Bügün béyjingdiki amérika elchixanisi aldida partlash weqesi yüz bergen. Melum bolushiche, weqeni sadir qilghuchi dep qariliwatqan jyang famililik gumandar yénik derijide yarilan'ghan. Amérika elchixanisining xadimliri we elchixana binasi héchqandaq ziyan-zexmetke uchrimighan.
Xewerlerde déyilishiche, weqe 26-iyul béyjing waqti sa'et bir mezgilide yüz bergen. Weqe meydanigha tézdin yétip kelgen saqchilar etrapni qorshawgha élip, tekshürüsh élip barghan we yaridar bolghan gumandarni élip ketken. Saqchilar gumandar jyangning ichki mongghul aptonom rayonidin ikenlikini ashkarilighan, emma weqege qozghatquchi sewebning néme ikenliki heqqide melumat bermigen. Roytérs agéntliqining bügünki xewiride bu weqening amérika bilen xitay arisidiki soda urushi keskinleshken bir mezgilige toghra kelgenliki eslitilgen.
Xewerde yene eskertilishiche, tramp hökümiti 34 milyard dollar qimmitidiki xitay mallirigha 25 pirsent chégra béji qoyidighanliqini élan qilghandin kéyin, xitay da'irilirining bayanatliri we xitay dölet axbarat organlirining xewerliride küchlük naraziliq ipadilen'gen. Emma xitay ijtima'iy axbarat wastilirida shiddet weqeliridin isharet bergüdek derijide naraziliq ipadisi körülmigen.
Melum bolushiche, partlash weqesi yüz bergendin kéyinmu béyjingdiki amérika elchixanisining xadimliri normal xizmitini dawamlashturuwergen.
