ཨ་རི་གཞུང་གིས་རྒྱ་ནག་ལ་༧གོང་ས་ཏཱ་ལའི་བླ་མ་མཆོག་དང་བོད་བརྒྱུད་ནང་བསྟན་གྱི་བླ་སྤྲུལ་གྱི་ཡང་སྲིད་ངོས་འཛིན་ཞུ་ཕྱོགས་ཐད་རྒྱ་ནག་གཞུང་གིས་ཐེ་ཇུས་བྱེད་མཚམས་འཇོག་དགོས་པ་དང་། ཆོས་དད་རང་དབང་ལ་བརྩི་བཀུར་བྱེད་དགོས་པའི་འབོད་སྐུལ་གནང་འདུག
དེ་ཡང་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་ཕྱི་ཟླ་ ༣ ཚེས་ ༤ ཉིན་ལོ་འཁོར་སྙན་ཐོ་ཞིག་བཏོན་ཡོད་པ་དེའི་ནང་། ༧གོང་ས་མཆོག་གི་ཡང་སྲིད་ཐད་ཐེ་ཇུས་བྱེད་པར་གདོང་ལེན་དང་། བོད་ཀྱི་ཆོས་དད་རང་དབང་གི་གནད་དོན་ཐད་ཨ་རིའི་གཞུང་གིས་ལས་དོན་སྒྲུབ་དགོས་པའི་རྒྱབ་གཉེར་གནང་ཡོད་པ་ལྟར། ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཞིག་གིས་སྙན་ཐོ་དེར་དགའ་བསུ་དང་འབྲེལ་རྒྱབ་གཉེར་གྱི་དོན་ཁག་ལ་ཞིབ་ཚགས་ངང་ལྟ་ཞིབ་བྱ་རྒྱུ་ཡིན་ཞེས་ཨེ་ཤེ་ཡ་རང་དབང་རླུང་འཕྲིན་ཁང་ལ་ཡིག་ཐོག་ནས་གསལ་བཤད་གནང་བྱུང་།
གསལ་བཤད་ལན་འདེབས་དེའི་ནང་། བོད་ཀྱི་ནང་པ་ཚོར་ཆོས་ལུགས་གཞན་རྣམས་དང་གཅིག་མཚུངས་ངང་ཆོས་ལུགས་ཀྱི་དབུ་ཁྲིད་རྣམས་ངོས་འཛིན་དང་། ཤེས་ཡོན་སློབ་གསོ་སྤྲོད་པ། གུས་བཀུར་ཞུ་རྒྱུར་གཞུང་གིས་ཐེ་ཇུས་མེད་པ་ཞིག་དགོས་པའི་ཡིད་ཆེས་བྱེད་ཀྱི་ཡོད་ཅེས་དང་། ༧གོང་ས་ཏཱ་ལའི་བླ་མ་སྐུ་ཕྲེང་ ༡༥ པ་ཚུད་པའི་བོད་བརྒྱུད་ནང་བསྟན་གྱི་དབུ་ཁྲིད་རྣམ་པའི་ཡང་སྲིད་ངོས་འཛིན་ཞུ་རྒྱུ་ནི། བོད་བརྒྱུད་ནང་བསྟན་གྱི་དད་ལྡན་པར་དབང་བའི་ཆོས་ཕྱོགས་ཀྱི་གནད་དོན་ཁོ་ན་རེད་ཅེས་བཀོད་གནང་འདུག
ཡང་ཨ་རིའི་ཕྱི་སྲིད་ལས་ཁུངས་ཀྱིས་ཡིག་ཐོག་ནས་གསལ་བཤད་གནང་པ་དེའི་ནང་མུ་མཐུད་བཀོད་པར། བོད་མིའི་འགྲོ་བ་མིའི་ཐོབ་ཐང་གོང་འཕེལ་གཏོང་བ་དང་བོད་མིའི་ཐུན་མོང་མ་ཡིན་པའི་ལོ་རྒྱུས་དང་སྐད་ཡིག རིག་གཞུང་། ཆོས་ལུགས་ཀྱི་རྒྱུན་སྲོལ་རྣམས་སྲུང་སྐྱོབ་བྱེད་པའི་ལས་དོན་ལ་ཨ་མི་རི་ཀས་རྒྱབ་སྐྱོར་བྱ་རྒྱུར་ཆོད་སེམས་བརྟན་པོ་ཡོད་ཅེས་བཀོད་འདུག
ད་དུང་ཨ་རིའི་གཞུང་གི་སྲིད་བྱུས་དང་། ལས་གཞི། ལས་འཆར་རྣམས་ཕྱི་ལོ་ ༢༠༠༢ལོའི་བོད་ཀྱི་སྲིད་བྱུས་ཀྱི་ཁྲིམས་ཡིག་དང་། ཕྱི་ལོ་ ༢༠༢༠ ལོའི་བོད་ཀྱི་སྲིད་བྱུས་དང་རྒྱབ་སྐྱོར་གྱི་ཁྲིམས་ཡིག ཕྱི་ལོ་ ༢༠༢༤ལོའི་བོད་རྒྱའི་རྩོད་རྙོག་སེལ་བར་སྐུལ་འདེད་གཏོང་བའི་ཁྲིམས་ཡིག་བཅས་ཀྱི་འབྲུ་དོན་དང་འབྲེལ་ལས་དོན་ཁག་ལ་ཨ་རིའི་གཞུང་གི་བོད་དོན་ཆེད་ཀྱི་དམིགས་བསལ་འབྲེལ་མཐུད་པ་བྷརནསི་མཆོག་གིས་འགན་ཁུར་གནང་གི་ཡོད་ཅེས་གསུངས་འདུག
ཨ་རིའི་ཕྱི་སྲིད་དྲུང་ཆེ་མརྐོ་རུ་བྷི་ཡོ་མཆོག་གིས་ཕྱི་ཟླ་ ༢ ཚེས་ ༡༧ ཉིན་ཨ་རིའི་ཕྱི་སྲིད་ལས་ཁུངས་ཀྱིས་བློན་ཆེན་རིམ་པ་བཞི་པའི་གོ་གནས་ཡོད་པ་ Assistant Secretary Riley Barnes མཆོག་བོད་དོན་ཆེད་ཀྱི་དམིགས་བསལ་འབྲེལ་མཐུད་པར་བསྐོ་གཞག་གནང་སྐོར་ཡོངས་ཁྱབ་ཀྱི་གསལ་བསྒྲགས་གནང་ཡོད་ཅིང་། བོད་དོན་དམིགས་བསལ་འབྲེལ་མཐུད་པའི་ངོས་ནས་ཕྱི་སྲིད་ལས་ཁུངས་སུ་བོད་ཀྱི་ལོ་གསར་སྲུང་བརྩིའི་སྐབས་ཆེད་ཕེབས་ཀྱིས་བོད་ཀྱི་ལོ་གསར་སྲུང་བརྩི་ཞུ་མཁན་ཡོངས་ལ་འཚམས་འདྲི་གནང་ཡོད་པ་དང་། བོད་དོན་ཆེད་དམིགས་བསལ་འབྲེལ་མཐུད་པས་མཛད་སྒོའི་ཐོག་བོད་དོན་ནི་ངའི་སེམས་ནང་ཧ་ཅང་གལ་ཆེན་པོ་ཡིན་པ་དང་། ལས་གནས་འདིའི་ནང་ཞབས་འདེགས་ཞུ་རྒྱུ་བྱུང་བ་འདི་ཆེ་མཐོང་ཞིག་ཏུ་ངོས་འཛིན་ཞུ་བཞིན་ཡོད་ཅེས་དང་། བོད་མི་རིགས་ཀྱི་ཐུན་མོང་མ་ཡིན་པའི་རིག་གཞུང་དང་། སྐད་ཡིག ཆོས་ལུགས་བཅས་ལ་ཐེ་ཇུས་ཀྱི་འཇིགས་སྣང་མི་ཡོང་བར་སྲུང་སྐྱོབ་བྱ་རྒྱུའི་ཆོད་སེམས་བརྟན་པོ་ཡོད་ཅེས་ཀྱང་གསུངས་ཡོད།།
བརྙན་པར་སྒྲིག་སྦྱོར་བ། ནོར་སྡེ་སྒྲོལ་མ།