Чен чуәнго биңтуәнниң һәрбий характерини күчәйтиш мәсилисини өзи биваситә тәкитлиди

Мухбиримиз ирадә
2018-12-06
Share

Уйғур аптоном районлуқ парткомниң секретари чен чуәнго уйғур елидә турушлуқ ишләпчиқириш қурулуш армийәси йиғиниға қатнишип, биңтуәнниң һәрбий характерини күчәйтиш мәсилисини өзи биваситә тәкитлигән.

Тәңритағ ториниң бу һәқтики хәвиридин қариғанда, чен чуәнго 5-декабир күни үрүмчидә биңтуән рәһбәрлири билән учрашқанда сөз қилип, биңтуәнни уйғур елиниң муқимлиқи вә мәңгүлүк әминликини қолға кәлтүрүш үчүн ши җинпиң тапшурған ғайәт зор сиясий вәзипигә қәтий әмәл қилишни, партийә вә һөкүмәтниң орунлаштурушини садиқлиқ билән иҗра қилишни тәкитлигән.

У, буниң үчүн "биңтуәнниң өз алаһидиликини толуқ җари қилдуруп, биңтуәнниң һәрбий характерини күчәйтиш, һәрбий маһарәт вә һәрбий истратегийә билимлири игилишини тезлитип, шинҗаңниң муқимлиқи вә мәңгүлүк әминлики үчүн асас яритилиши керәк" ликини билдүргән.

Хитай һөкүмәт даирилири йеқиндин буян тохтимай биңтуәнниң һәрбийлик характерини күчәйтиш мәсилисини тәкитлиши чәтәлләрдики уйғур көзәткүчиләрниң күчлүк диққитини қозғимақта.

Техи мушу һәптиниң бешида уйғур аптоном районлуқ партком вә биңтуән даирилири мәхсус йиғин чақирған. Шу йиғиндиму уйғур аптоном районлуқ партком муавин секретари, биңтуәнниң партком секретари сүн җиңлоң, биңтуәнниң мәркәз тапшурған алаһидә истратегийәлик вәзипини яхши орунлиши, буниң үчүн һәрбийлик характерини күчәйтип, һәрбий иқтидарини өстүрүши шәрт дәп көрсәткән.

Уйғур көзәткүчиләр хитай һөкүмитиниң уйғур елидә йүз бәргән наразилиқ һәрикәтлирини давамлиқ биңтуәнниң күчи билән бастуруп келиватқанлиқини нәзәрдә тутқанда, биңтуәнниң һәрбий иқтидарини ашуруш мәсилисиниң тохтимай тәкитлиниши әндишә қозғайдиған бир бурулуш, дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт