Сүй тйәнкәй: “биз ғәлибә қилишимиз ениқ болмиған урушқа тәвәккүл қилмаслиқимиз керәк”

Мухбиримиз әркин
2022-01-14
Share

Хитайниң америкада турушлуқ сабиқ баш әлчиси сүй тйәнкәй, хитайниң “дявйүтәй дөләт меһманханиси” да йеқинда өткүзүлгән бир йиғинда нутуқ сөзләп, хитайниң “урушқақ бөрә” дипломатийәсини тәнқид қилған. У, аччиқлинишниң хитай миллий мәнпәәтигә пайдилиқ әмәсликини ейтқан. “никей асия” журнилиниң хәвәр қилишичә, сүй тйәнкәй бейҗиң вашингтонниң хитайни контрол қилиштики истратегийәлик вә әтраплиқ тәдбирлиригә тақабил туралмаслиқи мүмкинликини билдүргән.

“никей асия” ниң хәвиридә ейтилишичә, сүй тйәнкәй бу сөзләрни ‍өткән йили 20-декабир күни хитай ташқи ишлар министирлиқи қармиқидики “хитай хәлқара тәтқиқат институти” чақирған бир йиғинда ейтқан болуп, униң сөзи хитайниң сиясий, дипломатийә чәмбирикидә зор қизиқиш қозғиған. У мундақ дегән: “биз америка-хитай арисидики әгри-тоқайлиқ, һәтта кәлгүсидики җиддиий бурулушларни бир тәрәп қилишта каллимиз сәгәк вә толуқ тәйярлиқимиз болуши керәк. Принсип җәһәттә тәйярлиқимиз йоқ, ғәлибә қилишимиз ениқ болмиған бир урушқа тәвәккүл қилмаслиқимиз, ғәзәп вә хоритиш уруши қилмаслиқимиз керәк” дегән.

У йәнә “хәлқимиз еришкән һәр бир мисқал тәстә қолға кәлди. Биз өзимизниң пәрвасизлиқимиз, һорунлуқимиз вә иқтидарсизлиқимиз түпәйли буларниң булаң-талаң қилиниши яки зиянға учришиға йол қоймаслиқимиз керәк” дегән. Хәвәрдә ейтилишичә, гәрчә униң нутуқиниң асаслиқ мәзмуни американи тәнқид қилишқа қаритилған болсиму, бирақ униң сөзигә инчикиләп қаралса, хитайниң башқа һөкүмәт әмәлдарлиридин пәрқлиқ икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт