Австралийәниң бейҗиң ген институтидин корона вируси синақ әсваблирини сетивелиши соал пәйда қилған

Мухбиримиз әркин
2020-05-15
Share

Австралийәниң бейҗиң ген институтидин корона вируси синақ әсваблирини сетивелиши бимарларниң шәхсий учур бихәтәрлики вә бу органниң хитай һөкүмитини ген техникиси билән тәминләп, униң уйғурларни назарәт қилишиға ярдәмләшкәнликигә алақидар мәсилиләрдә соал пәйда қилған.

Ройтерс агентлиқиниң хәвәр қилишичә, австралийәлик бәзи мутәхәссисләр BGI ға алақидар «зор әхлақи мәсилиләр» ниң барлиқини билдүргән. Австралийә сәһийә министирлиқи йеқинда бейҗиң ген институтидин 10 милйон долларлиқ корона вируси синақ әсваби сетивалған иди.

Австралийә сәһийә министирлиқи баянатчиси грег һунт бу әсвабларни ишлитишни австралийә бихәтәрлик органлириниң тәстиқлиғанлиқи, «BGI ниң бимар учурлириға еришәлмәйдиғанлиқи, бу әсвабларниң тәҗрибиханиларда ишлитилмәйдиғанлиқи» ни билдүргән. Лекин ройтерсниң хәвәридә мәзкур орунниң хитай һөкүмитини ген техникиси билән тәминләп, униң «шинҗаңдики уйғурларни назарәт қилишиға ярдәмләшкәнлики һәққидә әндишиләр барлиқи» илгири сүрүлгән.

BGI Дунядики әң чоң ген амбириға игә болуп, бу ширкәт хитай җамаәт хәвпсизлик органлириниң 2016-йили уйғур DNA амбири қуруп, уйғурларни контрол қилишиға ярдәмлишиш билән әйиблинип кәлгән иди. Ройтерсниң хәвиридә тәкитлишичә, австралийә ла тробе университетиниң дотсенти җеймис ләйболд «BGI ға четишлиқ санлиқ учур мәхпийәтлики вә униң дунядики әң чоң ген санлиқ амбирини ишқа селип, шинҗаңдики уйғурларни назарәт қилишқа техникилиқ ярдәм беришни өз ичигә алған зор әхлақи мәсилиләр бар,» дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт