རྒྱ་ནག་གཞུང་གིས་ཡུན་ནན་ཞིང་ཆེན་ཁོངས་སུ་བཅུག་པའི་བདེ་ཆེན་བོད་རིགས་རང་སྐྱོང་ཁུལ་གྱི་བདེ་ཆེན་རྫོང་འདི་བཞིན་ས་གནས་མང་ཚོགས་ཀྱི་འདོད་མོས་ཡོད་མེད་ལ་མ་བལྟོས་པར་གཞུང་གིས་བཀོད་སྒྲིག་བྱས་པའི་འོག་གནས་སྤོ་བྱེད་བཅུག་བཞིན་ཡོད་པ་འདི་ནི་བོད་མིའི་འགྲོ་བ་མིའི་ཐོབ་ཐང་ལ་རྡོག་རོལ་མུ་མཐུད་གཏོང་བཞིན་ཡོད་པ་དང་། རྒྱ་ནག་གཞུང་ངོས་ནས་འཛུགས་སྐྲུན་གྱི་ལས་གཞི་དང་འབྲེལ་ཏེ་བོད་མི་གནས་སྤོ་བྱེད་བཅུག་བཞིན་ཡོད་པའི་ཐད་ལ་ཕྱི་གསལ་ནང་གསལ་དགོས་གལ་ཆེན་པོ་ཡིན་པར་བོད་གནས་ཉམས་ཞིབ་པ་ཚོས་ངོས་འཛིན་གནང་གི་འདུག
བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས། བདེ་ཆེན་རྫོང་ཙམ་མིན་པར་རྒྱ་ནག་གཞུང་གིས་བོད་ཀྱི་ས་ཁུལ་མང་དག་ཅིག་གི་ནང་ཆུ་རགས་སོགས་ཀྱི་འཛུགས་སྐྲུན་ལས་གཞི་སྤེལ་བའི་ཁྲོད། ཁུལ་དེར་གནས་སྡོད་བྱེད་མཁན་གནས་མང་ཚོགས་ཀྱི་འཚོ་བར་དཀའ་ངལ་ཆེན་པོ་འཕྲད་ཡོད་པས། རྒྱ་ནག་གཞུང་ངོས་ནས་བོད་ནང་འཛུགས་སྐྲུན་སོགས་ཀྱི་ལས་གཞི་གང་རུང་ཞིག་སྤེལ་ཆེད་བོད་མི་རྣམས་བཙན་དབང་གིས་གནས་སྤོ་བྱེད་བཅུག་བཞིན་པའི་ཐད། ཕྱི་གསལ་ནང་གསལ་དང་གནས་སྡོད་བོད་མི་རྣམས་ཀྱི་མངོན་འདོད་འགྲུབ་དགོས་གལ་ཆེ་བ་རེད་ཅེས་གསུངས་བྱུང་ལ།
ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་ཕྱི་ཟླ་ ༣ ཚེས་ ༤ ཉིན་ལོ་འཁོར་སྙན་ཐོ་འདོན་སྤེལ་གནང་ཡུལ་དུ། ལྷན་ཚོགས་ཀྱི་ཚོགས་ཟུར་དང་ལས་ཐོག་འགན་འཛིན་ཚོགས་མི་ སིཊི་ཕན་ ཤནེཀི་ (Stephen Schneck) ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་གི་བཅར་འདྲི་དྭང་ལེན་གནང་སྟེ་གསུངས་པར། “རྒྱ་ནག་གིས་བོད་ཀྱི་ཆོས་ལུགས་རྣམས་རྒྱ་ནག་ཅན་དུ་སྒྱུར་རྒྱུ་དང་། ཡུ་གུར་མི་རིགས་ཚོའི་ཐོག་ལ་གཅིག་མཚུངས་ཀྱི་ཐབས་བྱུས་འཛིན་གྱི་ཡོད་པའི་ཐད་ལ་ཐུགས་འཚབ་ཡོད་ཅེས་“ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་། ཁོང་གིས་མུ་མཐུད་གསུངས་པར། བོད་བདེ་ཆེན་རྫོང་གི་ནང་དུ་བོད་མི་མང་པོ་ཞིག་གནས་སྤོ་བྱེད་འཇུག་གི་ཡོད་པའི་གནད་དོན་ཐད་ལ་ཐུགས་འཚབ་ཡོད་པ་དང་། འདི་འདྲའི་སྲིད་བྱུས་ཤིག་ཤིན་ཅང་ནང་ཡུ་གུར་མི་རིགས་ཐོག་ལའང་ལག་བསྟར་བྱེད་ཡོད་པ་རེད་“ ཅེས་གསུངས་བྱུང་།
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཟླ་བ་བཀྲ་ཤིས་ལགས་ཀྱིས། ཕྱི་ལོ་ ༢༠༢༡ ལོར་རྒྱ་ནག་དམར་ཤོག་ཚོགས་པ་བཙུགས་ནས་ལོ་ངོ་བརྒྱ་འཁོར་བ་དང་བསྟུན། རྒྱ་ནག་ནང་དབུལ་ཕོངས་ཉམས་ཐག་མེད་པ་བཟོ་རྒྱུའི་ཡུལ་སྤོས་དབུལ་བསྒྱུར་གྱི་སྲིད་བྱུས་ལག་བསྟར་བྱེད་བཞིན་ཡོད་ཀྱང་། ལུང་པ་གཅིག་ནས་ལུང་པ་གཞན་ཞིག་ཏུ་གནས་སྤོ་བཅུག་སྲོལ་ནི་དེ་སྔ་དམག་འཁྲུག་དང་ནད་ཡམས། མུ་གེ་སོགས་བྱུང་སྐབས་ས་གནས་སུ་སྡོད་མི་ཐུབ་པའི་གནས་སྟངས་འོག་ཡོང་གི་ཡོད། བོད་ནང་དེ་ལྟ་བུའི་གནས་སྟངས་གང་ཡང་མེད་པར་གནས་སྤོ་བྱེད་བཅུག་སྐབས། གཙོ་བོ་ས་གནས་མང་ཚོགས་ཀྱི་རེ་བ་དང་མངོན་འདོད་དང་མཐུན་པའི་ཐོག་ནས་སྤྱི་ཚོགས་ཡར་རྒྱས་གཏོང་དགོས་གལ་ཆེ་བ་རེད་ཅེས་གསུངས་བྱུང་།
རྒྱ་ནག་གཞུང་འབྲེལ་གྱི་བརྒྱུད་ལམ་ཐོག་གནས་ཚུལ་སྤེལ་བར་གཞིགས་ན། བདེ་ཆེན་རྫོང་གི་གནས་ཡུལ་དུ་ས་རུད་དང་ཆུ་ལོག་གི་ཉེན་ཁ་ཆེ་བའི་གྲོག་རོང་དོག་པོ་ཞིག་ཡིན་པ་དང་། མ་འོངས་པར་རྒྱ་བསྐྱེད་བྱེད་དཀའ་བ་སོགས་རྒྱུ་མཚན་དུ་བརྗོད་དེ་གནས་སྤོའི་ལས་གཞི་འདི་སྤེལ་ཡོད་པ་བརྗོད་འདུག འོན་ཀྱང་བདེ་ཆེན་ཁུལ་གྱི་གནས་སྟངས་ལ་རྒྱུས་མངའ་ཡོད་པའི་མི་སྣ་ཞིག་གིས་གནས་སྤོ་བྱེད་པའི་གནས་ཚུལ་དེ་མ་བྱུང་པའི་སྔོན་ལ་བདེ་ཆེན་རྫོང་གི་གཡས་གཡོན་དུ་གཏེར་ཁ་མང་པོ་བསྔོག་འདོན་བྱས་པ་སོགས་ཀྱི་རྐྱེན་པས་ས་གཤིས་ལ་གནོད་འཚེ་ཆེན་པོ་བྱུང་ཡོད་པ་དང་། བདེ་ཆེན་བོད་རིགས་རང་སྐྱོང་ཁུལ་ནང་དུ་ཆུ་མཛོད་གློག་ཁང་གི་ལས་གཞི་ཡང་ཁག་ཅིག་སྤེལ་བཞིན་ཡོད་པའི་ཐོག་བདེ་ཆེན་རྫོང་ནང་ཕྱི་མི་གནས་སྤོ་བྱེད་མཁན་ཡང་མང་པོ་སླེབས་ཏེ་རྫོང་གི་མི་འབོར་ཕར་སྣོན་བྱུང་ཡོད་པ་སོགས་གསུང་མཁན་བྱུང་།།
བརྙན་པར་སྒྲིག་སྦྱོར་བ། བསྟན་འཛིན་དོན་ཡོད།