Хитайни зиярәт қиливатқан америка сода министири хитай билән “сода ишлири хизмәт гурупписи” қурушта бирликкә кәлгән

Америка сода министири җина раймондо (Gina Raimondo) 8-айниң 28-күни хитай сода министири ваң вентав билән көрүшкәндә, икки дөләтниң иқтисадий мунасивитини мустәһкәмләш үчүн “сода ишлири хизмәт гурупписи” қуруш һәққидә бирликкә кәлгән.

CNN Ториниң 28-авғуст күни бәргән хәвиридә ейтилишичә, җина раймондо америка билән хитайниң дуня иқтисадида муһим орун тутидиғанлиқини, өзара қилишқан 700 милярд долларлиқ содидин тәң мәнпәәт еливатқанлиқини, икки дөләтниң муқим иқтисадий мунасивитиниң һәр икки дөләткә пайдилиқ икәнликини билдүргән. Хитай тәрәп болса икки дөләтниң карханилири оттурисидики һәмкарлиқни күчәйтиш, содиға пайдилиқ сиясий муһит яритиш керәкликини тәкитлигән. Наһайити рошәнки, хитайниң бу ипадилири американиң юқири техникилиқ ширкәтләрни хитайға мәбләғ селиш вә хитай ширкәтлири билән һәмкарлишиштин чәкләйдиған қанун чиқириши вә мәҗбурий әмгәк маллирини америкаға киргүзмәслик қанунини йолға қоюши билән мунасивәтлик болуп, җина раймондониң хитайға алаһидә тәклип қилинишиму мушу сәвәбтин дәп қаралмақта икән.

Җина раймондо хитай сода министири ваң вентав билән өткүзгән сөһбәттә, икки тәрәп “сода ишлири хизмәт гурупписи” қурушта бирликкә кәлгән. Бу гуруппа америка билән хитайниң сода әмәлдарлири вә кархана вәкиллирини учраштуруп, сода вә мәбләғ селиш мәсилилирини музакирә қилидикән, оттуридики ихтилапни сөһбәт арқилиқ һәл қилидикән. Әгәр бу гуруппа рәсмий қурулса, 2024-йилдин башлап һәр йили икки қетим йиғин ачидикән.

Сода министири җина раймондониң бу қетимлиқ хитай зиярити байдин һөкүмитиниң хитай билән мунасивитини нормаллаштурушқа тиришчанлиқ көрситишииниң йәнә бир ипадиси дәп қариливатқан болуп, буниңдин илгири ташқи ишлар министири антони блинкеин, малийә министири җанет йелин, килимат алаһидә әлчиси җон керри қатарлиқлар хитайни зиярәт қилип, хитай әмәлдарлири билән сөһбәт өткүзгән болсиму алаһидә нәтиҗә қазиналмиғаниди.