7 دۆلەت گۇرۇھى خىتاينىڭ «شىنجاڭدىكى ھەرىكەتلىرى» دىن ئەندىشە قىلىۋاتقانلىقىنى بىلدۈرگەن

مۇخبىرىمىز ئەركىن
2021-12-13
Share

11 ۋە 12-دېكابىر كۈنلىرى ئەنگلىيەنىڭ لېۋىرپول شەھىرىدە ئ‍ئۆتكۈزۈلگەن G-7، يەنى سانائەتلەشكەن 7 دۆلەت تاشقى ئىشلار مىنىستىرلىرىنىڭ يىغىنى خىتاينى ئاگاھلاندۇرۇپ، ئۇنىڭ «زورلاش خاراكتېرلىك ئىقتىسادى سىياسىتى»، ئۇيغۇر ئېلى ۋە خوڭكوڭدىكى ھەرىكەتلىرىدىن ئەندىشە قىلىۋاتقانلىقىنى بىلدۈرگەن. ئەنگلىيە تاشقى ئىشلار مىنىستىرى لىز ترۇسنىڭ بىلدۈرۈشىچە، ئىككى كۈنلۈك يىغىندا خوڭكوڭ ۋە ئۇيغۇرلار مەسىلىسىنى ئۆز ئىچىگە ئالغان «بىر قاتار مەسىلىلەر ۋە خىرىسلار» مۇزاكىرە قىلىنغان.

لىز ترۇس، مىنىستىرلارنىڭ يەنە بېيجىڭنىڭ شەرقىي ۋە جەنۇبىي دېڭىزدىكى ھەرىكەتلىرىنى مۇزاكىرە قىلغانلىقى، «تەيۋەن بوغۇزىدا تىنچلىق ۋە مۇقىملىقنى قوغداشنىڭ مۇھىملىقى» نى تەكىتلىگەنلىكىنى ئېيتقان. «مۇھاپىزەتچى» گېزىتىنىڭ خەۋەر قىلىشىچە، لىز ترۇس يىغىننىڭ ئالدىدا مۇخبىرلارغا ئۇيغۇرلار توغرىلىق سۆز قىلىپ، «ئىرقىي قىرغىنچىلىق مەسىلىسى سوتنىڭ ئىشى بولسىمۇ، بىراق مەن ئۇيغۇرلارغا قارىتىلغان قورقۇنچلۇق كىشىلىك ھوقۇق دەپسەندىچىلىكىدىن ئىنتايىن ئەندىشە قىلىمەن. مەن بۇنى خىتاي باش ئەلچىسىگە ئېيتتىم» دېگەن.

يىغىندا تەرەپلەر يەنە تېخنولوگىيەنى توغرا ئىشلارغا ئىشلىتىش، خىتاينىڭ ساختا ئۇچۇرىغا قارشى بىرلىشىپ ھەرىكەت قىلىش، ئۇنىڭ قەرز قىلتىقىغا چۈشۈپ قالغان دۆلەتلەرگە ياردەم قىلىش مەسىلىلىرىنىمۇ مۇزاكىرە قىلغان. شۇنداقلا يەنە يىغىن رۇسىيەنى ئۇكرائىنا مەسىلىسىدە ئاگاھلاندۇرغان. يىغىننىڭ باياناتىدا، رۇسىيەنىڭ ئۇكرائىناغا ھۇجۇم قىلسا «ئېغىر ئاقىۋەتكە» قالىدىغانلىقى تەكىتلەنگەن.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت