ཧྥ་རན་སིར་བོད་མིའི་ད་ལྟའི་སྐྱབས་བཅོལ་གནས་སྟངས་དང་ཡིག་ཆ་ཐད་དཀའ་ངལ་ཡོད་མེད།

ཧྥ་རན་སིར་བོད་མིའི་ད་ལྟའི་སྐྱབས་བཅོལ་གནས་སྟངས་དང་ཡིག་ཆ་ཐད་དཀའ་ངལ་ཡོད་མེད། ལོ་མང་རིང་རྒྱ་བལ་འབྲུག་གསུམ་ནང་གནས་པའི་བཙན་བྱོལ་བོད་མི་ཕོན་ཆེ་སྐྱབས་བཅོལ་ཐེངས་གཉིས་པ་དེ་ཡོ་རོབ་དང་ཨ་རི་སོགས་ལ་རང་འགུལ་གྱིས་འགྲོ་འགོ་བཙུགས་ཡོད་པ་དང་། མང་པོ་ཞིག་གིས་ཧིན་སྒོར་འབུམ་མང་པོ་བཏང་ནས་ཐབས་ལམ་འདྲ་མིན་གྱི་བརྒྱུད་ནས་འགྲོ་ཡི་ཡོད་སྐོར་དེ་སྔོན་བོད་པའི་གསར་ལམ་ཁག་ཏུ་གནས་ཚུལ་ཐོན་ཡོད། ཡང་ཁག་ཅིག་ཆང་སའི་མིང་ཐོག་དང་ནང་མི་ཟླ་སྒྲིལ་གྱི་མིང་ཐོག་ནས་ནུབ་ཕྱོགས་སུ་གཞིས་སྤོ་བྱས་ཀྱི་ཡོད། རྒྱུ་མཚན་དེ་ལ་བརྟེན་ནས་ད་ལྟའི་བཙན་བྱོལ་བོད་མིའི་ལྟེ་གནས་རྒྱ་གར་དུ་བོད་ནས་ཡོང་མཁན་ཞེ་དྲག་ཉུང་དུ་འགྲོ་བཞིན་ཁར། བཙན་བྱོལ་དུ་ཕྲུ་གུ་སྐྱེས་མཁན་གྱི་གྲངས་འབོར་ཇེ་ཉུང་ཡིན་པས། སློབ་གྲྭ་དང་དགོན་སྡེ་སོགས་ལ་བོད་པ་ཉུང་དུ་འགྲོ་བཞིན་ཡོད། གཞིས་ཆགས་ཁག་ཅིག་ལ་ཡང་རྒན་རྒོན་ལས་གཞོན་པ་མང་པོ་མེད་པའི་མི་འབོར་གྱི་འཕེལ་རིམ་འདི་ནས་མི་རིང་བ་ནུབ་ཕྱོགས་དང་རྒྱ་བལ་འབྲུག་གསུམ་གྱི་བཙན་བྱོལ་བོད་མིའི་མི་འབོར་ཕྱེད་ཀ་ཕྱེད་ཀ་ཆགས་སྲིད་པའི་སྐོར་ཚོད་དཔག་བྱེད་མཁན་ཡོད། འོན་ཀྱང་ནུབ་ཕྱོགས་སུ་ཐོག་མར་སྐྱབས་བཅོལ་ཡུལ་དུ་འབྱོར་སྐབས་ངོ་ཤེས་སྤུན་མཆེད་མེད་མཁན་ཚོར་དགོས་ངེས་ཀྱི་ངོས་སྦྱོར་ལག་འཁྱེར་དང་སྐད་ཡིག་གོ་བརྡ་མ་འཕྲོད་པ་སོགས་དཀའ་ངལ་སྣ་ཚོགས་ཕྲད་སྲིད་ཀྱང་། རིམ་བཞིན་བོད་མི་དེ་དག་སོ་སོས་དཀའ་ལས་རྒྱབ་ནས་སོ་སོའི་རྐང་པ་སྒང་ལ་ཧྲག་ཐག་ཐག་ལང་ཐུབ་པ་ཆགས་ཀྱི་ཡོད་འདུག།

དེ་རིང་ཁ་བའི་གྲོས་རྭ་ལེ་ཚན་ནང་། ཧྥ་རན་སིར་བོད་མིའི་སྐོར་རྭ་ཚོགས་པ་ཞེས་པ་ཞིག་ལོ་ཤས་སྔོན་བཙུགས་ནས་སྤྱི་ཚོགས་ཞབས་ཞུའི་ངོ་བོ་ཐོག་ནས་བོད་པ་གསར་འབྱོར་བ་ཚོར་ཡིག་ཆ་བཟོ་རོགས་དང་སྐད་ཡིག་སློབ་ཁྲིད་གཙོས་པའི་བོད་པས་བོད་པ་རོགས་པ་བྱེད་པའི་འབྲས་བུ་དང་གནད་འགག་གི་སྐོར།

སྐོར་རྭ་ཚོགས་པའི་ཚོགས་གཙོ་བློ་བཟང་ཆོས་འབྱོར་དང་ཚོགས་གཞོན་བློ་བཟང་སྒྲོལ་དཀར་བཅས་འབྲེལ་ཡོད་ཁག་ཅིག་དང་རྩོམ་སྒྲིགས་འགན་འཛིན་རྡོ་རྗེ་དགྲ་འདུལ་གྱིས་བགྲོ་གླིང་བྱེད་པ་གསན་རོགས་གནང་།

གསར་འགོད་པ། རྡོ་རྗེ་དགྲ་འདུལ།

རྩོམ་སྒྲིག་པ། རྡོ་རྗེ་དགྲ་འདུལ།

དྲྭ་ཐོག་སྤེལ་མཁན། པ་སངས་དོན་ལྡན།