རྒྱ་གར་བྱང་ཤར་འབྲས་ལྗོངས་མངའ་སྡེའི་རྒྱལ་ས་སྒང་ཐོག་ཏུ་ཕྱི་ཟླ་ ༣ ཚེས་ ༡ དང་ ༢ ཉིན་ཕྱི་རྒྱལ་རྒྱལ་ཁབ་བདུན་ནས་སྨན་པ་དང་སྨན་ཞབས་པ་གདན་ཞུས་ཀྱིས། རྒྱ་གར་གྱི་ཧི་མ་ཅལ་མངའ་སྡེའི་སིར་མོར་རྫོང་ཁོངས་ཀྱི་སྔ་འགྱུར་རྙིང་མའི་ཀཿ་ཐོག་དགོན་པས་འགན་ཁུར་གཙོ་བཞེས་འོག་ནད་གཞི་འདྲ་མིན་ཡོད་པའི་ནད་པར་རིན་མེད་ཀྱི་སྨན་བཅོས་གནང་སྟེ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་ ༩༠ ལ་ཕེབས་པའི་༧སྐུའི་གོ་སྟོན་དང་བསྟུན་བྱམས་བརྩེའི་ལོ་སྲུང་བརྩི་ཞུ་བའི་ཆ་ཤས་སུ་གཞན་ཕན་གྱི་ལས་འགུལ་སྤེལ་ཡོད་པ་རེད།བྱེད་སྒོ་སྤེལ་ཡུལ་དུ་ཆེད་ཕེབས་གནང་པའི་འབྲས་ལྗོངས་མངའ་སྡེའི་འཕྲོད་བསྟེན་བློན་ཆེན་འཇི་ཊི་འབྲོང་རྒྱལ་ (G.T. Dungel) ལགས་ཀྱིས་དཀའ་སྡུག་མྱོང་བཞིན་པའི་ནད་པ་ཚོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུའི་གོ་སྟོན་གྱི་དུས་ཚིགས་དང་བསྟུན་ནས་སྨན་བཅོས་ཀྱི་ལས་འགུལ་སྤེལ་བ་འདི་ནི་བྱམས་བརྩེ་དངོས་སུ་ལག་བསྟར་བྱས་པ་ཞིག་ཡིན་པས། འབྲས་ལྗོངས་གཞུང་དང་མི་མང་ངོས་ནས་བོད་མི་ཚང་མར་བཀྲིས་སྨོན་འདུན་ཞུ་བཞིན་ཡོད་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།དེ་བཞིན་སྔ་འགྱུར་རྙིང་མའི་ཀཿ་ཐོག་དགོན་པའི་དབུ་འཛིན་རྒྱ་ཤོད་སྐྱབས་སྤྲུལ་རིན་པོ་ཆེ་མཆོག་གིས། ༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་པའི་ཆེད་བྱམས་བརྩེའི་ཐོག་ནས་གཞན་ལ་ཕན་ཐོགས་བྱེད་རྒྱུ་འདི་ང་ཚོ་བོད་མི་ཡོངས་ཀྱི་འགན་ཡིན་སྟབས། ༧གོང་ས་མཆོག་གི་ཐུགས་རེ་གནང་པ་དང་ནང་པ་སངས་རྒྱས་པ་གཅིག་ཡིན་པའི་ཆ་ནས་གང་ཐུབ་ཀྱིས་མི་ལ་ཕན་ཐོགས་སྒྲུབ་པའི་ལས་དོན་བྱ་རྒྱུ་འདི་གལ་ཆེར་འཛིན་པ་ཡིན་ཞེས་གསུངས་བྱུང་།
མངའ་སྡེའི་གྲོས་ཚོགས་འཐུས་མི་འབར་ཕུང་པ་བདེ་ལེགས་རྣམ་རྒྱལ་ (Delek Namgyal Pharpungpa) ལགས་ཀྱིས་འཕྲོད་བསྟེན་ནི་མི་ཚེའི་ནང་གི་ལས་དོན་ལམ་ལྷོང་ཡོང་བར་གལ་གནད་ཆེན་པོ་རེད་གསུངས་བྱུང་། ཁོང་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་མུ་མཐུད་གསུངས་པར། འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་མཆོག་ནས་ཀྱང་མི་མང་གི་འཕྲོད་བསྟེན་ཐོག་ཐུགས་ཁུར་ཆེན་པོ་བཞེས་བཞིན་ཡོད་པ་དང་འབྲས་ལྗོངས་གཞུང་ཕྱོགས་ནས་༧གོང་ས་༧སྐྱབས་མགོན་ཆེན་པོ་མཆོག་གི་སྐུའི་གོ་སྟོན་གྱི་དུས་ཚིགས་འདིར་༧གོང་ས་མཆོག་སྐུ་ཁམས་གསལ་ཐང་དང་སྐུ་ཚེ་ཡུན་རིང་བརྟན་པའི་སྨོན་འདུན་ཞུ་འདོད་བྱུང་ཞེས་གསུངས་བྱུང་།
ལས་རིམ་འདིའི་ནང་། འབྲས་ལྗོངས་ནང་གི་བོད་མི་དང་ས་གནས་ཡུལ་མིའི་ཚོགས་ཁག་ ༢༧ མཉམ་ཞུགས་ཞུས་ཡོད་ལ། མི་མང་ ༦༠༠ མ་ཟིན་ཙམ་ལ་རིན་མེད་ཀྱི་ཐོག་ནས་སྨན་བཅོས་གནང་ཡོད་པ་རེད།
སྨན་པ་བསྟེན་གཏུག་ཆེད་བཅར་པའི་ནད་པ་ཚེ་རིང་དོན་གྲུབ་ལགས་ཀྱིས། སྨན་བཅོས་གནང་རྗེས་ལུས་ཁམས་ཀྱི་གནས་སྟངས་ལ་འགྱུར་བ་ཕྲན་བུ་བྱུང་ཡོད་པ་གསུངས་བྱུང་།
ཡང་མ་ཡ་ཆེཏ་རི་ལགས་ཀྱིས། གུས་པར་ཕོ་བ་དང་སྐེད་པའི་ན་ཟུག་གི་དཀའ་ངལ་ཡོད་པས། ད་རེས་འདིར་བསྟེན་གཏུག་བྱས་རྗེས་སྔར་ལས་གནས་སྟངས་བཟང་བ་ཚོར་གྱི་འདུག་པས། ལས་འགུལ་འདི་གོ་སྒྲིག་གནང་མཁན་ལ་ཐུགས་རྗེ་ཆེ་ཞུ་འདོད་བྱུང་ཞེས་གསུངས་བྱུང་།།