Уйғур дияридики һоқуқ тәқсимати нөвәттики реаллиқни техиму рошән әкс әттүрди

Мухбиримиз әзиз
2021-10-26
Share

25-Өктәбир күни чақирилған уйғур аптоном районлуқ парткомниң 10-нөвәтлик биринчи омуми йиғинида хитай компартийәсиниң уйғур районидики йеңи нөвәтлик рәһбәрлик қатлими "сайлап чиқилған". Йәни уйғур аптоном районлуқ парткомниң секритарлири, даимий һәйәтлири, интизам тәкшүрүш комитетиниң секритарлири вә һәйәтлири аталмиш "сайлам" арқилиқ бекитилгәнлики елан қилинған.

Хитай һөкүмитиниң башқурушидики "тәңритағ" ториниң бу һәқтики хәвиридә ейтилишичә, чен чуәнго давамлиқ уйғур аптоном районлуқ парткомниң биринчи секретари болған. Уйғур аптоном районлуқ парткомниң әң ядролуқ рәһбәрлик колликтипи болған 15 нәпәр даимий һәйәт әзасиму қайтидин "сайлап чиқилған" болуп, буларниң ичидә төт нәпәр уйғур вә бир қазақ болғандин башқа қалған он кишиниң пүтүнләй хитайлардин болуши, һәр саһәниң диққитини қозғиған. Шу күнниң өзидә "сайлап чиқилған" уйғур аптоном районлуқ интизам тәкшүрүш комитетиниң 47 нәпәр әзаси ичидә алтә нәпәр уйғур болғандин башқа, қалған кишиләрниң һәммиси дегүдәк хитайлардин тәшкил тапқан.

Хитай һөкүмити һәрвақит уйғур дияридики сиясий бастуруш һәққидә сөз болғанда, өзлириниң изчил "қанун бойичә иш көрүп келиватқанлиқи" ни тәкитләп кәлгән иди. Әмма бу қетимқи йеңи нөвәтлик һоқуқ тәқсимати вә бу қетимлиқ аталмиш "сайлам" ниң нәтиҗиси, хитай һөкүмити елан қилған аптономийә қанунидики мунасивәтлик маддиларниң әмәлийәттә қәғәз йүзидики сахта "аптономийә" икәнликини йәнә бир қетим испатлап көрсәткән.

Вашингтон шәһридики җорҗи тавн университетиниң профессори җеймис милвард бу һәқтики лексийәлиридә көп қетимлап: "хитай һөкүмити вәдә қилған аптономийә пәқәт қәғәз йүзидила мәвҗут. Хитай һөкүмитиниң аптономийә һәққидики қанунларни қандақ аяқ-асти қилидиғанлиқини биз уйғур районида вә хоңкоңда қайта-қайта көрмәктимиз," дегән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт