Xitay gérmaniyeni kishilik hoquq mesililiridin yiraq turushqa chaqirghan

Muxbirimiz irade
2021-04-29
Share

Amérikadiki "Politko" gézitining xewer qilishiche, xitay bash ministiri li kéchyang 28-april künidiki sözide gérmaniye bash ministiri an'géla mérkélni ikki dölet arisidiki soda alaqisini kücheytishke, emma kishilik hoquq we xongkongning siyasiy weziyiti qatarliq "Ichki ishlar" din yiraq turushqa chaqirghan.

Li kéchyang "6-Nöwetlik gérmaniye-xitay hökümet muzakirisi" yighinida "Xitay bilen gérmaniyening bezi mesililerde pikir oxshimasliqi bir pakit, emma méning qarishimche, ikki terep bir-birining yadroluq menpe'eti we muhim köngül bölüdighan mesililirige hörmet qilsila, biz barawer mu'amile qilish we bir-birimizning ichkiy ishlirigha arilashmasliq asasida alaqe qilsaqla. . . Perqni azaytip, hemkarliqqa ehmiyet béreleymiz," déyish arqiliq gérmaniyeni iqtisadiy menpe'etni aldinqi orun'gha qoyushqa chaqirghan.

Li kéchyangning bu sözliri del yawropa ittipaqi Uyghur qirghinchiliqi sewebidin xitay emeldarlirigha jaza tedbiri élan qilghan we gérmaniye parlaméntida 5-ayning 17-küni "Uyghurlargha qaritilghan kishilik hoquq depsendichiliki" toghrisida ochuq ispat anglash yighini échilidighan mezgilge toghra kelgen.

Biraq an'géla mérkil söhbet yighinida qilghan sözide li kéchyangning eksiche, soda hem kishilik hoquq muzakirilirining her ikkilisining muhimliqini tekitligen.

U yene xelq'ara emgek teshkilatining mejburiy emgekke alaqidar prinsiplirigha emel qilishningmu muhimliqini otturigha qoyghan. Gerche u Uyghurlarning mejburiy emgekke sélinishini biwaste tilgha alimighan bolsimu, emma "Gérmaniye we xitaydiki barliq kishiler üchün muwapiq xizmet shara'iti intayin muhim," dégen.

Bash ministir mérkil kishilik hoquqni téximu keng da'iride tilgha élip, "Bu yerdiki pikir oxshimasliqliri, bolupmu kishilik hoquq mesililiri we xongkongning weziyitini oylighinimizda otturigha chiqidu. Biz gérmaniye-xitay kishilik hoquq diyalogining eslige kélishini arzu qilimiz," dégen.

Gérmaniye hökümet bayanatchisi kéngeshtin kéyinki bayanatida "Ikki rehber jem'iyet tereqqiyati we kishilik hoquq mesilisi üstide söhbetleshti," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet