Америка кеңәш палата әзалири антоний билинкинни б д т да уйғурлар мәсилисини оттуриға қоюшқа чақирди

Вашингтондин мухбиримиз ирадә тәйярлиди
2024.01.18

17-январ күни америка кеңәш палатасиниң марко рубийо, тим кәйн, җеф мерклей вә марша билакбурн қатарлиқ әзалири америка ташқи ишлар министири антоний билинкенға хәт әвәткән. Униңда б д т да өткүзүлидиған хитайниң кишилик һоқуқ хатирисини “универсал қәрәллик тәкшүрүш” йиғинида билинкинниң хитай һөкүмитиниң уйғурларға йүргүзүватқан ирқий қирғинчилиқи вә инсанийәткә қарши җинайитини алаһидә тилға елиши тәләп қилинған.

Кеңәш палата әзалириниң мәзкур хетидә уйғурлар вә уйғур райондики башқа мусулман хәлқләргә йүргүзүлүватқан ирқий қирғинчилиқ һәм инсанийәткә қарши җинайәтниң һелиһәм давам қиливатқанлиқи әскәртилгән. Униңда йәнә бир милйондин артуқ уйғурниң һелиһәм лагерларда тутуп турулуватқанлиқи, мәҗбурий әмгәккә селиватқанлиқи, диний етиқадиниң дәпсәндә қилиниватқанлиқи вә райондики мәдәнийәт изналириниң йоқитилиш хәвпигә дуч келиватқанлиқи баян қилинған.

Улар хетидә йәнә антоний билинкиндин төт йилда бир қетим келидиған бу қәрәллик баһалаш пурситини чиң тутуп, хитай һөкүмитидин профессор раһилә давут, гүлшән аббас, илһам тохти, мәмәт абдулла қатарлиқларни, шундақла америкадики мәмәтҗан җүмә, бәһрам синташ вә адаләт сабитларниң аилә-тавабиатлириниң мәсилисини көтүрүп чиқишни тәләп қилған.

Бу йил 1-айниң 23- вә 24-күнлири бирләшкән дөләтләр тәшкилатида хитай һәққидә “универсал қәрәллик тәкшүрүш” елип берилиш алдида турмақта. Хитай һөкүмити бу өткәлдин устилиқ билән өтивелиш үчүн, өзиниң уйғур елидики ирқий қирғинчилиқи вә инсанийәткә қарши җинайәтлирини йоққа чиқиришқа, шундақла кәң көләмлик тәтүр тәшвиқат арқилиқ өзини ақлашқа урунған.

Һалбуки, юқириқи кеңәш палата әзалири ташқи ишлар министири антоний билинкингә язған хетидә хитай һөкүмитиниң өзи қол қойған хәлқара әһдинамиләргә қайта-қайта хилаплиқ қиливатқанлиқини, әгәр хитай һөкүмитиниң тәсириниң кеңийишигә йол қоюлған тәқдирдә хәтәрлик ақивәт келип чиқидиғанлиқини әскәрткән.

Кеңәш палата әзалири хетидә хитай һөкүмитиниң америка пуқралири, тибәтләр вә хоңкоңлуқларға тутуватқан муамилисиниму тилға елип өткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.