كۆزەتكۈچى ئىلشات ھەسەن ئەپەندى خىتاي تەرەپدارى مۇھاجىر ئابلىمىت سادىقنىڭ پىكىرلىرىگە باھا بەردى

ئاۋسترالىيەدىكى خىتاي تەرەپدارى مۇھاجىر ئابلىمىت سادىق مۇخبىرىمىز بىلەن ئۆتكۈزگەن سۆھبىتى داۋامىدا، ئۇيغۇر رايونىدىكى مەسىلىلەرنىڭ، خىتاي ھۆكۈمىتى بىلەن قارشىلىشىش شەكلىدە ئەمەس، ھۆكۈمەتكە بويسۇنۇش ۋە ھۆكۈمەتكە مەسىلىلەرنى سىلىق يول بىلەن مەلۇم قىلىش ئارقىلىق ھەل بولۇشى كېرەكلىكىنى ئىلگىرى سۈردى، ئەمما ئۇ رايوندا مەسىلە ئوتتۇرىغا قويۇشنىڭ مۇمكىنچىلىكى بولغان بىرەر يولىنى كۆرسىتىپ بېرەلمىدى.

ئابلىمىت سادىقنىڭ سۆزلىرى ئۈستىدە پىكىر بايان قىلغان ئامېرىكىدىكى سىياسىي كۆزەتكۈچى ئىلشات ھەسەن ئەپەندى ئابلىمىت سادىقنىڭ خىتاي بىلەن بولغان مۇناسىۋىتىنى ساقلاش ئۈچۈن ھەق-ناھەقنى ئاستىن-ئۈستۈن قىلىۋاتقانلىقىنى، ھەتتا راست گەپ قىلىشتىن ئىبارەت ئەقەللىي ئەخلاق ئۆلچىمىنىمۇ بىر چەتكە قايرىپ قويۇپ قارىسىغا جۆيلۈۋاتقانلىقىنى بىلدۈردى.