Америкидин ғулҗиға қайтқан туңган қиз «тәрбийиләш» тин қоюп берилгән, әмма паспорти тартивелинған

Мухбиримиз ирадә
2018-03-30
Елхәт
Пикир
Share
Принт

Өткән йилиниң ахири америкидин ғулҗиға туғқан йоқлашқа барғанда «тәрбийиләш» кә тутувелинған бир нәпәр туңган қиз йеқинда қоюп берилгән, әмма даириләр униң паспортини тартивалған. Бу қизниң америкидики аниси радийомизға учур берип, ғулҗида «тәрбийиләш» кә тутуп кетилгән қизиниң бу йил 3-айниң 11-күни қоюп берилгәнликини, бирақ паспортиниң тартивелинғанлиқини билдүрди. Сақчи даирилири йәнә бу туңган қизға туғқанлири бар мәһәллидин сиртқа чиқип кәтсә болмайдиғанлиқини уқтурған.

Мәлум болушичә, 12 йешида ата-аниси билән америкиға көчүп кәлгән бу туңган қиз әслидә америкиниң сеатил шәһиридики вашингтон штатлиқ университетиниң оқуғучиси икән. Бултур 10-ай мәзгилидә у юрти ғулҗиға туғқан йоқлаш үчүн қайтқан мәзгилидә тәтиллик дәрслирини көрүш үчүн вашингтон штатлиқ университетиниң мәктәп ториға киргән. Даириләр уни «там атлап қанунсиз чәтәл ториға киргән» дегән җинайәт билән тутқун қилип, ғулҗидики мәлум бир «йепиқ тәрбийиләш мәркизи» гә елип кәткән. Бу қизниң мәсилиси әйни вақитта радийомиз вә башқа бир қанчә хәлқаралиқ таратқуларда хәвәр қилинған иди. 

Йеқинда ғулҗа тәвәсидики бир қисим «йепиқ тәрбийиләш мәркәзлири» дә адәм қистаңчилиқи вә йеңидин тутулған бир түркүм кишиләргә орун бошитиш үчүн лагерларға соланған аяллар, балилар вә яшанғанларниң қоюп берилгәнлики хәвәр қилинған иди. Бу қизниңму шу қатарда қоюп берилгәнлики мөлчәрләнмәктә. Бирақ униң паспортини қайтуруп елип америкиға саламәт қайтип келиш-келәлмәслики аилисини қаттиқ әндишигә салмақтикән. 

Вашингтон штатлиқ университетидики вәқәдин хәвәрдар бирәйләнниң билдүрүшичә, бу йил 22 яшқа киргән бу туңган қиз хели илгирила америкиниң «йешил картиси» ға еришкән болсиму, әмма хитайға берип туғқан йоқлашқа қулайлиқ болуши үчүн хитай пуқралиқини вә хитай паспортини сақлап кәлгән икән.

Пикирләр (0)
Share
Толуқ бәт