Америка қәләмкәшләр мәркизи илһам тохтини қоюп беришкә чақирди

Мухбиримиз әркин
2014.05.30

Америка қәләмкәшләр мәркизи 28‏-май хитай рәиси ши җинпиңға очуқ хәт елан қилип, бу йилниң башлири “бөлгүнчилик” билән әйиблинип қолға елинған уйғур өктичи зиялий илһам тохтини дәрһал қоюп беришкә чақирди.

Очуқ хәттә көрситишичә, илһам тохти йеқинқи йиллардин буян мәдәнийити, тили, диний етиқади барғанчә бузғунчилиққа учраватқан уйғурлар билән, хәнзулар оттурисида тинч диалог қурушқа тиришчанлиқ көрсәткән.

Мәзкур очуқ хәт, 4‏-июн “тйәнәнмен вәқәси” ниң 25 йиллиқ һарписида вә уйғур қораллиқ қаршилиқ һәрикити күчийип кәткән бир мәзгилдә елан қилинди.

Бәзи тәнқидчиләр, хитайниң илһам тохтиға охшаш мөтидил пикирләрни бастуруши уйғурларни үмидсизләндүрүп, қораллиқ қаршилиқ қилиш йолиға мәҗбурлаватқанлиқини илгири сүргән.

Қәләмкәшләр мәркизи бу йил 27‏-апрел әнглийә “һамий” гезитидә илһам тохтини қоюп беришни тәләп қилип, 50 язғучи имза қойған очуқ хәт елан қилған. Хитайниң әнглийәдә турушлуқ әлчиханиси7‏-май күни бу очуқ хәткә җаваб берип, бу органни “ғәзәп” билән тәнқид қилған вә җуңго әдлийә игилик һоқуқиға мудахилә қилғанлиқини илгири сүргән.

Қәләмкәшләр мәркизи бу қетимқи очуқ хетидә, ши җинпиңға чақириқ қилиш билән биргә, хитай әлчиханисиға җаваб бәргән. Очуқ хәттә: һалбуки, биз илһам тохтиниң ипадә әркинлик һоқуқини қолланғанлиқи сәвәблик түрмигә ташланғанлиқи, адвокат тәклип қилиши рәт қилинғанлиқидин қаттиқ әндишә қилғанлиқимизни әң күчлүк ибариләр билән тәкрарлаймиз, дегән.

Илһам тохти йеқинда америка қәләмкәшләр мәркизиниң йезиш әркинлик мукапатиға еришкән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.