'Голдмән сакс' гуруһиниң мәқсити хитайни ғулитишму?

"Голдмән сакс" америкиниң валл стрет сода базиридики әң чоң пай чәк вә пул муамилә гәвдисидин ибарәт болуп, униң дуняниң һәрқайси җайлирида, болупму хитайда тәсир даирисиниң зорлуқи мәлум.

Китабниң 1- баби "хитайни ғулитиш"

Аптор китабида америкида йүз бәргән дуняға тәсир көрсәткән иқтисади кризисни "голдмән сакс" ширкитиниң, америка пай чәк базирида сахтипәзлик қилғанлиқи вә америка хәлқини қақти - соқти қилғанлиқи сәвәбидин келип чиққан дегән идийини илгири сүргән.

"Голд мән сакс сүйиқәсти " намлиқ китабниң 1-баби "хитайни ғулитиш" тин ибарәт болуп, аптор китабида "голдмән сакс" ниң америкидин қалса хитайда тәсириниң зорлуқини, узун йиллардин буян бу ширкәтниң хитай йеза игилик банкиси вә хитай мәркизи банкилири сатқан пайдини хәлққә өтүнүп бериш характеридики пайчәклириниң зор бир қисмини сетивалғанлиқини, һазир хитай иқтисадиниң асасән "голдмән сакс" ширкитиниң қолида икәнликини, америка иқтисадини чөктүргән бу ширкәтниң әмдики нишаниниң дуня бойичә 2- орунда туридиған иқтисади күчлүк дөләт хитайни ғулитиш икәнликини илгири сүргән.

"Голдмән сакс сүйиқәсти" намлиқ китабта бу ширкәтниң, америка иқтисади саһәсидики сахтипәзликигә аит нурғунлиған дәлил ‏- испатларни көрсәткән болуп, аптор бу һәқтә америка сотиниң дәлил ‏- испатлириниму киргүзгән. У йәнә китабида америка һөкүмәт әмәлдарлириниң "голдмән сакс" ширкитидә мәлум әмили барлиқини, америка юқири тәбиқә әмәлдарлириниң пәрдә арқисида нурғунлиған йошурун сүйиқәстләрни пиланлаватқанлиқини, әмдики нөвәтниң хитайға кәлгәнликини илгири сүргән.

Аптор "голдмән сакс" ни түлкиниң сөңәк ғаҗилишиға охшатқан

Хитайниң, хитай җәмийитидә вәһимә пәйда қилидиған китаб- журналларниң сетилишини қаттиқ контрол қилғиниға қаримай, "голд мән сакс"ниң хитайда чиқидиған сина торидики сетилиш миқдари пәвқуладдә юқири болуп, бу йил июндин авғустқичә болған икки ай ичидики сетилиш миқдари 100 миңдин ешип кәткән вә сина тори елан қилған әң яхши сетилған алдинқи қатардики 10 китабниң ичигә киргән. Мәлум болушичә хитай оқурмәнләр, сүйиқәст темилири, юқири тәбиқә әмәлдарлириға аит сәтчиликләр вә драматик туйғуларға бай әсәрләргә интайин майил болуп, бу хил мәзмундики китаблар хитайда интайин тез алқишлинидикән.

Бейҗиңдики "голдмән сакс" иш беҗириш оргини китаб һәққидә бир нәрсә дейишни рәт қилған

Хитай тор бәтлиридики муназирә мәйданлиридин мәлум болушичә, "голдмән сакс сүйиқәсти " намлиқ китабниң хитайда көпләп сетилиши билән, хитай ишчилириниң кәң көләмлик иш ташлиши, хитайда йүз бәргән кәлкүн апити сәвәбидин йүзмиңларчә кишиниң өй ‏- макансиз қелиши сәвәбидин келип чиққан сарасимлар техиму йүксилип, от үстигә яғ чачқандәк тәсир пәйда қилған. Шундақла, хитай иҗтимаий җәмийитидә хитай пат йеқинда ғулайдикән дәйдиған вәһимә пәйда қиливатқанлиқи мәлум.

Хитайниң асаритидә яшаватқан уйғур вә тибәтләрниң, дуняда патмас қуяшниң йоқлуқини, хитайниң һаман бир күни сабиқ советләр иттипақидәк ғулайдиғанлиқини үмид билән җакарлап келиватқанлиқини баян қилған, канада яшаватқан уйғур зиялийси һашимҗан әпәнди өз қарашлирини оттуриға қойди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.