བདེ་ཆེན་རྫོང་འདི་བཞིན་ས་གནས་མང་ཚོགས་ཀྱི་འདོད་མོས་ཡོད་མེད་ལ་མ་བལྟོས་པར་གཞུང་གིས་བཀོད་སྒྲིག་བྱས་པའི་འོག་གནས་སྤོ་བྱེད་བཞིན་འདུག
རྒྱ་ནག་གཞུང་གིས་ཕྱི་ལོ་ ༢༠༢༤ ལོར་སྲིད་འཛིན་ས་ཁོངས་ལེགས་སྒྲིག་གི་ཆོག་མཆན་སྤྲད་ཡིན་ཟེར་ཏེ་གྲོང་རྡལ་གཉིས་བདེ་ཆེན་རྫོང་གི་ཁྱབ་ཁོངས་སུ་བཅུག་པ་དང་། འདི་ནི་ད་ལྟའི་བདེ་ཆེན་རྫོང་འདི་ནས་ལྷོ་ཕྱོགས་ཀྱི་གཡུ་འབྲུག་གམ་རྒྱ་སྐད་ཐོག་ཡེ་ཀྲེ་ (Yezhi) ཟེར་བའི་གྲོང་རྡལ་དུ་གནས་སྤོ་བྱེད་རྒྱུ་གཏན་འཁེལ་ཡོད་ཅིང་། ཕྱི་ལོ་ ༢༠༢༦ ཟླ་ ༡ ཚེས་ ༡༠ ནས་བཟུང་བདེ་ཆེན་རྫོང་གི་སྤྱི་བདེ་འགྲིམ་འགྲུལ་དོ་དམ་རུ་ཁག་གི་འབྲེལ་ཡོད་ལས་དོན་ཁག་ཀྱང་རྫོང་གསར་པར་འགོ་འཛུགས་བྱེད་ཡོད་པ་གསལ་བསྒྲགས་བྱས་འདུག
བདེ་ཆེན་རྫོང་གནས་སྤོ་བྱེད་པའི་འཆར་གཞི་འདིའི་སྐོར་གནས་ཚུལ་རྩད་ཞིབ་རྒྱུས་ལོན་བྱེད་སྐབས་རང་ཉིད་ཀྱི་བདེ་འཇགས་ཆེད་བོད་ནང་ནས་མིང་འདོན་གནང་འདོད་མེད་པའི་མི་སྣ་ཞིག་གིས། རྫོང་གྲོང་གསར་པ་འཛུགས་སྐྲུན་བྱས་དང་བྱེད་མུས་ཡིན་པ་དང་། ད་ལྟའི་ཆར་གནས་སྤོ་བྱ་རྒྱུར་སྒུག་ནས་འདོད་རྒྱུ་ལས་འདོད་མོས་ཀྱི་གདམ་ཀ་གཞན་གང་ཡང་མི་འདུག་ཅེས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
ཡང་མི་སྣ་གཞན་ཞིག་གིས། ང་ཚོ་མི་རབས་ནས་མི་རབས་མང་པོར་ས་གནས་འདིར་འཚོ་བ་སྐྱེལ་བཞིན་ཡོད་པ་དང་། རྫོང་གསར་པའི་ནང་གནས་སྤོ་བྱས་པའི་རྗེས་འཚོ་ཐབས་གང་ལ་བརྟེན་དགོས་མིན་ད་ལྟ་ཤེས་ཀྱི་མི་འདུག་ལ། གནའ་བོའི་དགོན་པར་མཆོད་མཇལ་དུ་སྐྱོད་ཁག་པོ་ཆགས་སོང་ཞེས་བརྗོད་བྱུང་། དེ་མིན་ཡུ་ཌུབ་དྲ་ཚིགས་ཤིག་ཐོག་ལ་ཡང་བདེ་ཆེན་རྫོང་གནས་སྤོ་བྱེད་ཀྱི་ཡོད་པའི་གནས་ཚུལ་མཐོང་བར་གཞིགས་ན། རྫོང་གྲོང་ནང་གི་ཟ་ཁང་ཁག་སྒོ་བརྒྱབ་ཡོད་པ་དང་། ཕར་འགྲོ་ཚུར་འོང་བྱེད་མཁན་མི་སྣ་ཉུང་ཉུང་ཡིན་པ། ས་གནས་མང་ཚོགས་ཀྱིས་ཡུལ་འདི་ནས་གནས་སྤོ་བྱེད་འདོད་མེད་པ་སོགས་བརྗོད་ཀྱི་ཡོད་པ་མཐོང་རྒྱུ་འདུག
“ང་ཚོ་མི་རབས་ནས་མི་རབས་མང་པོར་ས་གནས་འདིར་འཚོ་བ་སྐྱེལ་བཞིན་ཡོད་པ་དང་། རྫོང་གསར་པའི་ནང་གནས་སྤོ་བྱས་པའི་རྗེས་འཚོ་ཐབས་གང་ལ་བརྟེན་དགོས་མིན་ད་ལྟ་ཤེས་ཀྱི་མི་འདུག”
— ས་གནས་བོད་མི་ཞིག་གིས།
རྒྱ་ནག་གཞུང་འབྲེལ་གྱི་བརྒྱུད་ལམ་ཐོག་གནས་ཚུལ་སྤེལ་བར་གཞིགས་ན། བདེ་ཆེན་རྫོང་གནས་ཡུལ་དུ་ས་རུད་དང་ཆུ་ལོག་གི་ཉེན་ཁ་ཆེ་བའི་གྲོག་རོང་དོག་པོ་ཞིག་ཡིན་པ་དང་། མ་འོངས་པར་རྒྱ་བསྐྱེད་བྱེད་དཀའ་བ་སོགས་རྒྱུ་མཚན་དུ་བརྗོད་དེ་གནས་སྤོའི་ལས་གཞི་འདི་སྤེལ་ཡོད་པ་བརྗོད་འདུག འོན་ཀྱང་བདེ་ཆེན་ཁུལ་གྱི་གནས་སྟངས་ལ་རྒྱུས་མངའ་ཡོད་པའི་མི་སྣ་ཞིག་གིས་གནས་སྤོ་བྱེད་པའི་གནས་ཚུལ་དེ་མ་བྱུང་པའི་སྔོན་ལ་བདེ་ཆེན་རྫོང་གི་གཡས་གཡོན་དུ་གཏེར་ཁ་མང་པོ་བསྔོག་འདོན་བྱས་པ་སོགས་ཀྱི་རྐྱེན་པས་ས་གཤིས་ལ་གནོད་འཚེ་ཆེན་པོ་བྱུང་ཡོད་པ་དང་། བདེ་ཆེན་བོད་རིགས་རང་སྐྱོང་ཁུལ་ནང་དུ་ཆུ་མཛོད་གློག་ཁང་གི་ལས་གྲ་ཡང་ཁག་ཅིག་སྤེལ་བཞིན་ཡོད་པའི་ཐོག་བདེ་ཆེན་རྫོང་ནང་ཕྱི་མི་གནས་སྤོ་བྱེད་མཁན་ཡང་མང་པོ་སླེབས་ཏེ་རྫོང་གི་མི་འབོར་ཕར་སྣོན་བྱུང་ཡོད་པ་སོགས་གསུང་མཁན་བྱུང་། བདེ་ཆེན་རྫོང་གནས་སྤོ་བྱ་རྒྱུའི་ལས་གཞི་འདིའི་ཐོག་མང་ཚོགས་ཁྲོད་ཕྱི་གསལ་ནང་གསལ་གྱི་གྲོས་བསྡུར་གང་ཡང་བྱས་མི་ནུས་པར་གཞུང་གིས་བཀོད་སྒྲིག་བྱས་པ་དེའི་འོག་སྐྱོད་དགོས་ཀྱི་ཡོད་པ་བརྗོད་མཁན་བྱུང་།
“གནས་སྤོ་བྱ་རྒྱུར་སྒུག་ནས་འདོད་རྒྱུ་ལས་འདོད་མོས་ཀྱི་གདམ་ཀ་གཞན་གང་ཡང་མི་འདུག”
— ས་གནས་བོད་མི་ཞིག་གིས་གསུངས།
གནས་སྤོ་བྱ་ཡུལ་གཡུ་འབྲུག་གྲོང་རྡལ་འདི་ནི་བོད་བཙན་པོའི་རྒྱལ་ཁབ་ཀྱི་སྐབས་ནས་བོད་ཀྱི་ཁོངས་སུ་གཏོགས་ན་ཡང་ཕྱིས་སུ་བོད་མི་གནས་སྡོད་བྱེད་མཁན་མང་པོ་མེད་པ་དང་། ས་ཆ་འདིར་ཡུན་ནན་ནས་བོད་རང་སྐྱོང་ལྗོངས་ཟེར་བའི་བར་གྱི་རི་ལིའི་ལྕགས་ལམ་གྱི་འཛུགས་སྐྲུན་ལས་གཞི་འདིའི་ས་ཚིགས་འཁེལ་ཡོད་འདུག་ལ། རི་ལིའི་ལྕགས་ལམ་འཛུགས་སྐྲུན་དེ་ཡང་རྒྱ་ནག་གཞུང་གི་ཐབས་ཇུས་ཤིག་ཡིན་པར་ངོས་འཛིན་བྱེད་ཀྱི་ཡོད་ཅིང་། ཕྱི་ལོ་ ༢༠༢༦ ལོ་འདི་ནི་རྒྱ་ནག་གི་ལོ་ལྔ་ཚན་བཅོ་ལྔའི་འཆར་གཞི་དངོས་སུ་ལག་བསྟར་འགོ་འཛུགས་བྱེད་པའི་ལོ་ཞིག་ཆགས་ཡོད་པར་བརྟེན། བོད་ནང་རྒྱ་ནག་གཞུང་གིས་སྤེལ་བའི་ལས་གཞི་མང་དག་ཅིག་གི་ཁྲོད་ནས་ས་གནས་བོད་མིའི་ཆོས་དང་རིག་གཞུང་། འཚོ་བའི་གནས་སྟངས་སོགས་འཚོ་གནས་དང་འབྲེལ་བའི་ཐོག་དོ་ཕོག་ཤུགས་ཆེན་འགྲོ་རྒྱུ་ཡིན་པར་གནད་དོན་དབྱེ་ཞིབ་པས་ངོས་འཛིན་གནང་གི་འདུག
ད་ལྟ་བདེ་ཆེན་རྫོང་ནང་བོད་མི་རྒྱུན་སྡོད་མི་འབོར་ཁྲི་བརྒྱད་མ་ཟིན་ཙམ་དང་བརྒྱ་ཆ་ ༧༦ ཙམ་ཆགས་ཡོད་ཅིང་། ཞིང་ལས་དང་འབྲོག་ལས་གཉིས་ཀ་ཡོད་པའི་རྫོང་ཞིག་ཡིན་པ་རེད། བདེ་ཆེན་རྫོང་གི་ནང་དུ་འཇོལ་དགའ་ལྡན་བདེ་ཆེན་གླིང་དགོན་པ་དང་དེ་བཞིན་ཉེ་འཁྲིས་སུ་ཇོ་བོ་ནམ་མཁའ་བཀྲིས་ལྷ་ཁང་། དགའ་ལྡན་དོན་གྲུབ་གླིང་སོགས་རྩ་ཆེའི་དགོན་པ་ཆགས་ཡོད་ལ། ཁུལ་འདིར་ཆགས་པའི་གནས་ཆེན་ཁ་བ་དཀར་པོ་ནི་བོད་མི་དང་ཡུལ་སྐོར་བ་སྐྱོད་ཡུལ་གཙོ་བོ་ཞིག་ཀྱང་ཆགས་ཡོད་ལ། ཉེ་ཁོར་གྱི་དགོན་པ་ཁག་ཅིག་རི་མཐོ་སར་གནས་ཡོད་པས། དགོན་པ་དང་མང་ཚོགས་ཀྱི་དབར་རྒྱང་ཐག་རིང་དུ་འགྲོ་རྒྱུ་ཡིན་པ་བརྗོད་མཁན་ཡང་འདུག བདེ་ཆེན་བོད་རིགས་རང་སྐྱོང་ཁུལ་ཟེར་བ་འདི་ཕྱི་ལོ་ ༡༩༥༧ ལོར་བཙུགས་ནས་ད་ལྟ་གནས་སྤོ་བྱ་ཡུལ་ས་གནས་འདི་བདེ་ཆེན་རྫོང་ཞེས་ཁུལ་འདིའི་ལྟེ་གནས་རྫོང་གྲོང་བཟོས་འདུག
ཡང་གནའ་བོ་ནས་ཆགས་པའི་བདེ་ཆེན་རྫོང་རྙིང་པ་འདི་མ་འོངས་པར་གང་འདྲ་ཞིག་ཏུ་འགྱུར་སྲིད་མིན་ཐད་མང་ཚོགས་ཁྲོད་བགྲོ་གླེང་ཡོང་གི་ཡོད་པའི་ནང་། ཁུལ་འདིར་ཡུལ་ལྗོངས་མཛེས་ཤིང་རྩ་ཆེའི་གནས་རི་ཡོད་པར་བརྟེན། ཡུལ་སྐོར་བྱེད་ཡུལ་གྱི་ཁུལ་ཞིག་བཟོ་སྲིད་པ་བརྗོད་མཁན་དང་། ཡང་གཏེར་ཁ་བསྔོག་འདོན་གྱི་ལས་གྲ་རྒྱ་ཆེ་རུ་གཏོང་སྲིད་པ། དེ་མིན་ཆུ་མཛོད་གློག་ཁང་གི་ལས་གཞི་ཡོད་སྲིད་པ་སོགས་བརྗོད་མཁན་ཡང་འདུག
དེ་སྔོན་བདེ་ཆེན་བོད་རིགས་རང་སྐྱོང་ཁུལ་ནང་དུ་གནས་སྤོའི་ལས་གཞི་དེ་རིགས་སྤེལ་བའི་ཁྲོད་ནས་མང་ཚོགས་ཀྱི་ངོ་རྒོལ་བྱས་པའི་གནས་ཚུལ་ཡང་ཐོན་མྱོང་ཡོད་ཅིང་། གནས་སྤོའི་ལས་གཞི་འདིའི་ཁྲོད་ནས་བོད་མིའི་འཚོ་བའི་གོམས་གཤིས་དང་། བོད་ཀྱི་ཆོས་དང་རིག་གཞུང་། ཁོར་ཡུག སྲོལ་རྒྱུན་གྱི་སྤྱི་ཚོགས་འབྲེལ་ལམ་སོགས་ལ་ཤུགས་རྐྱེན་ཐེབས་རྒྱུ་ཡིན་པར་ངོས་འཛིན་བྱེད་མཁན་ཡོད་འདུག།
བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།