Йеңисар деһқанлириниң шикайәтнамиси қәшқәр вилайәт һөкүмитидә

Йеңисар деһқанлири өткән һәптә, наһийидә йолға қоюлуватқан мәҗбурий териқчилиқ пилани һәққидә шикайәт филими елан қилған иди. Биз бу мунасивәт билән қәшқәр вилайитиниң алақидар тармақлиридин мәзкур әрз һәққидә мәлумат игилидуқ.
Мухбиримиз шөһрәт һошур
2009-01-12
Share
Dixan-awazi-yengisar-305 'Йеңисарда деһқан болмақ тәс' син - алғусидин елинған бу сүрәттә, йеңисарлиқ уйғур деһқанлири өзлириниң шикайәтнамисини оқуватқан көрүнүш.
Оқурмәнлиримиз әвәткән 'йеңисарда деһқан болмақ тәс' намлиқ син - алғудин елинди.

Қәшқәр вилайәтлик әрзийәт идарисиниң билдүрүшичә, нөвәттә қәшқәрдә әслиһәлик териқчилиқ дәп атилидиған териқчилиқ пилани йолға қоюлмақта. Әслиһәлик териқчилиқ пилани йәрдин үнүмлүк пайдилинишни мәқсәт қилған, бу пилан буйичә, охшаш бир парчә етизға бир қанчә хил зираәт терилиду.

Әслиһәлик териқчилиқ пиланини бәзи мәсул кадирлар қәшқәрдә омумйүзлүк болған, хәлқни еғир зиянға учратқан пилан дәп ашкарилиса, йәнә бәзи кадирлар, бу пиланниң пәқәт йеңисарда мәғлубийәткә учриғанлиқини, башқа наһийиләрдә болса нәтиҗилик болғанлиқини билдүрди.

Бәзи хадимларниң билдүрүшичә, әслиһәлик териқчилиқ пилани әслидә илмийликтин узақ һәм базар иқтисадиниң қанунийитигә хилап болғини үчүн мәғлуп болған.

Йәнә бәзи хадимларниң билдүрүшичә,әслидә пиланда мәсилә йоқ, мәсилә иҗраатта, йәни асасий қатлам кадирлириниң натоғра хизмәт истили пиланниң мәғлуп болушиға сәвәб болуп қалған.

Биз қәшқәр вилайәтлик ревизийә идарисидин бу тоғрилиқ әһвал игилидуқ, мәсул рәһбәрлик әһвалдин хәвәрсизликини билдүрди.

Игилишимизчә, қәшқәр вилайәтлик йеза игилик идариси йеңисар деһқанлириниң әрзини 31 ‏-декабир күни тапшурувалған, әрз көп тәрәплимә мәсилиләргә четилғини үчүн, әрзни вилайәтлик интизам тәкшүрүш комитетиға йоллап бәргән.

Қәшқәр вилайәтлик интизам тәкшүрүш комитети әрзни көздин кәчүргәндин кейин, мәсилини йәнә алди билән наһийиниң ениқлап чиқишиға буйриған. Йәни қәшқәр вилайәтлик парткомниң муавин секретари җаң җйән вилайәтлик интизам тәкшүрүш комитетиниң наһийигә берип әһвал игилишини тосиған.

Йәнә өзини ашкарилашни халимиған мәлум бир рәһбәр, қәшқәр вилайитидә һәқсизлиқ вә йолсизлуқларниң көп икәнликини, йеңисар деһқанлири оттуриға қойған мәсилиниң қәшқәр вилайити үчүн омумйүзлүк бир мәсилә икәнликини, бу мәсилиләрни һәл қилишта өзлириниңму чарисизлик ичидә икәнликини ашкарилиди.

Игилигән мәлуматлиримизда, йеңисар деһқанлириниң әрзиниң һәл болмаслиқида, наһийә билән вилайәт рәһбәрлири арисидики мунасивәт ториниң муһим сәвәбләрдин бири икәнлики байқалмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт