Йеңисар наһийәси чаған һарписида кәң көләмлик тазилаш һәрикити қозғиған

Мухбиримиз әркин
2019-01-31
Елхәт
Пикир
Share
Принт

Йеңи наһийәси йеқинда 16 маддилиқ уқтуруш чиқирип, аталмиш «қара гуруһлар» вә «рәзил күчләр» гә қарши омумий йүзлүк тазилаш елип бериш һәрикити қозғиған.

Уқтурушта қәйт қилинишичә, бу кишиләр дәрһал өзини мәлум қилип, даириләрниң йеник бир тәрәп қилишни қолға кәлтүрүши, қачқунларниң аилә тавабиати вә дост-ярәнлириниң улар қайил қилип, өзини мәлум қилишиға түрткә болуши керәк икән. Уқтурушта, уларни қанат астиға алғанларниң қаттиқ җазалинидиғанлиқи тәкитләнгән.

Мәзкур һәрикәтниң чаған һарписида елип берилишини диққәт қозғимақта. Көзәткүчиләрниң илгири сүрүшичә, уқтурушта бу һәрикәтниң «қара гуруһлар» вә «рәзил күчләр» гә қаритилғанлиқи тәкитләнгән болсиму, лекин униңдики тазилаш нишаниниң «қара гуруһ», «рәзил күчләр» билән көп алақиси йоқ икән. Көзәткүчиләр, нөвәттә хитайниң 3 милйондәк гунаһсиз уйғурни йиғивелиш лагери вә түрмиләрдә тутуп туруватқанлиқи, йеңисар наһийәсиниң қозғиған бу қетимқи һәрикити лагер сиртида қелип қалған уйғурларни бастурушқа қаритилғанлиқини билдүрмәктә.

Хитайниң 3 милйондәк уйғурни лагерларға қамап, лагер сиртидики уйғурларни тәқиб қилиши хәлқара җәмийәтниң қаттиқ тәнқидигә учриған. Бәзи көзәткүчиләр хитайниң һәрикитини «етник тазилаш» дәп әйиблигән иди. Йеңисар наһийәлик һөкүмәтниң торида елан қилинған уқтурушта көрситилишичә, бу қетимқи тазилаш һәрикити «миллий бөлгүнчилик, диний әсәбийлик вә террорлуқ билән шуғуллинидиған тәшкилатлар һәм җәмәтләр, асаси қатламға суқунуп кирип, уни монопол қиливалғанлар, юртдашлиқ, туғқанчилиқ, диндашлиқ риштиси бойичә гуруһ уюштурғанлар, аилә вә диний тәсиридин пайдилинип зораванлиқ қилғанлар, йәр тәқсимати, йәр иҗаригә бериш, өй чеқиш вә қурулуш түрлиридә қутратқулуқ қилғанлар, бөлгүнчи, диний әсәбий күчләрни қанат астиға алған икки йүзлимичи кадирлар», чәтәлдики «қара гуруһ вә рәзил күчләр» билән алақиси барлар, башқиларни әрз қилишқа қутратқанлар, қанунсиз пул топлиғанлар қатарлиқларни нишан қилған икән.

Пикирләр (0)
Share
Толуқ бәт