞོན་ནུ་ཚོགས་པ། ཆུ་བཞི་སྒང་དྲུག ས་གནས་བེུད་ཚོགས་པ། ཨ་རི་བོད་ཀྱི་ཚོགས་པ་སོགས་རྒྱལ་སྤྱིའི་ནང་གི་ཚོགས་པ་ཁག་དང་ས་གནས་ཀྱི་སྐུ་ཚབ་མཉམ་ཞུགས་གནང་ཡོད་པ་རེད། དེ་བཞིན་ཡོ་རོིབ་ཁུལ་གྱི་བོད་རྒྱལ་ཡོངས་རང་བཙན་ལྷན་ཚོགས་དེ་ནི་France རྒྱལ་ས་Paris ཡི་Mairie ཚོགས་ཁང་དུ་དབུ་འཛུགས་གནང་བ་དང༌། སྐབས་དེར་France བོད་རང་བཙན་སློབ་ཕྲུག་ཚོགས་པ་དང་ཡོ་རོབ་བོད་ཀྱི་གཞོན་ནུ་མཐུན་ཚོགས་སོགས་གཙོས་པའི་བོད་མི་དང་རྒྱབ་སྐྱོར་བ། France གཞུང་གི་གནད་ཡོད་མི་སྣ་བཅས་ཁྱོན་མི་གྲངས་བརྒྱ་མཉམ་ཞུགས་གནང་ཡོད་པ་རེད།།
