Хитай лагерлирида йетип чиққан «уйғур зиялийлири» д у қ ға қарши әрз қилидиғанлиқини билдүргән

Мухбиримиз әркин
2020-03-07
Елхәт
Пикир
Share
Принт

Хитайниң лагерлирида йетип чиққан бәзи «уйғур зиялийлири» дуня уйғур қурултийи үстидин өзлириниң рәсимлирини рухсәтсиз ишләткән, дегән сәвәб билән әрз қилидиғанлиқини билдүргән. Лекин, хәвәрдә қандақ әрз қилидиғанлиқи, д у қ ниң баш штаби турушлуқ германийәгә келип әрз қилидиғанлиқи яки хитай сот орунлириға әрзи қилидиғанлиқи тилға елинмиған. Дуня уйғур қурултийиниң илгири сүрүшичә, бу, хитайниң д у қ ға қарши қолланған йеңи бир хил тактикиси икән.

Дуня уйғур қурултийи өткән һәптә өзиниң җәнвәдики б д т бинаси алдида чедир қуруп, көргәзмә ачқан. Көргәзмигә хитайниң 2017‏-йили башланған чоң тутқунда лагерға елип кетилгән нурғун уйғур зиялийлириниң рәсими қоюлған. Уларниң ичидә қәшқәр университетиниң сабиқ профессори гүлнар обул, шинҗаң язғучилар җәмийитиниң сабиқ рәиси азат султан, шинҗаң иҗтимаий пәнләр акадимийәсиниң хадими ғәйрәт абдурахман қатарлиқ зиялийларниң рәсими бар иди. Лекин, хитайниң «йәршари вақти» гезитиниң илгири сүрүшичә, гүлнар обул, азат султан, ғәйрәт абдурахман қатарлиқлар мәзкур гезиткә сөз қилип, өзлириниң лагерда ятқанлиқини инкар қилған, шундақла д у қ ни өзлириниң рәсимини рухсәтсиз көргәзмигә қоюш билән әйиблигән. Улар бирдәк «нами пур кәткән бу тәшкилатқа қарши қануний әрз қилиш һоқуқини сақлап қалидиғанлиқи» ни билдүргән. Дуня уйғур қурултийиниң баянатчиси дилшат ришит 6‏-март радийомизда бу хәвәргә инкас билдүрүп, юқириқи зиялийларниң бу сөзләрни хитайниң бесимида қиливатқанлиқини билдүрди. Униң тәкитлишичә, «хитайниң мәқсиди бу арқилиқ дуня уйғур қурултийини етибарсизлаштуруш» икән. Радийомиз илгири гүлнар обул, азат султан, ғәйрәт абдурахманниң тутқун қилинип, лагерға елип кетилгәнликини дәллигәниди.

Пикирләр (0)
Share
Толуқ бәт