Abdulqadir yapchanning türkiyede qaytidin nazaretke élinishi küchlük inkas qozghimaqta

Türkiyede yashawatqan diniy ölima we jama'et erbabi abdulqadir yapchanning 29-séntebir küni nezerbenttin qoyup bérilip, aridin bir sotka ötmeyla yene tutulup kétishi küchlük inkas peyda qilmaqta.

Türkiyede chiqidighan “Yéngi shepeq” gézitining xewer qilishiche, abdulqadir yapchan qayta tutulghandin kéyin istanbuldiki bakirköy sülhi jaza sot mehkimisi teripidin 40 künlük nazaretke élin'ghanliqi melum.

Abdulqadir yapchan bu yil xitayda échilghan 20 dölet guruhi bashliqlirining uchrishish yighini harpisida türkiye saqchiliri teripidin 1-séntebirde tutup kétilip 29-séntebir küni gunahsiz dep qoyup bérilgen idi.

Nöwette bakirköy sot mehkimisi abdulqadir yapchanni 40 künlük nazaretke élish hökümini chiqarghan bolup, bu jeryanda türkiyening munasiwetlik edliye tarmaqliri xitay terepning abdulqadir yapchan'gha alaqidar “Pakit” we “Höjjet” lerni türkiye terepke tapshurushini kütidiken.

Abdulqadir yapchan bu yil 58 yashta bolup, u 2001-yilidin buyan türkiyede yashap kelmekte. Uning türkiye wetendashliqigha ötüsh iltimasi hazirgha qeder türkiye hökümiti teripidin ésip qoyulghan.

Xitay da'iriliri 2002-yili abdulqadir yapchanni öz ichige alghan birqanche Uyghurni “Térrorchi” tizimigha kirgüzüp qizil renglik tutush buyruqi élan qilghan idi. Aridin 14 yil ötkendin kéyin xitay terep bu höjjetke tüzitish kirgüzgenlikini bildürüp, abdulqadir yapchanni “Döletni parchilash” jinayiti eyibligenliki melum. Halbuki, közetküchiler abdulqadir yapchanning söz we nutuqlirida yashlarni térrorluq pa'aliyetliridin yiraq turushqa ündesh bilen tonulghan bir shexs ikenlikini ilgiri sürmekte.