Уйғур диярини ғайәт зор чошқа базисиға айландуруш қурулуши диққәт қозғиди

2021-04-16
Share

Хитай һөкүмитиниң уйғур дияридики пахта ишләпчиқиришта уйғурларни заманиви қуллар әмгикигә селиватқанлиқи кәскин тәнқидлиниватқанда, хитай һөкүмити тездин уйғур диярини хитайниң әң чоң чошқа бақмичилиқ базисиға айландурушқа йүзләнмәктә.

"бломберг хәвәрлири" ниң бу һәқтики мақалисидә көрситилишичә, уйғур дияридики нәччә он йиллап зор көләмдә пахта териш нәтиҗисидә терилғу йәрләрниң сүпәт дәриҗиси еғир дәриҗидә бузулған һәмдә пахта талалириниң сүпитигә муәййән тәсир йетишкә башлиған. Буниңға қошулуп йеқиндин буян хәлқарада уйғур дияриниң пахта мәһсулатлирини байқут қилиш долқуни көтүрүлгәнликтин, әмдиликтә хитай һөкүмити илгирики пахта теришкә ишлитилгән кәң йәрләрни зор көләмлик чошқа бақмичилиқ базисиға айландурушни қарар қилған. "бейҗиң хәвәрлири" гезитиниң мей фамилилик бир хадими бу һәқтә сөз қилип: "бу райондин чиқидиған пахта әң чоң иқтисадий үнүм вә пайда елип келидиған түр иди. Әмди бу пахта терилип кәлгән җайларни башқа зираәт теришқа өзгәртимиз, десәк буниңға мумкин ‍әмәс. Шуңа бу җайда чошқа беқиш әң ақиланә чарә," дегән.

Мәлум болушичә, нөвәттә биңтуән қармиқидики бирнәччә орунда алиқачан зор көләмлик чошқа бақмичилиқ базиси қурулуши башлинип болған болуп, хитай даирилири нөвәттә бу чошқа бақмичилиқ базилиридин чиққан "әхләт" ләрни илгирики вақитлардин буян ишлитилип келиватқан химийиви оғутниң орнида ишләтмәкчи болуветипту.

"хитай хәвәрлири тори" ниң 16-априлдики хәвиридә ейтилишичә, үрүмчи билән турпанниң арилиқиға җайлашқан биңтуәнниң 12-дивизийәси үрүмчи иқтисадий тәрәққият районида "миң түмән қурулуши" бойичә ечилған чошқа бақмичилиқ базисиға бәш милярд сом (тәхминән 770 милйон америка доллири) қиммитидә мәбләғ салған. Бу ғайәт зор қурулуш тамамланғанда бу җайдики бақмичилиқ, қушхана вә гөш тәйярлаш қатарлиқ йүрүшләшкән санаәт хитайниң барғансери ешип бериватқан гөш еһтияҗини қандурушқа хизмәт қилидикән.

Анализчилар бу һәқтә пикир йүргүзүп: "бу хитай һөкүмитиниң мустәмликичилик тәбиитиниң техиму ялиңач ипадилинишидин башқа нәрсә әмәс. Улар уйғурларни чошқа йеййшкә мәҗбур қилипла қалмастин, әмди уларниң мәҗбурий әмгикини чошқа бақмичилиқи саһәсигә кеңәйтмәкчи болуватиду. Техиму муһим бундақ зор көләмлик чошқа базилири уйғур дияриниң муһитини нәччә әсирдиму түгимәс әхләтләргә көмүп ташлайду," деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт