Дуня уйғур қурултийи: "йеңи дәлилләр хитай компартийәсиниң уйғурларға қарита ирқий қирғинчилиқ садир қиливатқанлиқини көрсәтмәктә"

Мухбиримиз әркин
2020-06-29
Share

Дуня уйғур қурултийи 29-июн күни баянат елан қилип, хитайниң уйғурларға қаратқан пиланлиқ туғут сиясити һәққидики йеқинда елан қилинған бир йеңи доклат хитайниң уйғурларға ирқий қирғинчилиқ елип бериватқанлиқини дәлилләр билән тәминлигәнликини илгири сүрди. Баянатта тәкитлишичә, атақлиқ тәтқиқатчи адриан зенз тәйярлиған бу доклат хитай компартийәсиниң кәң көләмдә туғмаслиқ вә нупусни контрол қилиш сиясити арқилиқ уйғур хәлқини келәчәктин мәһрум қоюватқанлиқини конкрет пакитлар билән тәминлигән икән.

Адриан зензниң мәзкур доклати лагерларда йетип чиққан шаһитларниң гуваһлиқи вә һөкүмәтниң рәсмий һөҗҗәтлиригә асасән тәйярланған. Дуня уйғур қурултийиниң баянатида "бу доклат уйғур хәлқигә қаритилған нопус контрол сияситниң биваситә хитай һөкүмити тәрипидин йолға қоюлғанлиқини көрситип бәрди. У хитай компартийәсиниң уйғур хәлқигә қаратқан сияситиниң ирқий қирғинчилиқ икәнликини, уйғур хәлқиниң мәвҗутлуқини тосмақчи болғанлиқини ашкарилап бәрди," дейилгән.

Дуня уйғур қурултийи баянатида йәнә хәлқара җәмийәтниң милйонлиған уйғур лагерларға қамилип, уларниң түп кишилик һоқуқи вә әркинликидин мәһрум қилинғанда, завутларға әвәтилип мәҗбурий әмгәккә селинғанда, дуня әллириниң униңға қарши тәдбир қолланмиғанлиқи тәнқидләңән. Баянатта: "әгәр хәлқара җәмийәт йәнә хитайға тақабил турмиса, уйғур хәлқи пүтүнләй йоқилиши мумкин. Биз буниң йүз беришигә йол қоялмаймиз. Хәлқара җәмийәт һәр қетимлиқ вәһшиликтин кейин, әмди ‹һәргиз қайтиланмайду' дәп кәлди, лекин улар зади қачанни демәкчи," дәп көрситилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт