Amérika bilen xitay hökümiti mehbus almashturghan

Amérika bilen xitayning yillardin béri dawam qilip kelgen diplomatik sürkilishliridin kéyin, ikki dölet öz'ara mehbus almashturushqa qoshulghan. Netijide, amérika 3 xitay mehbusni xitaygha, xitay 3 amérika puqrasini amérikagha qayturghan. Shundaqla her ikki dölet bu ademlerni xata halda tutqanliqini élan qilghan.

“Ruytérs agéntliqi” ning 28-noyabir élan qilghan xewiride éytilishiche, bu qétimliq öz'ara mehbus almashturush kélishimi amérika pirézidénti jow baydén bilen xitay kompartiyesi bash sékrétari shi jinping bu yil 11-ayning otturisida péruda ötküzülgen “Asiya-tinch okyan iqtisadiy hemkarliq yighini” da körüshkendin kéyin emelge ashqan. Amérika 3 xitay puqrasini qoyup bergendin bashqa, yene xitaygha qaratqan sayahet agahlandurushining derijisini töwenletken. Amérika dölet xewpsizliki bayanatchisi bu 3 amérika puqrasining xitay teripidin xata halda tutqun qilin'ghanliqini, pat yéqinda ularning qoyup bérilip, amérikadiki a'ilisi bilen jem bolidighanliqini bildürgen.

Xitay hökümiti tutqun qilghan 3 amérika puqrasining biri 2016-yil jasusluq jinayiti bilen tutqun qilin'ghan harrison li؛ yene biri, zeher etkeschiliki bilen shughullandi dep tutqun qilinip 12 yil türmide yatqan, 2019-yil ölümge höküm qilghan mark siwidan؛ üchinchisi bolsa 2023-yil amérika jasusi dep eyiblinip ömürlük qamaqqa höküm qilin'ghan jon liyung iken.

Xitay tashqi ishlar ministirliqi bolsa amérika hökümiti teripidin qanunsiz tutulghan 3 xitay puqrasining qoyup bérilip, xitaygha qayturulidighanliqini bildürgen. Radiyomiz xitay bölümining xewer qilishiche, bu 3 xitay puqrasi xitay hökümitining parixorluqqa chétilip qalghan, nurghun pul bilen amérikagha qachqan emeldarliri bolushi mumkin iken. Xitay hökümiti bu arqiliq parixor emeldarlargha, negila qachsang séni tutimiz dégen signalni bergen.

Xewer analizlirigha qarighanda, xitayning bu qétim 3 amérika puqrasini qayturushqa maqul bolushi, xitaygha qattiq qol bolushi bilen tonulghan donald tramp hökümiti bilen yaxshi ötüsh arzusining barliqini ipadilishi dep qaralmaqtiken.