Америка буниңдин кейин хитай билән узун муддәт соғуқ уруш қиламду?

Әгәр америка буниңдин кейин хитайниң өзини асиядики күчлүк дөләт дәп җакарлишини қобул қилмиса, хитай билән америка оттурисида уруш йүз бериши мумкин.
Мухбиримиз вәли
2011-04-05
Share
Cronin-Patrick-LowRes-305.jpg Йеңи америка бихәтәрлик истратегийиси тәтқиқат мәркизиниң асия-тинч окян программа мудири доктор патрик кронин.
www.cnas.org

Йеңи америка бихәтәрлик истратегийиси тәтқиқат мәркизиниң асия-тинч окян программа мудири доктор патрик кронин, 3‏-айниң 31-күни өзиниң файсбук тор бетидә елан қилған обзорида, һазирқи америка-хитай мунасивити үстидә мулаһизә йүргүзүп, әгәр америка буниңдин кейин хитайниң өзини асиядики күчлүк дөләт дәп җакарлишини қобул қилмиса, хитай билән америка оттурисида уруш йүз бериши мумкин дегән тәсәввурни оттуриға қойған иди. У тәсәввурида йәнә тәмкин һалда, америка буниңға хели бурунла тәйярлиқ көрүп болған, дәп көрсәткән иди.

Доктор патрик кронинниң обзоридики бу тәсәввурни алди билән хитайчә чиқидиған довей тор гезити көчүрүп басти вә буниңға даир мунасивәтлик учурларни топлап, бу һәқтики мәхсус темисини һәр күни толуқлап-йеңилап туруватиду. Гезит гуруһи дәп атилидиған хитай мәбләғлири австралийидә вә явропада чиқириватқан гезитләрдә, һәтта хитайниң дөләт ичидики һәрбий, дипломатийә, пән-техника, әдәбият-сәнәт саһәлириниң хилму-хил тор гезитлиридиму, америка буниңдин кейин хитай билән узун муддәт соғуқ уруш қилиду, дегән көз қарашни кеңәйтип сөзләшкә башлиди.

Хитайчә учур васитилири һазир, америка буниңдин кейин хитай билән узун муддәт соғуқ уруш қилиду, дегән көз қарашни испатлаш үчүн, америкидики йеңи америка бихәтәрлик истратегийиси тәтқиқат мәркизиниң асия-тинч окян программа мудири доктор патрик кронинниң “әгәр америка буниңдин кейин хитайниң өзини асиядики күчлүк дөләт дәп җакарлишини қобул қилмиса, хитай билән америка оттурисида уруш йүз бериши мумкин”, “америка буниңға хели бурунла тәйярлиқ көрүп болған” дегән тәһлилини тәкрар-тәкрар нәқил кәлтүргәндин башқа, австралийә президенти җулия гиллард ханимниң америка-австралийә мунасивити һәққидики тәшәббусиниму, хитай учур васитилири өзлири көтүрүп чиққан “америка буниңдин кейин хитай билән узун муддәт соғуқ уруш қилиду” дегән көз қарашниң испати дәп көрсәтмәктә.

Хитайчә гезитләрниң бир-биридин көчүрүп вә кеңәйтип баян қилинишичә, австралийә президенти җулия гиллард ханим америкини зиярәт қилғанда, америка билән австралийә һәрбий мунасивәтни кеңәйтип, ортақ дүшмәнгә биллә қарши туруш керәк дегән тәшәббусни оттуриға қойған. Австралийиниң хәлқара сиясәт тәтқиқатчиси вайт елан қилған мақалиләрдиму, хитайниң күчлиниватқанлиқи---америкиниң асия-тинч окян районидики йетәкчилик орниға қилинған риқабәт, хитайниң кеңийишини чәкләштә, австралийә чоқум америка билән бирлишип һәрикәт қилиши керәк, дәп көрсәткән.

Хитайчә учур васитилири, америка кеңәш палатасиниң пешқәдәм әзаси җоһн меккайнниң, хитай күчийип кәткәнлики үчүн америка билән хитай оттурисида уруш йүз бериши натайин, биз хитайниң һәрбий күчини чоң күч дәп мөлчәрлимәймиз, әмма һәр еһтималға қарши тәйярлиқ болуш керәк, бундақ тәйярлиқларниң ичидә, америка билән австралийиниң бирлишип һәрикәт қилиши, хитайниң асия-тинч окян районидики кеңийишини чәкләштә әң тез үнүм беридиған чарә, чүнки бир районда бирдин көп дөләтниң бир қаидигә риайә қилиши бир ғайәт зор күч дәп көрсәткәнликиниму, хитайлар өзлири һазир көтүрүп чиққан “америка буниңдин кейин хитай билән узун муддәт соғуқ уруш қилиду” дегән көз қарашниң йәнә бир испати қилип көрсәткән.

Хитайчә учур васитилиридә йәнә, америка ташқи ишлар министирлиқиниң шәрқий асия-тинч окян ишлириға мәсул муавин башлиқи камбериниң америка-хитай мунасивити һәққидики сөзлириниму, хитайлар өзлири һазир көтүрүп чиққан “америка буниңдин кейин хитай билән узун муддәт соғуқ уруш қилиду” дегән көз қарашниң испати дәп көрсәткән.

Хитайчә гезитләрниң бир-биридин көчүрүп вә кеңәйтип баян қилинишичә, америка ташқи ишлар министирлиқиниң шәрқий асия-тинч окян ишлириға мәсул муавин башлиқи камбери қилған сөзлиридә, америкиниң асия-тинч окян истратегийисиниң әң тәврәнмәс асаси-бу районда демократийини вә кишилик һоқуқни қоллаш, хәлқниң диний вә пикир баян қилиш әркинликини қанат яйдуруш, америкиниң узун муддәтлик мәнпәити дегән мушу, асияда 21-әсирдә йүз беридиған өзгириш дәл мушу сәһнидә намаян қилиниду, бу, америкиниң мушу районға қошидиған әң чоң төһписи болуп қалиду, дегән. Шундақла у йәнә, америка өзиниң пүтүн йәр шари иқтидарини дәл мушу сәһнидә тәпсилий намаян қилиду, дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт