Америкиниң хитайда турушлуқ баш әлчиси дохтур гүлшән аббас қатарлиқларни қоюп беришни тәләп қилған

Америкиниң хитайда турушлуқ баш әлчи николас бурнс (Nicholas Burns) 12-айниң 10-күни “дуня кишилик һоқуқ күни” мунасивити билән баянат елан қилип, хитайниң уйғур, тибәт вә хоңкоңлуқларға қарши давамлаштуруватқан кишилик һоқуқ дәпсәндичиликлирини тохтитишқа чақирған. Шундақла та һазирғичә түрмидә йетиватқан дохтур гүлшән аббас, карханичи әкбәр әсәт вә тәтқиқатчи раһилә давут қатарлиқларни қоюп беришни тәләп қилған.

10-Декабир күни, б д т “дуня кишилик һоқуқ хитабнамиси” елан қилинғанлиқиниң 76-йиллиқи мунасивити билән, америкиниң бейҗиңда турушлуқ әлчиханисиниң торида елан қилинған баянатта мундақ дейилгән:

 “биз хитай җумһурийитини шинҗаң, тибәт вә хоңкоңда елип бериватқан кишилик һоқуқ дәпсәндичиликлирини тохтитишқа чақиримиз. Хитай җумһурийитиниң инсаний әркинликләрни чәклишигә һәм дөләт һалқиған бастурушиға болған чоңқур әндишимизни қайта тәкитләймиз. Кишилик һоқуқ вә инсаний иззәт-һөрмәтни қоғдиғанлиқи, өз етиқадини ипадилигәнлики, дин вә мәдәнийәт паалийәтлиригә қатнашқанлиқи үчүн җазаланған гүлшән аббас, әкбәр әсәт вә раһилә давут қатарлиқларниң дәрһал вә шәртсиз қоюп берилишни тәләп қилимиз”.

Баянатта йәнә, хитай җумһурийитини “өзиниң кишилик һоқуқ әмәлийитини көздин кәчүрүшкә, хәлқара кишилик һоқуқ мәҗбурийитигә әмәл қилип, өз хәлқигә бәргән вәдилирини ада қилишқа чақиридиғанлиқи” тәкитләнгән.