Һолливудниң режиссори апатоф, һолливудни хитайниң уйғур «қирғинчилиқи» ға сүкүт қилиш билән әйиблигән

Мухбиримиз әркин
2020-09-21
Елхәт
Пикир
Share
Принт

Һолливудниң даңлиқ филим режиссори җуд апатоф һолливудни тәнқидләп, хитайниң америка киночилиқ саһәсини сетивалғанлиқи, шуңа у хитайниң уйғурларни дәпсәндә қилишиға көз юмуп кәлгәнликини билдүргән. Америкадики «дөләтлик тәқриз» журнилиниң хәвәр қилишичә, апатоф өткән һәптә америка таратқулириға қилған бу һәқтики сөзидә, «хитай бизниң сүкүтимизни сетивалди» дегән. Униң тәкитлишичә, америка киночилиқ саһәси хитай вә башқа дөләтләрниң кишилик һоқуқ дәпсәндичилики ечип берилгән киноларни сензорлимақтикән.

Җуд апатоф һазирға қәдәр хитайниң уйғурларни дәпсәндә қилишини ашкара әйибләп, һолливудни тәнқидлигән тунҗи һолливуд сәнәткари.

«Қириқ яшлиқ қиз» қатарлиқ комедийәлик филимләрни ишләп даң чиқарған җуд апатоф, дисней ширкити йеқинда «мулән» намлиқ филимни ишләп тарқатқандин кейин юқириқи баянда болған. «Дөләтлик тәқриз» журнилиниң хәвиридә қәйт қилинишичә, апатоф мундақ дегән: «бу чоң карханиларниң көпинчиси дуняниң һәр қайси җайлиридики сәуди әрәбистан, хитайдәк дөләтләр билән сода қилиду. Улар бу дөләтләрни тәнқид қилмайла қалмай, филимлиридиму тәнқид қилишқа яки һәқиқәт чоңқурлап ечип берилгән һөҗҗәтлик филимләрни қоюшқа йол қоймайду».

Униң тәкитлишичә, киночилиқ саһәсидә «һечким йиғиливелиш лагеридин қечип чиққан бир адәмниң һекайисини сетивелип филимға алмайдикән шундақла хитайни тәнқидләйдиған һәрқандақ идийә сүрәткә елиниш басқучидила чиқирип ташлинидикән». «Мулән» намлиқ филимниң бир қисим көрүнүшлириниң уйғурларға «ирқий қирғинчилиқ» елип бериливатқанлиқи илгири сүрүлүватқан уйғур диярида елинғанлиқи ашкарилинип, хәлқарада қаттиқ ғулғула қозғиғаниди.

Пикирләр (0)
Share
Толуқ бәт