Австиралийәниң аделайд шәһиридә уйғур җамаитиниң учришиши өткүзүлгән

Аделайдтики уйғур җамаити америка аләм қатнишиши идарисиниң мутәхәссиси доктор әркин сидиқ билән канадада яшаватқан дуня уйғур қурултийи муһаҗирлар комитетиниң мудири мәмәт тохти әпәндиләрни қизғин күтүвалди. 2019-Йили 18-феврал, австралийә.

Америка аләм қатнишиши идарисиниң мутәхәссиси доктор әркин сидиқ әпәнди аделайдтики уйғур җамаитиниң учришиш паалийитидә. 2019-Йили 18-феврал, австралийә.

18-Феврал күни мәркизи австиралийәниң аделәйд шәһиригә җайлашқан австиралийә шәрқий түркистан җәмийитиниң уюштуруши билән аделайдтики уйғур җамаитиниң учришиш паалийити өткүзүлгән.

Америка аләм қатнишиши идарисиниң мутәхәссиси доктор әркин сидиқ билән канадада яшаватқан дуня уйғур қурултийи муһаҗирлар комитетиниң мудири мәмәт тохти әпәндиләр бу паалийәткә алаһидә тәклип қилинған һәмдә муһим сөз қилған.

Австиралийә шәрқий түркистан җәмийитиниң рәиси нурмуһәммәд түркистани әпәнди бу һәқтә зияритимизни қобул қилип, бу қетимқи паалийәтниң әһвалини тонуштурди. Нурмуһәмәд түркистани бу қетимқи паалийәтни уюштуруштики мәқсәтниң хитайниң зулумиға қарши туруш, хәлқара җамаәтниң қоллишини қолға кәлтүрүш һәмдә өз ара бирлик-баравәрлик асасида уйғур җамаити арисидики қериндашлиқ меһри-муһәббәтни күчәйтиштин ибарәт икәнликини билдүргән.

Йиғинда уйғур алими әркин сидиқ сөз қилип, һазирқи қийин вәзийәттә муһаҗирәттики уйғурларниң немиләрни қилалайдиғанлиқи һәққидә өз қарашлирини оттуриға қойған.

Мәмәт тохти әпәндиму җамаәткә уйғурларниң нөвәттики вәзийити, дуня уйғур қурултийи муһаҗирлар комитетиниң йеқиндин буян елип барған паалийәтлири һәққидә сөз қилған.

Йиғинда нөвәттә муһаҗирәттики уйғурлар арисида өткүзүлүватқан “мәнму уйғур”, “туғқанлирим қәйәрдә” қатарлиқ паалийәтләрни күчәйтишниң муһимлиқи, австралийәдики уйғурларниңму бу хил паалийәтләргә актип иштирак қилип, уруқ-туғқанларниң рәсимлирини көтүрүп чиқип, хитайниң қәбиһ қилмишлирини дуняға паш қилиши керәклики оттуриға қоюлған.

Йиғинда йәнә дини алим абдусалам алим инсанниң зулумға қарши турушиниң зөрүрлүки, мусибәткә қандақ бәрдашлиқ бериш вә сәбир қилишниң әһмийити шундақла зулумдин қутулушниң чиқиш йолини тепиш тоғрисида “қуран кәрим” дин айәтләрни дәлил көрситип, муһим сөз қилған.

Паалийәт җәрянида йәнә аделайд шәһиридә австралийә бойичә юқири нәтиҗиләр билән оқуватқан 3 нәпәр уйғур алий мәктәп оқуғучиси австралийә шәрқий түркистан җәмийити тәрипидин мукапатланған.