Közetküchiler: jow yongkangning aghdurulushi xitay weziyitige özgirish élip kélelmeydu

Ixtiyariy muxbirimiz ruqiye
2014-12-09
Share
li-kechyang-jaw-yungkang-yongkang.jpg Xitay dölet xewpsizlik idarisining re'isi jaw yongkang yighinda xitay kompartiyisi merkizi komitét siyasiy byurosi da'imiy ezasi li kechyanggha qarap turghan körünüsh. 2007-Yili 22-öktebir, béyjing.
EyePress News

Mushu ayning 5- küni xitay döletlik aliy teptish mehkimisi xitay merkiziy siyasiy qanun komitétining sabiq bash sékrétari jow yongkangning qolgha élinip, xitay kommunist partiyesidin qoghlap chiqirilghanliqini élan qilghandin kéyin, közetküchiler birdek buning xitay dölet tüzülmisige tesir körsitelmeydighanliqini bildürdi.

Xitay prézidénti shi jinping chiriklikke qarshi yuqiri derijilik heriket bashlap, bo shileyge oxshash jow yongkangning sadiqlirini bir birlep tazilashqa bashlighan bolup, jow buning ichidiki "Eng chong béliq" hésablinidiken.

Xitay démokratlar fédératsiyesining kanadada turushluq re'isi shén shö xanim buning yéngi mesile emeslikini otturigha qoyup mundaq dédi: xitay kommunist partiyesi qurulghandin tartip ularning ichidiki siyasiy küresh ezeldin toxtighan emes. Ular dawamliq biri birini siyasiy küresh arqiliq orup kelgen. Liyu shawchi, linbyaw qatarliqlardin tartip ta hazirghiche xitay kommunist partiyesi ichidiki emeldarlar öz'ara küreshte bir birini örüp keldi. Shunga jow yongkangning aghdurulushi héchqanche bir heyran qalarliq, yaki yéngi ish emes.

U yene, jow yongkangning aghdurulushi xitay dölet tüzülmisige héchqandaq tesir körsitelmeydighanliqini bildürüp mundaq dédi: men jow yongkangning aghdurulushi xitay dölet tüzülmisige tesir körsitishige guman bilen qaraymen. Shi gerche chiriklikke qarshi birnechche ishlarni qilghan bolsimu, bu peqet kommunist partiyesining ichidiki siyasiy küresh payda menpe'et kürishi. Bu xuddi bir a'ilining ichidiki shexsiy ishlardek öz ichidila tügep pütün junggoning siyasiy tüzülmisige tesir körsetmeydu. Qachan xitay kommunistik partiyesining pütün tüzümi we we dölet bashqurush yoli özgirip démokratik tuzum tiklenmigechke bu mumkin emes. Uning üstige shi jinpingdek bir mustebit hökümranning kommunistning yol xeritisini tütiwélip, "Qanun bilen dölet bashqurimen" déyishi külkilik ish. Chünki ular qanun'gha emes, peqet xitay kommunist partiyesigila egishidu.

Jow yongkangning wang léchüenning arqa tériki, shundaqla Uyghurlargha qaritilghan atalmish zorawanliqni basturush siyasitige eng chong meblegh ajritip, qattiq qolluqni dawamliq tekitlep kelgen xitay emeldari ikenliki melum.

Xitay ichki tüzülmisining Uyghurlargha körsitidighan tesirini yéqindin közitip kéliwatqan insan heqliri pa'aliyetchisi ilshat hesen ependim bu heqtiki köz qarashlirini bayan qilip mundaq dédi: xitay dölet emeldarliri "Qattiq qol" din, "Yumshaq qol" gha almashsimu, uning sherqiy türkistan'gha bolghan siyasiti özgermeydu. Chünki ularning hemmisi Uyghurlarni talan-taraj qilish we xitayning menpe'itige xizmet qilish üchün kélidu."

U yene tarixtin misal keltürüp Uyghurlarning aldanmasliqini tekitlidi.

Jow yongkang "Köp miqdarda para yégen, dölet mexpiyetlikini ashkarilighan" dégen seweb bilen qolgha élin'ghan bolup, uning 14 milyard dollarliq bayliqi musadire qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet