Б д т кишилик һоқуқ әмәлдариниң хитайға тәклип қилинғанлиқи мәлум

Мухбиримиз нуриман
2020-02-26
Елхәт
Пикир
Share
Принт

Вухәндин байқалған таҗсиман вирусиниң хитайдин һалқип 29 дөләткә тарқилиши, вирусниң уйғур елидики лагерда йетиватқан милйонлиған тутқунларға юқуш еһтималлиқини күчәйткән.

Бу еһтималлиқ чәтәлләрдики уйғур җамаити арисида күчлүк әндишә қозғиған болуп, улар «вирус лагерға тәһдит салмақта», «дуня сәһийә тәшкилати үрүмчигә барсун» қатарлиқ имза қоюш паалийити башлиған.

Уйғурларниң бу паалийити «әл-җәзирә» телевизийәси, «муһапизәтчи» қатарлиқ нопузлуқ мәтбуатларниңму диққитини тартқан. 

Ройтирс агентлиқиниң 26-феврал хәвиридә көрситилишичә, хитайниң б д т дики әлчиси хитайниң бирләшкән дөләтләр тәшкилати кишилик һоқуқ комитетиниң юқири дәриҗилик әмәлдарини бу йил хитайда, һәтта уйғур районидиму зиярәттә болушқа тәклип қилғанлиқини ейтқан.

Хитай даирилири бирләшкән дөләтләр тәшкилатиниң уйғур райониға адәм әвәтиш тәлипини узундин бири рәт қилип кәлгән иди.

Б д т кишилик һоқуқ алий комиссари бачлит ханимниң баянатчиси бу һәқтә техи ипадә билдүрмигән. 

Хитай тәрәп кишилик һоқуқ комитетиға бачлит ханимниң зиярити җәрянидики паалийәт орунлаштурушиға йеқиндин ярдәмдә болидиғанлиқини ейтқан.

Бирләшкән дөләтләр тәшкилати тәтқиқатчилири вә паалийәтчиләр аз дегәндиму бир милйондин артуқ уйғур вә башқа мусулманларниң лагерларда тутуп турулуватқанлиқини әскәрткән.

Хитай у йәрләрни террорлуқни вә радикаллиқни түгитип кишиләргә һүнәр-кәсип өгитидиған «тәрбийәләш мәркизи» дәп тәсвирләп кәлмәктә.

Пикирләр (0)
Share
Толуқ бәт