Amérika siyasiyonliri Uyghur qirghinchiliqi sewebidin béyjing olimpik musabiqisini bayqut qilishni tekitlidi

Muxbirimiz eziz
2021-07-27
Share

Amérika dölet mejlisi ezaliri ichide 2022-yili béyjingda ötküzülidighan qishliq olimpik musabiqisini bayqut qilish chaqiriqi köplep otturigha chiqmaqta. Yéqinda dölet mejlisi ezaliridin maykil waltiz, tom malinowiski qatarliqlar yéngi teklip layihesi teyyarlap, Uyghurlar qirghinchiliqqa uchrawatqanda béyjing olimpik musabiqisini bayqut qilishning texirsizlikini yene bir qétim tekitlidi.

ABC Agéntliqining 27-iyuldiki xewiride éytilishiche, florida shitatidin saylan'ghan awam palata ezasi maykil waltiz tunji qétim béyjing qishliq olimpik musabiqisini toluq bayqut qilish teshebbusini otturigha qoyghan kishilerning biri iken. Amérika awam palatasining re'isi nensi pélosi xanim bolsa bu yilning béshida bu musabiqini "Diplomatik bayqut qilish" teshebbusini otturigha qoyghan idi. Waltiz ependi bu heqte söz qilip "Bizning bu qétimqi teklip layihemiz amérika qoshma shtatlirining béyjing olimpik musabiqisige resmiy wekiller ömiki ewetishige zor derijide tesir körsitidu" dégen.

Xewerde éytilishiche, amérika hökümiti ötken birnechche ayda izchil özlirining ittipaqdashliri bilen "Qirghinchiliqni ijra qiliwatqan xitaygha tenterbiye ömiki ewetish yaki ewetmeslik" mesilisini muzakire qilip kelmekte.

Maykil waltiz we tom malinowski 2021-yili iyun éyidin bashlapla oxshimighan sorunlarda: "Qirghinchiliq we insaniyetke qarshi jinayet sadir qiliwatqan xitay dölitining olimpik musabiqisi ötküzüshige yol qoyghanliq ularning qilmishini yolluq, dep étirap qilghanliqqa barawer. Bu emeliyette bashqa döletlerningmu insaniyetke qarshi jinayetlerge mehliya bolushigha yol achidu" dégen mezmunda söz qilip kelgeniken. Bu qétim ularning Uyghurlar duch kéliwatqan irqiy qirghinchiliqni asasiy seweb qilghan halda béyjingdiki olimpik musabiqisini bayqut qilishqa chaqirishi zor diqqet qozghimaqtiken.

Melum bolushiche, amérika hökümiti sabiq sowét ittipaqining 1979-yili afghanistan'gha tajawuz qilishigha naraziliq bildürüp 1980-yili moskwa shehiride ötküzülgen yazliq olimpik musabiqisini bayqut qilghaniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet