Әйдиз африқа өсмүрлириниң җениға әң көп замин болуватқан кесәлгә айланған

Мухбиримиз җүмә
2015.11.28
Share on WhatsApp
Share on WhatsApp

Хәвәрләргә қариғанда, нөвәттә әйдиз африқидики өсмүрләрниң җениға әң көп замин болуватқан кесәлгә айланған.

Б д т балилар фонди җәмийитиниң җүмә күни билдүрүшичә, нөвәттә африқида әйдиз билән өлүп кетидиған 10 яштин 19 яшқичә болған балиларниң сани 2000 - йилдикигә қариғанда 3 һәссә көпәйгән.

Б д т балилар фонди җәмийити әйдиз бөлүми директори крәйг меклуре әйдиз вируси билән туғулған балиларниң өсмүрлүк дәвригә қәдәм қойғанда давалаш йетәрлик болмиғанлиқи үчүн өлүп кетиватқанлиқини билдүргән.

Мәлум болушичә, африқида әйдиз билән туғулмиған балиларму хәвп астида болуп, улар өсмүрлүк вә яшлиқ дәвригә қәдәм қойғанда әйдиз билән юқумлиниш хәтиригә йолуқидикән.

Нөвәттә африқа қитәсидә 15 яштин 19 яшқичә болған яшлардин һәр саәттә 26 си әйдиз билән юқумлинидикән. Буларниң 70 пирсәнтини қизлар игиләйдикән.

Буниң арқисида җинсий сағламлиқ тәрбийәси берилмәслик вә кичик той қилиш қатарлиқ сәвәбләрму бар икән.

Нөвәттә яшларниң әйдиз билән юқумлинип қелиш һадисилириниң 60 пирсәнти сәһрайи кәбирниң төвән тәрипидики дөләтләрдә көрүлидиған болса, америка, һиндистан, һиндонезийә вә биразилийә қатарлиқ әлләрдә өсмүрләрниң әйдиз билән юқумлиниш һадисиси җиддий өрлимәктә икән.

24 - Ноябир уйғур аптоном районлуқ сәһийә даирилири елан қилған йеңи статистикида, бу йил өктәбирниң ахириғичә уйғур елидә байқалған әйдиз юқумдарилири вә әйдиз бимарлириниң омумий сани 38 миң 283 кә йәткәнлики көрситилгән.

Униңда йәнә бу йил уйғур елидә әйдизниң тарқилиш сүритиму бир қәдәр тез болғанлиқи, пәқәт алдинқи 10 ай ичидила 3 миң 890 нәпәр йеңи әйдиз юқумдари байқалғанлиқи тәкитләнгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.