Ма шиңрүй уйғур елиниң җәнубида юқумни тезгинләш билән бир вақитта муқимлиққа капаләтлик қилишни алаһидә тәкитлигән

Мухбиримиз ирадә
2022.11.10
Share on WhatsApp
Share on WhatsApp

Уйғур аптоном районлуқ парткомниң секритари ма шиңрүй уйғур елиниң җәнубидики үч вилайәт бир областта юқумни тизгинләш һәмдә муқимлиққа капаләтлик қилишни тәкитлигән.

“хитай хәвәрләр тори”ниң хәвиригә қариғанда, ма шиңрүй 8-ноябир күни син арқилиқ ақсу, хотән, қәшқәр вә қизилсу областлириниң рәһбәрлири билән көрүшкәндә “шинҗаң дегән бир шаһмат тахтиси, җәнубий шинҗаң болса бу шаһмат тахтисиниң көзи” дегән ибарини қолланған. У сөзидә, җәнуб уйғур елидики юқум вәзийтини контрол қилиш билән биргә, йәнә муқимлиқ тәдбирлириниму қолдин берип қоймаслиқини тәкитлигән.

Ма шиңрүй сөзидә, уйғур елидики “йошурун хәвпләргә үнүмлүк тақабил туруш вә терорлуққа қарши күрәшни қәтий чиңитиш, шундақла муқимлиқни қоғдаш қәдимини тезлитиш” һәққидиму көрсәтмә бәргән.

Хитай һөкүмитиниң уйғур елида юқумни контрол қилиш билән биргә, муқимлиқ вә аталмиш “терорлуққа қарши туруш” хизмәтлирини бунчә күчәп тәрғип қилиши ,диққәт қозғимақта.

Уйғур елида 4 айдин буян қаттиқ қоллуқ билән давам қиливатқан юқум тәдбирлири уйғурларниң һаятиға зор қейинчилиқларни туғдурған болуп, нурғун кишиләрниң вақитсиз өлүмигә сәвәб болмақта иди. Бу һәқтә тарқалған син көрүнүшлири иҗтимаий таратқуларда кәң тарқалмақта. Йеқинда һелиһәм давам қиливатқан қамал тәдбирлиригә чидимиған үрүмчидики бир қисим хитай аһалилириниң кочиға чиқип намайиш қилғанлиқи, әмма даириләрниң бу мәсилини наһайити еһтиятчанлиқ билән һәл қилғанлиқи радийомиз тәрипидин дәлилләнгән иди.

Хитай һөкүмәт таратқулири тарқатқан хәвәрләрдин мәлум болушичә, юқум қамал тәдбирлиригә қозғиливатқан наразилиқларниң көпийиши билән даириләр бир қисим җайларни аста - аста қоюветишкә башлиған болсиму, бирақ 8-ноябир үрүмчидә өткүзүлгән юқум қамали һәққидики ахбарат елан қилиш йиғинида, уйғур районида, болупму үрүмчидә юқумни тизгинләш әһвалиниң йәнила интайин мурәккәп һәм җиддий һаләттә туруватқанлиқи алаһидә әскәртилгән. Шу күнидики ахбарат елан қилиш йиғинида уйғур районлуқ кесәлликләрниң алдини елиш вә контрол қилиш мәркизиниң муавин мудири сүн җиңшүән: “үрүмчидә юқумниң алдини елиш вә контрол қилиш җеңи һалқилиқ пәйттә турмақта, юқумниң алдини елиш вә контрол қилиш хизмити мүшкүл вә мурәккәп” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.